Joni 19:5-31

⁵Anante Jisasina ave'ave nofite fetori'ene, koranke kukena antani antetageno, atiramino e'ne. Paeroti'a anage hu'ne, Keho, ama Nera!

⁶Vugote'naza pris vahe'ene, mono no kegva nehza vahe'mo'za (gad) Agri'ma nege'za amanage hu'za kezati'naze, aheta hantiho, aheta hantiho! Hzageno Paeroti'a zamasmi'ne, Tamagratmi avretma rugeka zafare ome aheho, na'ankure nagra mago hazenke'a omne'nege'na negoe, huno zamasmi'ne.

⁷Jiu kva vahe'mo'za ke nona'a amanage hu'naze, Tagrira kasegetia me'ne, hagi ana kase kemofo amage' anteno Agra frigahie. Na'ankure Agra Anumzamofo Ne'mofavre mani'noe huno hu'ne.

⁸Ana kema Paeroti'a nentahino, tusiza huno agra mago'ene amanogura hu'ne.

⁹Eteno Paeroti'a kuma'afi ufreno, Jisasinku anage hu'ne, Kagra igati e'nane? Hianagi Jisasi'a magore huno agri kenona'a osu'ne.

¹⁰Ke osigeno, Paeroti'a anage huno asmi'ne, kema hunami'zankura nahigeno kave nosie? Kagra ontahi'nano, Kagri'ma katufe katre hanavene, rugeka zafare kahena hanti hanavema nagrama eri'noana?

¹¹Jisasi ke nona'a asmi'ne, Kagra Anumzamoma hanavema onkamiasina, Nagri'ma kegva hunantega hanavea e'orintesine, hagi monafinkati ne'mo hanigenka anara hugahane. Na'ankure navreno kzampima eme ante'nemo'a, kagrira kagatereno tusi'a kumi hu'ne.

¹²Ana kema antahiteno'a Paeroti'a aza huno katufe atrenaku tusiza huno agesa antahi'ne. Hianagi Jiu kva vahe'mo'za kezati'za, kagrama ama ne'ma katufe atresunka, kagra Sisa knampa omni'nane! Mago'mo kini manigahue hanimo'a, Sisana ha' rentegahie.

¹³Paeroti'a ana kema haza nentahino, Jisasi avare fegi'a atreno naneke fgagohu trate umani'ne, ana kumamofo agi'a, Havereti simeni hunte'naza kumare nehaze, hagi Hibru/Arami kefina, Gabate hu'za nehaze.

¹⁴Jiu vahe'mo'za kinafinti zamare'nea knagu antahimiza nenaza (Pasova) ne'za retro tra hunaku nehzageno, zgemo'a feru asegeno Paeroti'a Jiu vaheku huno, Keho, ama tamagri Kinia!

¹⁵Anagema hige'za kezanke hu'za, Avretma viho, avretma viho, Agrira ahetma hantiho! Nehzageno Paeroti'a zamantahige'ne, Nagra, tamagri Kinia ahena hantisuo? Hige'za pris vahe'mo'za ke nona'a hu'za, Tagri kinia magora omni'neanki, Sisa agrake mani'ne.

¹⁶Anagema hzageno Paeroti'a Jisasina ahe'zama keka zafare hantihogu zamige'za Jisasina azeri'naze.

¹⁷Anante Jisasi'a keka zafa'a erino, vahe anu zaferine nehaza mopare, Hibru kefina Golgote nehazare erino vu'ne.

¹⁸E'i anante Jisasina nehe'za, tare netrena ruga raga asopare znahe'za rugeka zafare nehanti'za, Agrira amu'nompi hanti'naze.

¹⁹Paeroti'a mago avona kreno, ana keka zafare hanti'ne. Anage huno kre'ne, JISASI'A NAZARETI NERE, JIU VAHE'MOKIZMI KINIE.

²⁰Huno krente'nege'za hakare Jiu vahe'mo'za hampri'za ke'naze. Na'ankure Jisasima ahe'za hanti'naza mopa, rankuma tva'onte me'ne, ana kema krente'neana Hibru kefine, Latini kefine, Griki kefima huno ana avona krentene.

²¹Anante Jiu vahe'mokizmi vugota pris vahe'mo'za Paerotina asmi'za, Jiu vahe'mokizmi Kinie hunka onkrenka, hagi Agra'a huno, Nagra Jiu vahe'mokizmi Kinie huno hu'ne hunka kro hu'za asmi'naze.

²²Paeroti'a ke nonazmire zamasmino, Inankna keo nagrama krente'noana hago krente'noe.

²³Anante sondia vahe'mo'za, Jisasi rugeka zafare ahe'za hantite'za, amegati kukena'a eri refko hu'za 4'a kevu ante'naze, mago'mo mago kevu eritere hu'are, avate kukena'ama hati'nazana eri mago hu'za anagamuti hati'za fenkamu urami'naze.

²⁴Hige'za sondia vahe'mo'za ke hugantu hugma hu'za, erisagnera osinkero, hagi satu zokago reta kesune, aza erisifi, e'i ana kemo Anumzamofo avon tafe'mo hu'nea ke eriama hu'ne, Zamagra amega kena'ni'a amu'no zamifi fagago hu'za eri'naze, zamagra nagri kenarera, taisi zokago re'naze. (Sam-Zga 22:18) Anama kre'naza kante anteza sondi'a vahe'mo'za ana kemofo eri knare hu'naze.

²⁵Hianagi Jisasi ahe'za hanti'naza keka zafamofo agafafina, Agri nereraki, nererana nenunknaki, Klopas nenaro Mariaki, Magdala kumateti Mariaki hu'za oti'naze.

²⁶Nerera'ene, amage' nentegeno avesi nentea disaipoli ne' ene anante oti'nakeno Jisasi'ma neznageno'a, Agra nereranku huno, A'moka ko, ama'ne kagri ne'mofavrea!

²⁷Anante amage' nentea disaipoli neku hu'ne, Ko, kagri negrera'a ama'ne! Ana knareti agafa huno amage' nentea disaipoli ne'mo ana ara avreno noma'are vu'ne.

²⁸Anama huteno'a, Jisasi antahino keno hiama maka'zamo hago vgaregeno, Anumzamofo avontafemo hu'nea kea eriknare huteno, tinku navenesie, huno hu'ne. (Sam-Zga 69:21)

²⁹Mago mopa kavofi akake waini ti aviteno anante menege'za, kapuki eri'za hisopu zafare anakite'za, ana aka waini timpi rete'za (spons) erisaga hu'za agite ante'naze.

³⁰Ana hzageno Jisasi'ma ana akake waini tima neteno'a, Agra hu'ne, Ha vgare! nehuno Agra kepri huno avamu'a atre'ne.

³¹Anante retrotra huknazmi me'negu hu'za, mni fruhu kna (sabat) efregahianki rugeka zafare kerfa'a omnesie hu'naze, (na'ankure kinafinti zamavre'nea knagu antahimiza ne'za nenaza knane, mni fruhu (sabat) knanena magoka ra kna'zmi me'negu hu'za,) Jiu kva vahe'mo'za huza, zamagia ru hantagi tenketa, anante fri kerfa eri mopafi atreta, erita vamneno hu'za Paeroti antahige'naze.