Josua 1:5-15

⁵Te bidi me deligo te dage aiyaba elalumainu elama, te nage isimainu ebo, te usu me egobeo. Te ena nage dali bidiyu, te ena Moses dali bidali tiwai gilama yaibao. Eno homugo nage me gegeda palogobeo, eno nage munu me taga pogobeo.

⁶Nage bomo elama dolaluyu, tama nage wi me elamuo. Magi baso meni. Te nago te we bidi dabe augwali te eno augwalibolo mawaibao wali te tǫ pedaiba odasa pomainu yaibao, te tiwai eno te po augwa wąįbolo dąų wai dao.

⁷Tama tibaso, nage bomo mu elama dolaluyu, tama nage wi me isiąyu, tama habu bulu me pelamuo. Nago bugagia tonaluyu, tama eno sę bidi Mosesgo nagebolo mani bomai po tigidali mu wali pao. Nago te bomai po me badu dwasianu munu me tagalamuo. Nago te bomo yai po dabe tigidali bugagia wali peyu da, teda te nage mena badu pabo te nage munu me dolomainu me egobe, te nage bugagia naga bidaibao.

⁸Nago te bomai po elalubo bukugo po munu me homugo gegeda pelamuo. Te nago bugagia tonaluyu, tama te bomai pode elalubo tigidali po mu wali pomainogo eyu, nago te giligade me, hulide me, nago te bomai pode bugagia skul elama, konea sao. Te nago tama tiyu da, te nago gasa sę tigidali ebo te wiegi yai naga ilaibao.

⁹Eno nagebolo wai dao. Tama nage bomo elama dolaluyu, tama nage wi munu me isiąyu, tama nage magi nai me delide habu bulu me pelamuo. Magi baso meni, ena God, te nago Genuai Bidi, te ena nage dali te nage pabo tigidali buluba paibao,” te po wali.

¹⁰Tialima, Josuago te we bidi augwali tonalubo tobolu bidi dabebolo te po wai,

¹¹“Dage te we bidi bidibo pesage tomode bagula biliyu, te we bidi augwalibolo te po waiąo, ‘Te duga nai dabe sisinao,’ po wao. ‘Sela sogo naga digi elalubao, tama dagego e Jordan wę nogelama, tama God, duga Genuai Bidigo, dagebolo te mawaibao wali te tǫ dagego saibao,’ tama po wao,” Josuago te po wai.

¹²Tama Josuago te po te Rubengo hanibolo, me Gatgo hanibolo, me te Manasego hani me badubolo me te tiwai po wai,

¹³“Dagego te po bugagia homu kone palao, te tigidali po Mosesgo dagebolo wai dao, aga te Genuai Bidigo sę ebo bidi bidali. Agai te po wali, ‘God, duga Genuai Bidigo, e tǫ dagebolo menama, tama dage tede bidiyu, toma tuabo madi elaluaibao,’ te po wai.

¹⁴Tialima, dagego e tǫ habu badu dagego selama da, tama duga we wai puluba me, te kibu dabe badi, augwali ede te wę Jordan e badu te Mosesgo mani tǫde tonaluyu bidagameo. Tiali goli, dagego ami bidi dabe da, augwa hwįabo nai dabe dodolama, tama e wę nogelama, te abagi dabe dali augwali polasa pelama, tama augwali tudi badu tonaluyu, te wąbi hwįbo tau somainao.

¹⁵Te duga Genuai Bidi Godigo e tǫ dagebolo mawai dao. Tama dagego te gasa Israel hani bage duga abagi dede tau siyu, tama agai augwalibolo mabo tǫ sabo sogoba usu nagasu yao. Tama elama, te boi pilama wiegi yai pemene ebo sogo elaluyu, tama augwali me te toma tueibao, te dage megi ebo tiwai gilama yaibao. Tama tiliama, tama nosali dage duga e tǫba ma asomainogo, polobadu te tǫ Mosesgo dagebolo mawai dao, e tǫ te Jordan ąį badu, te giliga pedalubo badu dao,” Josuago te po wai.