Josua 13:11-31

¹¹Augwaligo te Gileat dabego tǫ me sali, tama te Gesur, me Maka dabego tǫ me, tama te Hermon bulu du pedai tigidali me, tama te Basandu te Saleka teba usu nigi pelama,

¹²tama te Okgo tonalubo tǫ tigidali sobadi, te aga tuni bidi te Astarot me Edreide bidali sogo. Ok aga te Refaim bage me deli, tama aga te augwaligo sabi siminani dao. Mosesgo te boi hwįnama, te Refaim dabe augwali aiyaba elaluama, tama augwali ela gudulali.

¹³Tiali goli, te Israel dabe augwaligo te Gesur dabe, me te Maka dabe dali te augwali ela gudulube. Augwali te Israel dabe dali hodobo bidada peyu, tama megi e po asębo sogoba usu nagasai.

¹⁴Tiali goli, Mosesgo te Livai hani te tǫ me masiąwai. Magi baso meni, te Israel we bidi dabego Genuai Bidiba ofa ilabo nai dabe sela asobo si da, te Livai dabego meba sabo dao. Te Genuai Bidigo Mosesbolo wali po gilama yali.

¹⁵Mosesgo te tǫ pedai me badu deli te Rubengo hani sibi dabe deli delibolo menama, tama te augwa tǫ mu pedelali.

¹⁶Te augwaligo hanu tǫ pedai te Arnon odogo tǫ sesegede elalubo bulu nogi Aroer tede gagalama, tama te odogo tomode elalubo hanu ela soayu, tama te Medeba dabego dolo elalubo tǫ tigidali tedu pelama,

¹⁷tama pelama, te Hesbonba sabolama, te tǫ malu dolo tǫde te tigidali hanu elaluali: Dibon, me Bamotbal, me Bet Balmeon,

¹⁸me Jahas, me Kedemot, Mefat,

¹⁹me Kiriataim, me Sipma, me Seretsahar, te tama bulu te malu tǫ te dwasianu bulu du ugwadu bagede elaluali,

²⁰tama te Betpeor, tama te Pisga bulu du pedai badu me, te Bet Jesimot,

²¹me te gasa tigidali hanu me te tǫ malude elaluali. Tama te Amor dabe tigidali hanu dabe te tuni bidi Sihon deligo tonaluali. Aga te Hesbonde te gavman tuni bidi bidali. Mosesgo te boide hwįnama, tama aga aiyaba elalubadi, tama te Midian dabe tobolu bidi dabe me aiyaba elalubadi yali. Augwali da, te Evi, me Rekem, me Sur, me Hur, me Reba. Tigidali te hanude bidalubadi, tama te gavman tuni bidi Sihongo te augwa bidibo madi tonalumainu sę mani.

²²Tama Balam, te Beorgo ogwa, tama te bidigo te nosali pedelabo sę po wabo koneai bidi, te Israel dabego aga me ela muani.

²³Te wę Jordan te Rubengo hani bidibo sesegede elaluali. Tama te hanu me te bulu dabe te Rubengo hani sibi deli deligo te augwa tǫ da olama, sesa pali.

²⁴Tama Mosesgo te tǫ te Gatgo hani sibi tigidali deli delibolo doba yali, tama augwa tǫ gagalama bidali.

²⁵Jasago tǫ me te Gileat tigidali hanu, tama te Amon dabego tǫ pedai te Aroer teba usu nama, te Amon dabego tǫ tomode elaluali, te giliga ge pedalubo madi, te Raba tǫ pąde elaluali.

²⁶Te tǫ te Hesbonde gagalasa, pelama, te Ramatmispe, me Betonim, me te Mahanaim, te pelama, te Lodebar te sesegeba usu nigi pali.

²⁷Te Jordan wę tǫ malude elaluali bulu te Betharam, me Betnimra, me Sukot, me Safon, te gavman tuni bidi Sihongo tonaluali tǫ pedai badu, te Hesbon tǫ pedai badu, te Jordan wę te badu gagalasa, te giliga pedalu badu sabolama, tama te sigi ąį Galili tǫ badu dąį igi pelama sai.

²⁸Tama te hanu dabe me te bulu dabe, te Gatgo hani sibi te bagego te augwa tǫ da olama, sali.

²⁹Tama Mosesgo te Manasego hani sibi dabe deli delibolo te tǫ me badu te augwali bidimainu mani.

³⁰Augwaligo sali tǫ te Mahanaimde gagalasa, pelama, tama te Basan pedai tigidali badu sali, te gavman tuni bidi Ok tego polobadu tonaluali hanu Basan da. Tama augwaligo te Jairgo tonaluali hanu te bidi sese sela 60 hanu te Basande tomode elaluali tǫ tigidali sali.

³¹Te tǫ sali te Gileat te badu me sali, tama te Astarot, me Edrei me sigi pali, te gavman bidi Okgo polobadu tonaluali hanu dabe da. Tama Mosesgo te tǫ dabe te Makirgo hani sibi dabe deli delibolo mani, te Manasego ogwa dao.