Joni 8:6-19

⁶Zamagra anagema hu'nazana Jisasi revatga hu'za naneke huntenaku, kema huntesaza agafa'a keza eri fore hunaku hu'naze. Hianagi Jisasi kepri huno azankonu mopare avon kre'ne.

⁷Hianagi zamagra kazigzi hu'za antahi'negageno, Jisasi otino amanage huno zamagrira zamasmi'ne, aza'o amu'nontamifi'ma kumi'a omne'nenimo, pusantera havea erino aheno.

⁸Ete pri huno mago'ane azankonu mopare avon kre'ne.

⁹Ana naneke zamagra nentahi'za, esera ranra vahe atirami'za nevzageno, ana amage'a magoke magoke'mo'za atirami'za vutere hu'za vuhna hzageno, Jisasi'ene ana a' ene znagrake anampina mani'na'e.

¹⁰Jisasi'a otino anage huno ana ara asmi'ne, kaheku'ma haza vahera iga vaze? Magora iza ke naneke hugantegahie?

¹¹Ana a'mo anage hu'ne, Ramoka mago'mo nanekea hunonante, anante Jisasi'a huno nagranena nanekea huogantegahue. Kagra nevunka, menintetira agafa hunka mago'ene kumira osuo.

¹²Anante Jisasi'a mago'ene anage huno zamasmi'ne, Nagra'ni'a ama mopamofo Msa mani'noe, aza'o namge'ma esimo'a hanimpina vano osugahie. Hianagi asimu eri Msa erigahie.

¹³Nehigeno Farisi vahe'mo'za anage hu'za asmi'naze, Kagrama kema nehanana, Kagra kagenke huama nehane, Kagrama huama nehanana tamagea nosane.

¹⁴Jisasi'a anankemofo nona'a amanage huno zamasmi'ne, e'ima Nagrama ke huama Nagragu'ma nehuana, Nagri nanekemo'a tamage, na'ankure Nagra igati e'na, ete'na iga vugahuo, Nagra antahi'noe, hianagi Nagra igati e'na, iga Nagra vugahuo tamagra ontahi'naze.

¹⁵Amega zamuzmate tamagra vahera refko nehaze, Nagra mago vahera menina refko nosue.

¹⁶Hianagi Nagrama mago'mofo refko huntegahue hanuana, Nagrama troma hanua antahi'zamo'a fatgo hugahie, na'ankure Nagrakera refko nosue, hianagi Nagrane hunantege'na e'noa Nenfa ene refko nehu'e.

¹⁷Tamagri kasegefina anage huno krente'ne, tare vahe tremoke ke'ne'na'a zankuma (witnes) hana'ana tamage. (Diu-Kas 17:6, 19:15)

¹⁸Nagra tamage ke huama Nagrani'agu nehugeno, hunantegena e'noa Nenfa'a Nagriku tamage huno huama nehie.

¹⁹Zamagra amanage hu'za asmi'naze, Negfa'a iga mani'ne? Jisasi'a kenona'a zamasmi'ne, Nagri'ma onage nesnutma Nenfana antahita keta osugahaze, hagi tamagra ma Nagri'ma nage'anke resuta, anahu kna hutma Nenfana kegahaze.