Joni 9:26-41

²⁶Fu ijiege kuariamoga bu kuae, Ro e ije fu irere rejae ro kuke fu izege remoga ni one ije fu una nafaemano kuae.

²⁷Ro fu una kiae, Na vua ije jane ude kuarievoga nane kuariae rove jaka naebe fie. Ja irerefuo una kuke fiekuae vierafe? Jabite jadua ja una e vua fuone fievo ije rekuae vierafevano kiae?

²⁸E ije fu vua ijiege kuariamoga buka uri madima areme kuae, Noeje no e Mosisido vua fievo ro are a e ijadufuo vua fiemono kuae.

²⁹No isuibe Godi fuka samadukua Mosisi kuaraema ije none vierafe. Rove no e ije a kuaemo ije fu izia ruaema ije noka naebe vierafevano kuae.

³⁰Bu ijiege kuaravoga e ije fu kiae, Vua ije ja kuaevo ije na fiega fuka oeseradie. Fu izia ruaema ije jaka naebe vierafe rove na vierafega ni none ige fune fure amaerijie.

³¹Ro kuke no vierafe Godi fu e ise renoejo ijiebuo vua ije fu fiemo baki. Ro fune e ije bu maza boeje fuone baname isoekinu ro irere fu vierafema ijia renoejo fu vua buone fiemo.

³²Ro iko zinume sakae ige amaeriva ijia ruoma iviama ige e be fu e ni kuzeki be amaeriamo fu una ni nafaema baki.

³³Ro e ije na kuaevo ije fu Godido ruaema bakibitie fu izege ire sumiki ijieki ije rekuma bakino kiae.

³⁴E ije una ni nafaema ije fu ijiege kuariamoga bu una kuae, E gure buka ise ijiakuma bieteva gure, A vierafe aka are no nijasuokiro vierafemano kuae? Areme e mamekanu ije bune ijiege madima areme ka mediruna dabe makave ijia akoevo fu are ije bu afuina vua kuaevo ije arena keke vae.

³⁵Areme rade Jesu fu izege e Jiusibuo e mamekanu bu e ije fu amaerima ije fuone reva ije fie. Ijadufuo fu e ije rerena bie areme kuae, Abe Ema igiebuo Fari ige na ma vierafemano kuae.

³⁶Ro e ije fu una kuae, A vierafega e ije erarega ni kuarie na fu ma vierafeno kuae.

³⁷Fu ijiege kuaramoga Jesu fu una kuae, E ije a gaema ije fure iviama igifure manina osiki vua kuaemono kuae.

³⁸Ijadufuo e ije fu uri Jesu auge sana kuri tuakafana kuae, E Ireobo, iviama nane a ma vierafevano kuae.

³⁹Ro Jesu fu una kuae, Na ume igia na ari ruaeva ije na e ige izege bu vierafekinu kenoejo ije ke mazie giakiro ruae. Na e ije bu Godido vame naebe gavo ije ifejiaga bu gake. Ro e ije bune gavono kuaevo ije buka una e ni kuzeki igege rekono kuae.

⁴⁰Jesu fu vua ijiege e ije kuaramoga e Feresi gue ijia ireva bu vua ije fie. Ijadufuo bu una Jesu kuae, A ijiege kuaedo nodua nobite no ni kuzekino kuae?

⁴¹Ro Jesu fu una kiae, Ja ni kuzebitie ja ise ije jabe renoedufuo. Rove ja kuae no ni mano kuaevo ijadufuo jaka uria ise renoejono kiae.