Joni 20:6-21

⁶Anante Saimon Pita'a amage'a ne-ereti ehnatino ana havegampi evumareri'ne, marerino ome keana avufare karagi'naza tavrave anantera me'negeno ke'ne,

⁷avugosafi tavravene Jisasi anunte karaginte'naza tavravene, avufare karaginte'naza tavravenena, omne'negeno ke'ne. Hianagi avugosafi tavravea regazri'za rure antageno me'negeno ke'ne.

⁸Anante amage nentea disaipoli ne'ma ese'ma kerire ehanati'nemo, mrerino ome negeno tamage huno amentinti hu'ne.

⁹Na'ankure Anumzamofo avontafepima Jisasi friteno otigahie hu'naza nanekea, zamagra antahi ani osune'za ana hu'naze.

¹⁰Ana huteke tarega amage' nenta'a disaipol ne'tremoke, noznirega atre'ne vu'na'e.

¹¹Hianagi Maria'a fegi'a ana havegante oti'neno zvi neteno mani'ne. Zavi netereti pri huno ana have kamofo agu'afinka keana,

¹²tare ankero netremoke efe kukena hute'ne mani'nakeno, Jisasima antemse'nare znage'ne, mago'mo agama me'nea kaziga manigeno, mago'mo asenima me'nea kaziga manigeno hu'na'e.

¹³Znagra ana a'mofonku amanage hu'na'e, Ama a'moka na'anku zvira netane? Maria ke nonaznire huno, na'ankure Ranimofona inantega eri'za vu'nazo, inantega ante'nazo nagra ontahi'noe.

¹⁴Anagema a'mo huteno rukrahe'ma hiana, Jisasi anante oti'negeno keanagi, Jisasi'e huno ontahi'ne.

¹⁵Jisasi ana a'ku huno, A'moka na'anku zavira netane? Azanku nehakrane? Na'ankure ana a'mo antahiana hoza kva nehia nere nehuno Agriku hu'ne, Kva vahe'moka, Jisasina inante ome ante'nampi naveri hananke'na Agrira ome eri'na vugahue

¹⁶Jisasi ana a'ku hu'ne, Maria! Higeno a'mo rukrehe huno Jisasinku Hibru kefinti, Rabonai! (ana kemofo agafa'a Hibru kefina Hurami ne're) hu'ne.

¹⁷Jisasi'a ke nona'a huno, Nagrira eme navako osuo, na'ankure Nenfantega mreori'noe, hianagi vunka nafu'heina ome zamasmio, Nagri'ene tmagri'ene Nerfante, Nagra mrerigahue. Nagri Anumzane tmagri Anumza mani'nerega, vugahie hunka ome zamasmio,

¹⁸Magdala kumateti Maria'a ete rukrahe huno eazamo, amage' nentaza disaipol naga'a eme zamasmino, Nagra Rantimofona ke'noe! Ana a'mo Jisasi'ma hu'nea ke eme zamasmi'ne.

¹⁹Ana zupa kinaga, eri'za knamofona ese zupa Sonta, haninkige'za amage nentaza disaipol naga'mo'za Jiu kva vaheku zamagoro hu'za kafa eri ki'za no agu'afi mani'nageno, Jisasi eazamo amu'nozmifi eme otino zamagriku anage hu'ne, Tamarimpamo fru hino, huno zamasmi'ne.

²⁰Anagema Agra huvgareteno, tarega azane, ratimpa avufane zamaveri higeza nege'za amage' nentaza disaipol nagamo'za, Rantie hu'za muse hu'naze.

²¹Ru'ene Jisasi zamasmi'ne, Tamarimpamo fru hino, Nenfa hunantege'na e'noaza hu'na, Nagra anazanke hu'na huneramantoe.