Joni 21:5-23

⁵Anante Jisasi zamasmi'ne, Mofavre nagare tamagra nozamea avazu osu'naze, tamageo? Huno zamantahigege'za, zamagra ke nona'a izo avazu osu'none, hu'za hu'naze.

⁶Agra zamasmino, kukon tmia eritma ventemofo tmaga kazigati omo atretma, mago'a nozamea avazu hugahaze. Hige'za ana kukoma atrete'za, avazu hu'zanku kasgeke hu'naze, na'ankure rama'a nozamemo ana kukompi frevitege'za ana hu'naze.

⁷Jisasi'ma avesi nentea disaipol ne'mo Pitanku anage hu'ne, antu e'i Ramo'e! Saimon Pita'ma antahiama Rane higeno'a, amega kukena'a eri hankre'ne, (na'ankure timpi eri'za erinaku agra atova hutre'nereti ana hu'ne), timpi tkaureno nagosa runo ti ankenarega vu'ne.

⁸Hianagi mago'a amage' nentaza disaipol naga'mo'za osi ventefi e'naze, na'ankure mopa afete'are omne'negeze. Hagi 100ti'a mita zaza'a hu'nege'za nozame zgamo avi'ma te'nea kukona avazu huzma e'naze.

⁹Zamagrama tinkenare e'za eme kazana tanknuza (sakol) teve hegre'nare, mago nozamene, breti'ne ana tevere menege'za ome ke'naze.

¹⁰Jisasi, zamagriku huno, Menima azeri'za nozamefinti mago'a eritma eho.

¹¹Higeno Saimon Pita'a ventefi mrerino ana kukona avazu huno tinkenare e'ne. Ranra nozamea 153'amo avite'ne, mago'a rama'a nozamemo kukompina ufre'neanagi, ana kukona tagato osu'ne.

¹²Jisasi'a zamagriku anage hu'ne, Eta nantera ne'za eme neho. Hianangi amage' nentaza disaipol nagapinti mago'mo, Kagra azage, hu'za antahige'zankura koro hu'naze, na'ankure zamagra Rane hu'za ko antahi'naze.

¹³Jisasi eno breti emerino zamagrira nezmino, nozamea anazanke huno zami'ne.

¹⁴Fri'nefinti Jisasi'ma otino zameri'neana, tagufa (3) zupa amate efore huzmerige'za amage' nentaza disaipol naga'mo'za ke'naze.

¹⁵Nantera ne'zama nehna hutageno, Jisasi'a Saimon Pitanku huno, Saimon, Joni nemofoga, kagra ama vahe'zga zamagterenka Nagrikura kvesinenantampi? Huno antahi'gegeno, Ozo Ramoka, Kagra antahi'nane, nagra navesi negantoe. Jisasi'a asmino, sipisipi nagani'a ne'za zamio.

¹⁶Jisasi'a tare zupa mago'ene asmi'ne, Saimoni, Joni nemofoga, Nagrikura kve'nesio? Ozo, Ramoka, Kagra antahi'nane nagra Kagrira navesi negantoe, Jisasi agriku hu'ne, Sipisipi zga'ni'a kegva huo.

¹⁷Jisasi'a tagufa zupa ana kege huno asmi'ne, Saimon, Joni nemofoga, Nagrikura kvesi nenantano? Higeno Pita'a arimpa kna hu'ne, na'ankure tagufa zupama Nagrikura kve'nesio? Huno antahigea zankure. Pita'a Agriku hu'ne, Ramoka, Kagra maka'zana antahi'nane. Nagrama navesi negantoana Kagra antahi'nane. Higeno Jisasi ke nona'a asmino, Sipisipi zga'ni'a ne'zana zamio hu'ne.

¹⁸Tmagerfa hu'na negasmue, Kagrama kahefa'ma mani'nantera kenakarera kamu'nofi hunka kvesi'zante kana vano hu'nane, hianagi ranafa resunka, kzana rutaresanke'za rumo'za kagrira kukena hugante'za, ovuku hanantega kavare'za vugahaze.

¹⁹(Menima Jisasi'ma hu'neana, Pitama henka frino Anumzamofoma ra agi ami'nia zanku huama hu'ne.) Ana kema Agra huteno, Jisasi'a Pita asmino, Namage anto! Huno asmi'ne.

²⁰Pita'a rukrahe huno keana, Jisasi avesi avesi hunentegeno amage' nentea disaipoli ne'mo znavaririno e'ne. Ana nera Jisasi ahihi'zafi umase tragoteno ne'zama nenafima antahigeno, Ramoke, iza Kagrira vahe zamazampina kazerino antegahie? Huno antahige'nea ne' e'ne.

²¹Pita'ma ana ne' negeno'a, Jisasina antahige'ne, Ramoke, ama nera nankna hugahie?

²²Jisasi ke nona'a agri asmino, Nagrama, Agriku mani'nesige'na ete'na esuema hanua knarera, kagri'zana omne'neanki, na'ane hugahane? Kagra namage anto!

²³Higeno anama hu'nea kemo'a Jisasinte zamentinti nehaza nagate vuno eno higeno, ama'na disaipol nera ofrigahie hu'naze. Hianagi Jisasi'a, agrikura ofrigahie huno osu'ne, hianagi frisio manisio Nagrama mani'nesigena e'tena esue hanuazamo'a kagri'zana omne'neanki, na'ane hugahane? huno hu'ne.