Jone 8:19-58

¹⁹Dupame baa pisoo, “Embanya takange doko anja kalyape?” leami. Jisasame yanu pyao, “Nyakamame nambapa nambanya Takangepa nakandelyamino. Nyakamame namba kandamili kandao doko, nambanya Takange doko kandapimiliakana,” lea.

²⁰Baame losuu anda andake dokonya muni pyasingima penge singi dosa katao pii dutupa mana lamaiyoo lea. Baanya gii doko ipatala nayamo dokonya endakali mendeme baa anjala nayami.

²¹Baame deaka dokaita lamaiyoo, “Namba patopa nyakamame namba kutatamiaka doko, nyakamanya koo doko sepeta kumatami. Namba pato yuu dokonya kapa pao naipatamina,” lea.

²²Dokopa Juta dupame lao pituu, “‘Namba pato dokonya nyakama kapa pao naipatamina,’ lelyamo doko baame baa tange pyao kumasalanya lelya kanjemape?” leami.

²³Baame dokaita lamaiyoo, “Nyakama isa tange. Namba kisa tange. Namba yuu dakenya endakali mende daa. Nyakama yuu dakenya endakali.

²⁴Tenge dokonya nambame nyakamanya koo doko sepeta kumatamina lao langyo. Nyakamame namba akali dokona lao masoo minala nayatamino kandao doko, nyakama nyakamanya koo doko sepeta kumatamina,” lea.

²⁵Dupame baa lamaiyoo, “Emba apipi?” leami. Jisasame dokaita lamaiyoo, “Namba nambana lao nyakama tee pyao langio doko.

²⁶Dopana, nambame nyakama kandao pii longo lao yapato silyamo. Dopaka doko, namba puu leamo dokome kiningi pii leamopa sio dupaka nambame yuunya endakali dupa lamaingina,” lea.

²⁷Baame Takange lao leamopa dupame nasiami.

²⁸Dokopa Jisasame dokaita lamaiyoo, “Nyakamame Endakalinya Ikiningi doko minalyetamino dokopa nyakamame namba akali doko lamo lao kandatami. Dee nambame pilyo dupa namba tangeme masoo napii lamo lao kandatami. Nambame pii lenge dupa nambanya Takangeme mana langiamoli pyoo lenge.

²⁹Dee namba puu leamo doko nambapa tole katenge. Baame namba iki kalyale lao yakinala naenge. Doko, nambame koteaka lao baame masilyamoli pyoo pingina,” lea.

³⁰Baame dopa leamopa endakali longome baa lao masoo miniami.

³¹Dokopa Jisasame Juta endakali baa lao masoo minateamino dupa lamaiyoo, “Nyakama nambanya pii dokonya ketae katatamino kandao doko, nyakama nambanya disaipele angi joo katatami.

³²Nyakamame kiningi pii doko masetaminopa kiningi pii dokome nyakama mokao nyetana,” lea.

³³Dokaitame yanu pyao, “Naima Apotakame puunya mandipae kalyamanona, paa mendaipi mende naima mendenya kendemane pyoo anjetae nakatengena, aipa pyoo embame naima mokao nyetana leepe?” leami.

³⁴Jisasame yanu pyao, “Nambame nyakama etete kiningi langilyona, koo pingi endakali doko pitaka koonya kendemane.

³⁵Kendemane doko baanya akali andake dokonya palu joo etete nakatenge. Ikiningi doko baanya palu dupa-pipa etete katenge.

³⁶Dopana, Ikiningi dokome nyakama mokao nyetamo kandao doko, nyakama etete mokao nyepae katatami.

³⁷Nambame nyakama Apotakame puunya mandipaena lao masilyoaka doko, nambanya pii doko nyakama-kisa nasipya dokome nyakamame namba pyalanya pilyamino.

³⁸Nambame nambanya Takangepa tole katao pituu kandeo dupa lelyo. Dopaka doko, nyakamame nyakamanya takangenya mana siami dupa minilyamino,” lea.

³⁹Dupame yanu pyao, “Naimanya takange doko Apotakamena,” leami. Dopa leaminopa Jisasame dokaita lamaiyoo, “Nyakama Apotakamenya mandipae pili kandao doko, Apotakameme piamoli pipimili.

⁴⁰Dopaka doko, nambame Gote-kisa pii nyio dupa kiningi nyakama langipu dokopa indupa nyakamame namba pyalanya pilyamino. Apotakameme dopa napia.

⁴¹Nyakamame nyakamanya takangenya mana dupa watao minilyaminona,” lea. Dupame yanu pyao, “Naima kepo pyoo mandipaepi mende nakalyamanona, naimanya takange mendai kalyamo doko Gotena,” leami.

⁴²Dokopa Jisasame dokaita lamaiyoo, “Gote nyakamanya takange pili kandao doko, nyakamame namba auu kayapimili. Doko, namba Takangepa tole katao ipao kalyo. Baame puu leamopa epeona, namba tangeme masoo naepeo.

⁴³Aipuma nyakamame nambanya pii lelyo doko masala naelyamipi? Nyakamame nambanya pii doko kapa pao nasepengema dokome masala naelyamino.

⁴⁴Nyakamanya takange doko Satane. Nyakamame nyakamanya takange dokome auu kaengeli pyoo pipuma laka lao masilyamino. Baa endakali pyao kumasingi akali mende wamba tee piamo dokopa katea. Baame kiningi pii doko lao nakatenge. Doko, baame kiningi pii lenge mana doko minala naenge. Baame sambo pii lelyamo doko baanya monanya palelya doko lenge. Baa sambo lenge akali. Baa sambo piinya tenge.

⁴⁵Dopaka doko, nambame kiningi pii langipupa nyakamame namba lao masoo minala naelyamino.

⁴⁶Nyakamanya akali apimi namba-kisa koo seta mende lao panasetamipi? Nambame kiningi pii langito kandao doko, aipuma nyakamame namba lao masoo minala naelyamipi?

⁴⁷Gotenya mandipae dokome Gotenya pii singina, nyakama Gotenya mandipae daa dokomena, baanya pii nasilyaminona,” Jisasame lea.

⁴⁸Juta dupame Jisasanya pii yanu pyao, “Naimame emba kandao emba akali Samatia mendena, dee emba-kisa enjele koo mende palelyamona lelyamano doko kopeta lelyamape?” leami.

⁴⁹Jisasame yanu pyao, “Namba-kisa enjele koo mende napalelyamo, daa. Dopaka doko, nambame nambanya Takange lao tama pipupa nyakamame namba lao tama pyaa naelyamino.

⁵⁰Nambame namba tange lalyalanya pyoo nakalyo. Mendeme namba yapao nyepala lalyalanya pilyamo.

⁵¹Nambame nyakama etete kiningi langilyona, endakali mendeme nambanya pii doko watao minatamo kandao doko, baa tendapi kumala nayatana,” lea.

⁵²Dopa leamopa Juta dupame baa lamaiyoo, “Indupa naimame emba-kisa enjele koo mende palelyame lamo lao kandelyamano. Apotakame kumata potopesa dupa kumata piamina, dee embame lao pituu, ‘Endakali mendeme nambanya pii doko watao minatamo kandao doko, tendapi kumala nayatana,’ leeno.

⁵³Dopa leeno doko embame naimanya yumbange Apotakame ita minao kalyepe? Apotakame kumata dee potopesa dupa kumata piamina embame emba tange apina lao masoo leepe?” leami.

⁵⁴Dopa leaminopa Jisasame yanu pyao, “Nambame namba tange lalyoto doko angi mende nanjeta. Nambanya Takange nyakamame nyakamanya Gotena lengema dokome namba lalyingi.

⁵⁵Nyakamame baa nakandengemaka doko, nambame baa kandenge. Nambame baa nakandengena lapuli kandao doko, namba sambo lenge nyakama yale joo katapuli. Dopaka doko, nambame baa kandatala baanya pii doko watao miningi.

⁵⁶Nyakamanya yumbange Apotakameme namba ipatena lapae doko sepala baa mona yapepao auu kayana,” Jisasame lea.

⁵⁷Dopa leamopa Juta dupame baa lamaiyoo, “Embanya ee kana kingi ita yuungi patala naelyamo doko, embame aipa petala Apotakame kandeepe?” leami.

⁵⁸Jisasame dokaita lamaiyoo, “Nambame nyakama etete kiningi langilyona, Apotakame manja naengesa namba kateo doko kalyona,” lea.