Joni 21:13-25

¹³Areme Jesu fune uri burete ije abe tuasema areme kijume ije dabe buvuana ijiakuma ivajiae.

¹⁴Ro Jesu fu baronena una urima ije fu ude maza inokiro e vua fuone fievo ije biediae. Ro fu una kuke ige biediamo bu gae.

¹⁵Ijiege rena bune kari ire inama furinoga Jesu fu uri Saemoni Fita kuae, Saemoni e Jonido fari gure, a vierafe one a na oetuamo ije fube e gure gue bu na oetuavo ije asidiaemano kuae? Ro Saemoni Fita fu una kuae, E Ireobo izege na a oetuavo ije ane giena vierafemano kuae. Fu ijiege kuamoga Jesu una kuae, Ni mave-sifi none ije mukoreigia samuagiaejieno kuae.

¹⁶Areme Jesu una kuke kuae, Saemoni Fita e Jonido fari gure abe na mukoe oetuamo ke a bakino kuae? Ro Saemoni Fita fu una kuae, E Ireobo none na a oetuavo ije ane giena vierafemano kuae. Rove Jesu una kuae, Mave-sifi none ije mukoreigia samuagiaejieno kuae.

¹⁷Areme Jesu fu una maza radekuma ije kuae, Saemoni Fita e Jonido fari gure abe na mukoe oetuamo ke a bakino kuae? Jesu fu ijiege kuaramoga Fita fu vua ije fiemo fuka oefiae. Ijadufuo maeje Jesu fu maza inokubeke kuae, Abe na oetuaemano kuaema ijadufuo fu oefiae. Ijadufuo Fita fu una kuae, E Ireobo none a ire boeje ane giana vierafemo. Ijadufuo a izege na a oetuavo ije ane samadukua giena vierafemano kuae. Saemoni Fita fu ijiege kuamoga Jesu fu una kuae, Mave-sifi none ije mukore igia samuagiajiene.

¹⁸Ro igia fie, a uria e nikaki ije aka kekena are iziebure a oenoekiro vierafemo a ijia oenoene. Rove a vakuma eoradamo ije buka e be umui one kame kiriaejana mesira are ije a naebe ijia oenoekiro vierafema ijia vakono kuae.

¹⁹Jesu vua ije fu ijiege kuaraema ije fu Saemoni Fita fu rade izege isejavaena baronega e bu ijia Godido ive dabe aroena nidoedufuo fu ijadufuo kuarae. Areme fu una Saemoni Fita kuae, Ni urina makae none ijia nuvediena na kenoeva ijiege kenoeno kuae.

²⁰Areme Saemoni Fita fu dakude gake e Jesudo vua fiemo be fu oetuamo ije fu rade nuve romoga fu gae. (Ro e ije fu ude bu Jesuna muge radekuma ijia ire ivo fu tuana Jesudo bijuakinu kuae, E Ireobo e ije erare a abena una e ani ije miakuveno kuaema ijare?)

²¹Ijadufuo fu una Jesu kuae, E Ireobo ro e game ruomo ije fuje fu izege rekono kuae?

²²Ro Jesu fu una kuae, Fuje na ivia kuako a ni uria igia oenoeke na una rono kuaebitie na ijiege reke. Ro a irerefuo ije dabe ireobo vierafeme? Ijiege a vierafemo ije arekiro uri makae none ijia nuvediena ige na kenoejo ijiege kenoeno kuae.

²³Fu ijiege kuaramoga e Jesu ma vierafevo bu vua ije e Jesudo vua fiemo be fube baronedufuo fu kuaema ije fie. Rove Jesu fu naebe kuae e ije fube baronekiro fu ijia fivakono kuae. Ro fume kuae, Na vierafe fu ijia ni uria fike na una ruakuvabitie na ijiege reke ro a irerefuo ije abe ireobo vierafemono kuae?

²⁴E Jesudo vua fiemo be ije fu kuaema ije fu noesina kuae. Nare ire boeje Jesu fu remo na giakinu fieva ijene buki igia isoe ijadufuo vua boeje buka ma.

²⁵Ro Jesu fu kuke ire ka ma uruvana binodua rei. Rove na ire boeje fu renoema ije buki igia isoebitie na izege isoe furikuva baki. Ro kuke e ume igia oenoeva bu izege vua boeje mukoreigia dana vierafekuva baki.