Josua 10:15-30

¹⁵Nosali Josua te ami bidi dabe dali augwali te augwa bidali pesage te Gilgalba ma palio.

¹⁶Tiali goli, te a naga tuni bidi dabe wi pelama, tama te bulu Makeda tede te masigi ola bede geme dualaludai.

¹⁷Tama bidi mebago augwali dualalubo sulama, tama augwaligo Josuabolo te augwali dualalubo pesage te po wai.

¹⁸Tialima, Josuago te po wai, “Te genuai masigi meba hogogobele pelama, tama te ola be dalalubo te paliama, tama te tonaluabo ami bidi meba teba munama te tonaluao,” wai.

¹⁹“Tiali goli, duga digi tede olo me bidilamuo. Dage te gasa boi bidi dabe wali pelama, tama augwali tudi badu te nosali asali bidi dabe dalibolo hwįgi pao. Dagego augwali te augwa hanuba sabalomainogo sula tagalamuo! Magi baso meni, God, dago Genuai Bidigo, te dagego hwįbo bomo usu elama, te boi bidi dabe aiyaba elaluaibao po wai dao,” wali.

²⁰Tialima, Josuago me te Israel dabe augwaligo dali te boi bidi dabe tigidali pąde ela silainu yai. Tiali goli, meba wi peyu, te augwa hanu tomoba geme duala sigi palio, te hanu te genuai bomai obo elaluali.

²¹Nosali Josuago ami bidi dabe tigidali augwali te Makedaba ma geasa asai. Te me dedeli me dolobeo. Tama tibaso, mena bidi me deligo te dwai posobo po te Israel dabebolo me wainogo ebo usu me isiąwai dao.

²²Nosali Josuago po ma wali, “Te masigi ola be paliali po dala sąnama, tama te a naga tuni bidi te ena bidiboba odasa asao,” te po wai.

²³Tialima, augwaligo tama tiwai yalio. Te bidi dabe augwaligo te Jerusalem hanu tuni bidi, me te Hebron, me Jarmut, me Lakis, me Eklon, te tama a naga hanu tuni bidi dabe te Josua bidiboba odasa palio.

²⁴Augwaligo te augwali te Josua bidiboba odasa aselawai madi, tama agai te Israel dabe tigidali i wali, tama agai te aga dali pali te ami bidi dabego ofisa bidi dabebolo te po wai, “Dage eba aselama, tama dagego sągą te tuni bidi dabego mageba agayao,” wali. Tialima, augwaligo tama tialio.

²⁵Nosali Josuago te ofisa bidi dabe augwalibolo te po wai, “Dage wi eyu, tama didibili munu me elamuo, bomonama dolaluao, te dagego nosali augwali dali hwįabo boi bidi dabebolo te Genuai Bidigo te tiwai naga ilaibao,” wali.

²⁶Nosali Josuago te tuni bidi dabe elama, tama augwali te ni pedai a nagade walalio. Augwali te nide walalubadi, te sia ge aiyaba dulai dao.

²⁷Tama be pio mu ebode, Josuago te bidi dabebolo olama, tama augwaligo te tigi dabe aiyaba sela dulama, tama augwa te dualaluali ola be tomoba sąwai. Tama te ola be augwaligo te moni genuai masigigo paliai. Tama te masigi dabe e po asębo sogode me elalubo dao.

²⁸Te sogo naga Josuago te Makeda hanu pedela sigi pelama, tama te hanude bidali tuni bidi pageabi yai. Tama agai te hanude bidali we bidi tigidali ela silai. Te deli me bidibeo. Agai te deli tobage tiwai kolesaga naga te Makeda tuni bidi dali yai, agai te Jeriko hanu tuni bidide yali sę tiwai gilama naga yalio.

²⁹Te silama nosali, Josua aga ami bidi dabe dali augwaligo te Makeda hanu tagalama, te Lipna hanuba pelama, tama augwaligo te hanude bidibo bidi dabe augwali dali hwįgi palio.

³⁰Tama Genuai Bidigo te Israel dabe augwali tau selama, tama augwaligo te boi bidi dabe augwali aiyaba elaluama, tama te hanu selama, te hanude bidali tuni bidi me pageabi yai. Tama Josuago te hanude bidali bidi tigidali ela silama, tama deli digi me bidibeo. Agai te tuni bidibolo te Jeriko tuni bidibolo yali kolesaga tiwai naga yai dao.