Joni 5:17-46

¹⁷Hianagi Agra zamasmino, Nenfa'a meninena eri'zana otreno e'neriankina, Nagra'nena eri'zana enerue.

¹⁸E'i ana agafare, Jiu kva vahe'mo'za Agri ahenaku mraguza'ati'za maka kanku hakre'naze. Na'ankure Agra mni fruhu kasege hantagia zantekukera ana osu'naze. Hagi Agra Anumzanku Nenfa'e nehuno, Agra Anumzane mago tragave hu'noe, hia zante'ene ahenaku hu'naze.

¹⁹E'inage hzageno Jisasi kenona zmirera amanage huno zamasmi'ne, Nagra tamagerafa hu'na neramasmue, Nemofo'a Agra'a avesitera mago'zana hugaosu'neankino, ke'nesigeno Nefa'ma huveri'nesia zanke, Nemofo'a anazanke hugahie.

²⁰Na'ankure Nenfa'a, Nemofona avesinenteno, Agra maka'zama nehia zana averi nehie. Ana nehuno Nefa'a agtereno tusi'aza averi hugahie. Anama hanigeta tamagra antri hugahaze.

²¹Na'ankure Nenfa'a fri' vahe'ma zamazeri otino, asimu nezmia kna huno, Nemofo'a azano, Agri'ma avesi'nimofona asimura amigahie.

²²Na'ankure Nenfa'a Agra veara refko osugahie. Hagi maka vahe'ma refko hu'zana, Nemofo ami'ne.

²³Ana hina maka'mo'za Nemofo agi'a erisaga hugahaze. Nefa agima erisaga nehza kna hu'za, aza'o Nemofo agima erisaga osnimo'a, huntegeno'ma e'nea Nefana, anazanke huno agi'a erisaga nosie.

²⁴Nagra tamage hu'na neramasmue, aza'o Nagri nanekema nentahino hunantege'na e'nomofonte amentinti hanimo'a, manivava asimu enerino, vahe'ma refko hania knafina, fri'zana agtereno asimu erino manigahie.

²⁵Nagra tamage hu'na neramasmue, knamo'a kofta huno ne-eno hago menina ama efore hu'ne, fri'naza vahe'mo'za Anumzamofo Ne' mofavremofo ageru nentahi'za, ana ageru'ma antahisnamo'za manigahaze.

²⁶Na'ankure Nefa'a asimu erino mani'zamofo agafa'a Agripi me'ne. Nemofona anahu kna huno asimu erino mani'zamofo agafa'a Agri ami'ne.

²⁷Ana nehuno Agra Nemofona kema hugnare hunte hanavea (atoriti) ami'neankino, vahe'ma refko hu'zana Agri ami'ne, na'ankure Agra Vahe'mofo Mofavre.

²⁸Ana kegura antria osiho, na'ankure mago knama fore'ma hina kerifi asezamante'naza vahe'mo'za Anumzamofo Mofavre'agerura antahi'za,

²⁹oti'za esnageno knare avu'ava hu'nesaza nagamo'za, oti'za ksefa mani'za erigahaze. Hagi kefo avu'avazampi mani'ne'za fri'ne hanamokizmia, refako huno naneke huzmantegahie.

³⁰Nagra navesitera mago'azana osugahue. Anumzamofo ke nentahi'na anante zganena refko nehue. Ana kema refko'ma huana mago kante ante'na nezganoe. Na'ankure Nagra navesi'zantera kenontoe, hagi Agrama hunantege'na e'nomofo avesite refkoa nehue.

³¹Nagrama, tamage nehue hu'na Nagrani'agu huama hanuana, Nagra havige hugahue.

³²Hianagi Nagri nagenkema rumo huama (testimoni) nehige'na, Agrama Nagriku huama hianke nentahi'na, tamage nehie hu'na nehue.

³³Tamagra Joninte vahe huzmantage'za ome antahi'nazana, Joni'a tamage nanekege huzmasmi'ne.

³⁴Hu'neanagi Nagrama hua kema e'neruana, mopafi vahepintira e'norue. Hianagi Nagrama nehuana tmagri'ma tmaza hanigu nehue.

³⁵Joni'a lampe tvi kna huno tvi'nereno remsa hurmantegeta, ana tvi'kura osasi'a knafi tmagu'a musena hu'naze.

³⁶Hianagi Nagrama hanua navu'navamo'a, Joni'ma hu'nea avu'avazana agtere'ne. Na'ankure Nenfa'ma nami'nea eri'za Nagra eri vgaresnugu e'nerue, ana eri'zama e'nerua eri'zamo, Nagrira eriama hugahie, na'ankure Nfa'nimo hunantege'na e'noe.

³⁷Nenfa'ma hunantege'na Nagrama e'noana, Nagriku huama Agra hu'ne. Hianagi tamagra mago'a knarera Agri agerura ontahitma, avugosa onke'naze.

³⁸Agri nanekemo'a tamagri tamagu'afina omne'ne, na'ankure Agrama hunantege'na Nagrama e'nogura, tamagra tamentintia Agritera nosaze.

³⁹Tamagra Anumzamofo avontafepi nehakraze, na'ankure tamagra mani'vava mani'zana hago eri'none hutma nentahize. Hianagi e'i ana avontafemo'a Nagriku huama nehie.

⁴⁰Hianagi Nagrite'ma e'netma tmasimu eri'zankura tamagrira tamavesra nehie.

⁴¹Nagrira vahe'mo'za nagi erisaga (glori) hihogura nosue.

⁴²Hianagi Nagra tamagrira tamage'noe, Anumzamofo avesinte'zana tamagri tamagu'afina omne'ne.

⁴³Nagra, Nenfa agifi e'nogeta tamagra nonavraze, hagi mago'mo agra agire'ma esnimofona ame huta avregahaze.

⁴⁴Tamagra inankna huta tamentintia hugahaze, tamagri'ma ru vahe'mo'za tmagima erisaga nehazana, magoke Anumzamo tmagri'ma muse hurmante'sia zankura ohakre'gahazo?

⁴⁵Nefante naneke hurantegahie hutma Nagrikura tamagesa ontahiho, kema hurmantesia nera Mosese'e, Mosesete tamagu'a antetma tamentintina hu'naze.

⁴⁶Hianagi tamagrama tamage hutma Mosesente'ma tamentinti hunetasina, Nagrite ene tamentinti hazasine, na'ankure agrama kre'neana, Nagriku huno kre'ne.