Joni 8:17-42

¹⁷Tamagri kasegefina anage huno krente'ne, tare vahe tremoke ke'ne'na'a zankuma (witnes) hana'ana tamage. (Diu-Kas 17:6, 19:15)

¹⁸Nagra tamage ke huama Nagrani'agu nehugeno, hunantegena e'noa Nenfa'a Nagriku tamage huno huama nehie.

¹⁹Zamagra amanage hu'za asmi'naze, Negfa'a iga mani'ne? Jisasi'a kenona'a zamasmi'ne, Nagri'ma onage nesnutma Nenfana antahita keta osugahaze, hagi tamagra ma Nagri'ma nage'anke resuta, anahu kna hutma Nenfana kegahaze.

²⁰Ama nanekema hu'neana ra mono nompi zgoma nentazare mani'neno, Jisasi'a rempi hunezmige'za mago'mo'a aze'ori'ne, na'ankure Agri kna'a ome'ne.

²¹Anante ete mago'ene anage huno zamasmi'ne, Nagra tmatre'na vnugeta Nagrikura hakregahaze, tamagra kumi tmifi frigahaze, Nagrama vnurega tamagra ovugosaze.

²²Jiu kva vahe'mo'za anage hu'naze, agrazante ahe fri'naku nehifi, Agra huno Nagrama vanurega, tamagra ovugahaze hunoma nehiana?

²³Jisasi anage huno zamasmi'ne, tamagra amafinti vahe mani'naze, Nagra anagamutire, tamagra ama mopafi vahe mani'naze, Nagra ama mopafi vahera omni'noe.

²⁴E'ina hu'negu, kumi'tamifi tamagra frigahaze hu'na Nagra neramasmue, na'ankure tamagra ma ama kema nehia Nera ama'ne, hutma tamentintima osnazana, tamagra kumi tamifi frigahaze. (Ekso-Uti 3:14, Jon 8:28, 8:58, 13:19, 18:5-8)

²⁵Zamagra anage hu'za Jisasina asmi'naze, Kagra izage? Jisasi'a anage huno zamasmi'ne, na'ane hu'na ese agafarera Nagra tmasami'noe?

²⁶Nagra rama'a zanku keaga nehu'na tamagrira refko hurmante'naku nehue. Hianagi hunantege'na e'nomo'a tamage Nere, Agripinti antahi'noa ke, Nagra ama mopafi vahera nezmasmue.

²⁷Nefanku Agra nehige'za zamagra antahi ama osu'naze.

²⁸Jisasi'a anage hu'ne, tamagrama Vahe'mofo Mofavrema azeri sgama hanutma, tamagra antahi ankeretma Agra ama ana Nere hugahaze, Nagra'ni'a nagesafintira nosuanki, Nenfa'ma rempi hunami'nea ke'age nehue.

²⁹Anumzamo hunantege'na e'nomo, Nagrane nemnie, Agra natrege'na Nagrakera nomanue. Na'ankure Nagrama, Agri avesizama huvava huazankura, Agra muse nehie.

³⁰Anagema nehige'za rama'a vahe'mo'za Agrite zamentinti hu'naze.

³¹Jisasi'a, Jiu vahe zamentinti hu'namokizmia amanage huno zamasmi'ne, Nanekeni'a miko knama erizafa huvava hanuta, tamagra Nagri namage ante disaipol naga manigahaze.

³²Ana nehutma tamagra tamage naneke antahisnageno, ana tamage nanekemo katufe tmantegahie.

³³Zamagra kenona'a anage hu'naze, tagra Abrahamu agehete, magore huta mago netera kazokzo eri'zana e'ori'none, Kagra nahigenka katufe tmantesageta amne vugahaze hunka nehane?

³⁴Jisasi'a anage huno zamasmi'ne, tamagerafa hu'na tamagrira nermasmue, maka kumi'ma nehza vahe'mo'za kumi'mofo kazokzo vahe mani'naze.

³⁵Kazokzo vahe'mo'a nompina manivava nosie, hanki mofavremoke nompina manivava nehie.

³⁶E'inahigu Nemofo'ma katufe tmantena knare hutma mani so'e hugahaze.

³⁷Nagra antahi'noe, tamagra Abrahamu ageheta mani'nazanagi' Nagri nahe frinaku kanku nehakaze, na'ankure Nagri nanekemo'a tamagri tamagu'afina omne'ne.

³⁸Nagrama kema nehuana, Nenfa'ene mani'nena ke'noa zanku neramasmue, tamagrama nehazana neramafampinti'ma antahinazaza nehaze.

³⁹Zamagra kenona'a Jisasina anage hu'za asmi'naze, Abrahamu'a tagri nerfa'e, Jisasi'a anage huno zamasmi'ne, a'o, tamagra ma Abrahamu mofavrema mani'nenutma Abrahamu hu'nesia avu'ava hugahaze.

⁴⁰Nagra tamage naneke Anumza'mofompinti antahi'noa ke neramasmue, hianagi Nagrira nahe'za nehaze. Abrahamu'a e'inahura osu'neaza tamagra hunaku nehaze.

⁴¹Tamagra neramafa avesiza nehaze. Zamagra kenona'a anage hu'naze, tagra savri avu'avatetira fore osu'none, tagrira magoke Nerfa, Anumzana Agrake mani'ne.

⁴²Jisasi'a anage huno zamagrira zamasmi'ne, Anumzamo'ma tmagri nerfa'ma mani'neasiana, tamagra Nagrira navesi nantasine, na'ankure Nagra efore hu'noana, Anumzamo hunantege'na e'noe. Nagrani'a navesitera ome'noe, hagi Anumzamo hunantege'na e'noe.