Josua 24:3-17

³Mürin üa angei Apraham ämi we lewo seni ewe fanü pekilan ewe chanpupu o emwenifeili lon ewe fanü Kanaan, üa pwal awora chomong mwirimwirin. Üa ngeni Apraham Isaak,

⁴mürin üa ngeni Isaak Jakop me Esau. Iwe, üa ngeni Esau ewe chukuchukutän Etom pwe epwe fanüeni, nge Jakop me nöün kewe ra feila Isip.

⁵Mürin üa tinala Moses me Aaron, üa pwal ariaföüü chon Isip ren sokun feiengau üa föri ngeniir. Nge mürin üa emwenikemiiwu.

⁶Üa emwenawu ämi kewe lewo seni Isip. Nge ekewe chon Isip ra tapweriir fän war woken me chon wawa oris o toriir me ren ewe Setipar.

⁷Iwe, lupwen ämi kewe lewo ra siö ngeniei, üa awora rochopwak lefiler me ekewe chon Isip, üa pwal föri pwe ewe matau a pwölürela o amopuur. Ämi oua silei mine üa föri ngeni ekewe chon Isip. Iwe, oua nom lon ewe fanüapö fansoun langatam.

⁸Mürin üa emwenikemiila lon fanüen chon Amor mi nom ötiuen ewe chanpupu Jortan. Iwe, ra maun ngenikemi, nge ngang üa awinnakemi. Ämi oua fanüeni fanüer, nge ngang üa aroserela me mwemi.

⁹Mürin, Palak ewe kingen Moap nöün Sippor we mwän a maun ngenikemi. Iwe, a titi Palam nöün Peor we mwän pwe epwe anümamauakemi.

¹⁰Nge ngang üsap mochen aüselinga Palam, iei mine a afeiöchükemi. Iei usun üa amanauakemi seni Palak.

¹¹Mürin oua feila pekilan ewe chanpupu Jortan o tori Jeriko. Iwe, ekewe re Jeriko ra maun ngenikemi, pwal ekewe chon Amor, chon Peris, chon Kanaan, chon Hit, chon Kirkas, chon Hiw me chon Jepus. Nge üa akufuur meinisin o awinnakemi.

¹²Iwe, üa atolongeer lon niuokus me rükö, pwe üpwe asüela ekewe ruoman kingen chon Amor me mwemi. Ei esap fis ren nöümi ketilas ika wokumi esefich.

¹³Iwe, üa ngenikemi eu fanü ämi ousap angang ngeni, üa pwal ngenikemi telinimw pwe oupwe imweimw lon, nge sap aüemi, oua pwal ochoch föün irä seni ekewe tanipin irän wain me olif, nge sap fotukiemi.’

¹⁴Iei mine oupwe meniniti ewe Samol mi Lapalap o angang ngeni fän leten lelukemi pwal fän allükülüköch. Oupwe pöütala ekewe kot ämi kewe lewo ra fel ngeniir me pekilan ewe chanpupu Oifrat pwal me Isip, nge oupwe chök angang ngeni ewe Samol mi Lapalap.

¹⁵Nge ika ousap mochen angang ngeni ewe Samol mi Lapalap, ikenai oupwe filätä iö oupwe angang ngeni. Oupwe filätä ika oupwe angang ngeni ekewe kot ämi kewe lewo ra angang ngeniir me lon ewe fanü pekilan ewe chanpupu Oifrat, ika än chon Amor kewe kot mine fanüer we oua nom lon. Nge ngang me chon leimwei, äm aipwe angang ngeni ewe Samol mi Lapalap.”

¹⁶Iwe, ekewe aramas ra üreni, “Äm aisap fokun likitala ewe Samol mi Lapalap o angang ngeni pwal ekoch kot.

¹⁷Pun ewe Samol mi Lapalap äm we Kot, i a emwenikeemiwu me äm kewe lewo seni ewe fanü Isip, ewe leni ia ra nöünikem amanau ie. Aia küna ekewe manaman i a föri. A tümwünükem lon unusen äm sai lein chon ekewe mwü meinisin ia aia pwerela ie.