Jone 9:14-23

¹⁴Jisasame yuu mendatupa mandau minatala akali dokonya lenge auu pyakamaiyamo gii doko Sambasa mendenya pia.

¹⁵Dokopa Patasi dupame apata baa pisoo, “Embanya lenge aipa petala talepe?” leami-pyaa. Dokopa baame dokaitanya pii yanu pyakamaiyoo, “Baame yuu mendatupa mandau minatala nambanya lengenya katatakamopa, nambame wasawasa pyanya nepatapu dokopa namba lenge talona,” lea-pyaa.

¹⁶Dopa leamopa Patasi yangi dupame lao pituu, “Doko baame Sambasanya mana setapae doko watao naminalumuna, akali doko Goteme epena laa naya lumuna,” leami-pyaa. Dokopa akali yangi mendapuame lao pituu, “Akali koo pingi mendeme kapa pao kongali tata opale pipyalipi?” leami-pyaa. Dopa lalya lana petala endakali dupa wakale pyoloo piami-pyaa.

¹⁷Dopa petala Patasi dokaitame akali lenge monda doko deaka pisoo, “Baame embanya lenge tasakalamo dokonya embame baa kandao aipa leepe?” leami-pyaa. Dokopa baame lao pituu, “Baa potopesa mendena,” lea-pyaa.

¹⁸Akali wamba lenge monda katenge indupa dee lenge teamo doko Juta dupame masala naenya, baanya endangi takangepa dolapo epena leami-pyaa.

¹⁹Endangi takangepa dolapo ipateambino dokopa dokaitame dolapo pisoo, “Nyalambonya ikiningi dake wamba lenge monda jetae mandeambana lalambino dokope? Doko, indupa aipa petala lenge telyape?” leami-pyaa.

²⁰Dokopa endangi takangepa dolapome yanu pyao, “Baa nalimbanya wane lenge monda jetae mandeambano doko masilyambano.

²¹Dopaka doko, baanya lenge dolapo aipa petala talape dee apimi lenge tasalape ongo nalimba masala naelyambanona, nyakamame baa pisalapa. Baa akali angina, tangeme laapomona,” leambi-pyaa.

²²Endangi takangepa dolapome pii dutupa leambino doko, Juta dupa paka kayapala leambi-pyaa. Endakali mendeme Jisasa doko Kataisana lao lao panatamo doko Juta dupame nyakamanya losuu anda dokonya watao pyatamana lanya seteami.

²³Tenge dokonya minao, endangi takangepa dolapome, “Baa akali angina, nyakamame baa pisalapa,” leambi-pyaa.