Jone 8:1-14

¹Endakali dupa pitaka mendai mendai lao nyakamanya andaka peami. Dopaka doko, Jisasa baa Olipimanda yuu dokonya pea.

²Yongama wamba utunya Jisasa baa losuu anda andake dokonya dee ipao katea. Dokopa endakali dupa pitaka baa kateasa epeaminopa baame pitipala mana lamaiya.

³Mana setapae masingi akalipi Patasipi dupame enda mendeme akali kepo piamo kandatala laminao baa peteasa ipupala kaina dokonya katena leami.

⁴Dupame Jisasa lamaiyoo, “Mana Lenge Akali, enda dakeme akali kepo pyoo palipumu kanjimini lamo.

⁵Moseseme pepa piamo dupanya naima langyuu, ‘Enda dopale dupa kaname pyao kumasalapape,’ leana, indupa embame aipa leepe?” leami.

⁶Dupame dopa lao pisiamino doko, baa kosimi laanya makande pyoo leami. Dopa leaminoaka doko, Jisasame pongatala kingi kondeme yuunya pepa pia.

⁷Dupame baa mee pisoaka kateaminopa baame sakatatala dokaita lamaiyoo, “Nyakamanya koo napingi katatami mendeme enda dake kaname wambao pyalapa,” lea.

⁸Baame dopa latala deaka pongatala yuunya pepa pia.

⁹Baame dopa leamo doko sepala dupa mendai mendai lao kolao peami. Lyanga dupa wambao kolao peaminopa Jisasapa enda kainanya kateamo dokopa iki kateambi.

¹⁰Jisasame sakatatala enda doko pisoo, “Enda dake, dokaita anja kalyamipi? Mendeme emba kosimi laanya nakalyape? lea.

¹¹Dokopa enda dokome lao pituu, “Akali Andake, mende nakalyamona,” lea. Jisasame lao pituu, “Nambamepi apata emba kosimi laa naelyoakana, emba pupala indupa pituu koo mende dee napipi,” lea.

¹²Jisasame dokaita deaka lamaiyoo lao pituu, “Nambamba isa yuunya tii pipae dokona, namba watao ipatamo endakali doko-kisa lete katasingi tii pipae doko seta. Baa iminjetae dokonya dee napayatana,” lea.

¹³Patasi dupame baa lamaiyoo, “Embame emba tangenya lao pii leleno doko kiningi nalelenona,” leami.

¹⁴Jisasame yanu pyao, “Nambame namba tangenya lao pii lato kandawapi nambanya pii doko kiningi. Doko, nyakamame namba katao epeo yuu dokopi namba pato yuu dokopi masala naelyamino. Dopaka doko, nambame namba katao epeo yuu dokopi namba pato yuu dokopi masilyo.