Josua 13:10-22

¹⁰fiti ekewe telinimw meinisin än Sihon ewe kingen chon Amor mi nemenem lon Hespon tori kiännin fanüen chon Amon.

¹¹Ra pwal fanüeni Kiliat me ewe fanüen chon Kesur me chon Makat, unusen ewe chuk Hermon me unusen Pasan tori Saleka.

¹²Iei unusen ewe mwün Ok, ätewe a nemenem lon Astarot me Etrei, i amüchülan mwirimwirin chon Refa. Iwe, Moses a akufu ekei aramas o asürela seni fanüer.

¹³Nge ekewe aramasen Israel resap asüela chon Kesur me chon Makat seni fanüer. Iei mine ra nonom lein chon Israel tori ikenai.

¹⁴Iwe, Moses esap ngeni chon ewe ainangen Lefi eu fanü pwe repwe fanüeni. Nge repwe angei inetir seni ekewe asor aramas ra uwato pwe repwe kek fän iten ewe Samol mi Lapalap ewe Koten Israel, pun iei usun Kot a fen kapas ngeni Moses.

¹⁵Iwe, Moses a ngeni chon ewe ainangen Rupen fanüer a aükük ngeni ükükün ar kewe famili.

¹⁶Iei kinikinin fanüer seni Aroer mi nom lepökütiwen ewe lemolun Arnon, pwal ewe telinimw mi nom lukalapen ewe lemol me unusen ewe fanü mi sosonöch tori Metepa

¹⁷me Hespon fiti wisoposopun kewe meinisin mi nom lon ewe fanü mi sonosonöch, pwal ekewe telinimw Tipon, Pamot-paal me Pet-paalmeon,

¹⁸Jahas, Ketemot me Mefaat,

¹⁹Kiriat-aim, Sipma me Seret-sahar mi nom won palapalatän ewe lemol,

²⁰Pet-peor, ekewe palen ewe chuk Piska me Pet-jesimot.

²¹Ikkei ekewe telinimw meinisin mi nom won ewe fanü mi sosonöch me unusen ewe mwün Sihon ewe kingen chon Amor mi nemenem lon Hespon. Sihon ätewe Moses a akufu fiti ekewe souemwenin Mitian iter Ewi, Rekem, Sur, Hur me Repa. Ir ekewe samolukis nöün Sihon mi nom lon ewe fanü.

²²Iwe, pwal Palaam nöün Peor we mwän ewe soupwe a fitilong lein chokewe ekewe aramasen Israel ra niela.