JOSUA 13:3-26

³I Aigita mâreŋ ʒoaŋ wewefunaopec Sihora opâonec faicpec rafeku Ekoroŋ hae mâreŋte mao fisikac. I Kanaaŋ ŋic jaŋere mâreŋ. Filisa ŋic jaŋere fekicnefâc 5 jaŋe hae mâreŋ jurambiŋ ine ʒiŋuc: Gaza, Asidode, Asikaloŋ, Gati â Ekoroŋ. Erâ Awim mâreŋ juwicpec forakac i wâc furu fokac.

⁴Erâ Kanaaŋ ŋic jaŋere mâreŋ sasawa, erâ wâc Sidoŋ ŋic jaŋere mâreŋ moc ʒâŋene Meare irecnec raku Afeke haeo Amori ŋic jaŋere mao fisikac.

⁵Erâ wâc Gebali ŋic jaŋere mâreŋ â Herimoŋ tikifuŋko Baali‐Gada hae ŋekac irecnec raku ʒoaŋ wewefunaopec Hamati hae mendâŋko fisikac, Lebanoŋ mâreŋ sasawa i furu fofârekac hâcne.

⁶Erâ tiki mâreŋ sasawa Lebanoŋkonec raku Misirefo‐Maim mâreŋko fisikac, erâ wâc Sidoŋŋic jaŋere mâreŋ i mâc fofârekac. Eme Israe ŋic jaŋe ira raʒiniŋte no nahac mâreŋ rune bârâriec‐jopapemu. Go ine mutâcne‐garepo irec sâcko Israe ŋic jaŋe mâreŋ i ro rauc eniŋte kâdoc qajarezemec.

⁷Ʒi ine fuŋkerâ ŋic guru 9 â Manase guru dâkâne jaŋe mâreŋ i ro rauc eniŋte bâtâc bajarec.”

⁸Rubeŋ â Gade guru jaŋe Manase guru dâkâne moc jaŋehec juniŋte Wofuŋte kiŋaŋŋic Mosezi Jordaŋ ŋifec ʒoaŋ wewefunaopec mâreŋ jarewec irec ma ʒiŋuc forawec:

⁹Aronoŋ wâneŋko Aroe hae opâmecko ŋekac irecnec fuŋkerâ raku wâneŋ ʒâʒâŋiŋko hae ŋekac i fotâcnerâ fe Medeba wâneŋ sasawa rofârerâ Diboŋ haeo fisiwec.

¹⁰Erâ Amori ŋic jaŋere ŋicwofuŋ Sihoŋ, Hesiboŋ haeo juwec, ere hae i mâmâc sasawa rofârerâ Amoŋŋic jaŋere mao fisiwec.

¹¹Izi Gileade mâreŋ â Gesuri ŋic â Makati ŋic jaŋere mâreŋ, erâ Herimoŋ tiki â Basaŋ mâreŋ fotâcnerâ raku Saleka haeo fisiwec.

¹²Erâ Basaŋ ŋicwofuŋ Ogo ŋeŋe juju ewec hae jajahec Asitaroto â Ederei, i erâ ere uucmaŋ furu jaha. Refaim ŋic nâfocne jaŋeraonec Ogo mocjaha sawa hetirine juwec. Ŋicwofuŋ ʒi jahe hâcne Mosezi jofa jâpec ejactewec.

¹³Israe ŋic jaŋe Gesuru ŋic â Makati ŋic jopa jâpec mi ejarembiŋ. Irec jaŋe Israe ŋic jaŋere guruo jumbiŋzi juŋgopieŋ hâcne.

¹⁴Lewire guru sasawa jaŋe ine Mosezi mâreŋ moc mi jarewec. Jaŋe Wofuŋzi Mose âzâcne mutâc ewec irec sâcko Israere Wofuŋ Anutu ere mamanac sawa juhapie taha bâzi ririke gie izi jaŋere juju bâfuaocte mujarewec.

¹⁵Eme Mose e Rubeŋte guru garikiŋ‐jeŋic sâc mâreŋ ʒiŋuc ro rauc eniŋte jarewec:

¹⁶Aronoŋ wâneŋko Aroe hae opâmecko ŋekac irecnec fuŋkerâ raku wâneŋ ʒâʒâŋiŋko hae ŋekac i fotâcnerâ fe Medeba wâneŋ sasawa i mâmâc rofârewec.

¹⁷Ehuc ʒuhuckerâ Hesiboŋ hae â hae piticfâcne wâneŋko ŋerambiŋ jaŋe rocjopawec wâc; ine kecʒiŋuc: Diboŋ, Bamo‐Baali, Bete‐Baali‐Meaŋ,

¹⁸erâ Jahaza, Kedemoti â Mefata.

¹⁹Erâ Kiriataim â Sibema, erâ wâneŋ tiki‐ticnao Zeresaha.

²⁰Erâ Bete‐Peoro â Pisiga tiki irec heâŋ, erâ wâc Bete‐Jesimo.

²¹Wâneŋko hae ŋerawec i, erâ Amori ŋic jaŋere ŋicwofuŋ Sihoŋ, Hesiboŋ haeo juwec ere uucmaŋ furu jaha i mâreŋte mazi rofârewec hâcne. Eme Mosezi ŋicwofuŋ e â Midiaŋ micne ʒi jaŋe jopa jâpec ejarewec: Ewi, Rekem, Zuru, Huru â Reba. Jaŋe mâreŋ ira Sihoŋte mefâro jumbiŋ.

²²Israe ŋic jaŋe ŋic gâcne jopahuc, Beoro ŋokâ‐ticne, faŋfaŋdâŋ mumu Bileam, e mâmâc qambiŋ.

²³Eme Jordaŋ rârec rârec mâreŋ gâcne forawec izi Rubeŋ guru jaŋere ma ewec. Mâreŋ ira hae kâcɋene â piticne ŋerawec i Rubeŋte guru jaŋe garikiŋ‐jeŋic sâc ro rauc embiŋ.

²⁴Eme Mosezi Gadere guru jaŋe iŋuc jaha garikiŋ sâc mâreŋ ro rauc eniŋte jarewec ine ʒiŋuc:

²⁵Jazere hae â Gileade mâreŋko hae ŋerawec erâ Amoŋŋic jaŋere mâreŋ dâkâne i mâreŋte mazi fotâcnerâ raku Raba hae ʒoaŋ wewefunaopec Aroe hae ŋekac ira fisiwec.

²⁶Erâ Hesiboŋ haeonec raku Rama‐Mizipe â Betonim haeo fisiwec. Izi Mahanaim haeonec Debiri hae mâreŋko fisiwec.