Josua 10:27-40

²⁷Tama be pio mu ebode, Josuago te bidi dabebolo olama, tama augwaligo te tigi dabe aiyaba sela dulama, tama augwa te dualaluali ola be tomoba sąwai. Tama te ola be augwaligo te moni genuai masigigo paliai. Tama te masigi dabe e po asębo sogode me elalubo dao.

²⁸Te sogo naga Josuago te Makeda hanu pedela sigi pelama, tama te hanude bidali tuni bidi pageabi yai. Tama agai te hanude bidali we bidi tigidali ela silai. Te deli me bidibeo. Agai te deli tobage tiwai kolesaga naga te Makeda tuni bidi dali yai, agai te Jeriko hanu tuni bidide yali sę tiwai gilama naga yalio.

²⁹Te silama nosali, Josua aga ami bidi dabe dali augwaligo te Makeda hanu tagalama, te Lipna hanuba pelama, tama augwaligo te hanude bidibo bidi dabe augwali dali hwįgi palio.

³⁰Tama Genuai Bidigo te Israel dabe augwali tau selama, tama augwaligo te boi bidi dabe augwali aiyaba elaluama, tama te hanu selama, te hanude bidali tuni bidi me pageabi yai. Tama Josuago te hanude bidali bidi tigidali ela silama, tama deli digi me bidibeo. Agai te tuni bidibolo te Jeriko tuni bidibolo yali kolesaga tiwai naga yai dao.

³¹Te silama nosali, Josua aga ami dabe dali augwaligo te Lipna hanu tagalama, tama te Lakis hanuba pali. Augwaligo te hanu bobegelama, tama augwaligo te Lakis hanu bidi dabe dali hwįanio.

³²Genuai Bidigo te Israel dabe augwali tau selama, tama te si sogo wabode augwaligo te boi bidi dabe aiyaba elaluali. Tama Josuago me deli sula me tagalobeo. Agai tigidali bidi ela muai, agai te Lipna hanude yali tiwai gilama yalio.

³³Te Horam, te Geser hanu tuni bidi, aga aselama, te Lakis hanu bidi dabe tau sagasai. Tiali goli, Josuago aga me, te aga hani bidi dabe dali, te hwįanigo augwali aiyaba elaluai. Tama Josuago augwali me deli bidimainu me gogola tagalobeo.

³⁴Te silama nosali, Josua aga ami bidi dabe dali augwaligo te hanu Lakis tagalama, tama te hanu me nogi Eklonba pai. Augwaligo te hanu bagulama, tama augwaligo te Eklon dabe augwali dali hwįanio.

³⁵Augwaligo te hanu te deli sogo bubugade naga salio. Tama Josuago te hanude bidali bidi tigidali ela muani, te agai Lakis hanude yali tiwai gilama yai.

³⁶Te silama nosali, Josua aga ami bidi dabe dali augwaligo te Eklon hanu tagalama, tama te Hebron hanuba pai. Tama augwaligo te Hebron hanude bidali bidi dabe dali hwįnama,

³⁷tama te hanu sai. Tama augwaligo te tuni bidi eleyu, tama te Hebronde bidali we bidi dali tigidali elebadi, te gasa dwasianu hanu pąde bidaluali bidi dabe dali tigidali elalio. Tama Josuago te Hebron hanu tigidali mu dolali, te agai Eklon hanude yali tiwai gilama yai. Tama te hanu bidi me deli me bidai menio.

³⁸Nosali Josua aga ami bidi dabe dali augwali begelama, tama te Debirba pelama, tama augwaligo te Debir dabe dali hwįgi pai.

³⁹Augwaligo te hanu dali, te tuni bidi me siyu, tama te gasa pąde elalubo dwasianu hanu dabe me sai. Augwaligo tede bidali bidi dabe tigidali ela muai. Josuago te dedeli kolesaga tiwai naga te Debir hanude bidibo bidi dabebolo me te tuni bidi dali tiali, agai te Hebronde me te Lipna hanu side te augwa tuni bidi dabe dali yali kolesaga tiwai naga yai dao.

⁴⁰Tama elama, tama Josuago te tǫ tigidali badu te hwįanigo aiyaba elaluai. Agai te bulu dude bidali tuni bidi dabe me, te Negev dabe badu tuni bidi dabe me, te tǫ malude bidali tuni bidi dabe me, te bulu du pąde bidali tuni bidi dabe me, te agai augwali aiyaba elaluai. Agai bidi deli me sulama, gogola me tagalobeo. Agai tigidali ela muai. Agai te Israel dabego Genuai Bidi Godigo te agabolo wali po tiwai gilama yalio.