Jone 7:9-35

⁹Naio ber iliano nei banlo, avona iorou kanio ana nalo abano ana naio jobo.

¹⁰Yesu jobo jibe na, mia maka vesiou ga, naio bunu bavin Yerusalemo, mia maka tibe ka na tomu nalo amijikia aial naio, mia naio milavan naio.

¹¹Naruei tomu na tortoru na kulo Ju nalo, ajum̃a ajidomiio ruei ka p̃eli mia naio rimei ea jokoluolu, naruei nalo ajum̃a ajiravo naio janea vio, abivika aber naio jo be.

¹²A tomu nalo bunu, bogo nonovio ajum̃a aberverii naio, napano nalo tealo ajum̃a aber naio be toro na bo tai, a tealo aber naio kirivova, naio jom̃a mila niegeniege m̃elea tomu nalo kialo jidomiano.

¹³Ajum̃a aberverii Yesu jibe na, mia maka atum̃a averial naio ea vio medave, bior amerou ka ver kialo tomu na tortoru ajogio, mia ala titai kalo.

¹⁴Mo nalo ajua jokoluolu banbano-o na, legiano tealo barlaka ruei, mia Yesu naio mial bo ka riva rivavin ea Atua Kunuano Lu ka riverloglog tomu nalo bereio.

¹⁵Mia bogo na tomu na tortoru na kulo Ju nalo kialo amijog kiano verloglogiano novo nei, amiilo toru laka, aberinavo “Jum̃abe ana tete nei naio mijikia vatitig Atua kiano iliano jibe na? Naio maka rivan ea yimo na verloglogiano leleio, mia kiano verloglogiano kirinovo-o mia!”

¹⁶Ana jibe na Yesu naio berial banlo, berinavo “Venia nam̃a nojom̃a nejiloglog ban kamiu, maka ve kiaku, mia be Teta na naio miila kiniou nebinimei ea yetemeriba nei kiano.

¹⁷Ver toro tai saaro ka rila ga Teta kiano jidomiano, mia naio rila toro nene mijikia rivitii vatitig kanaku verloglogiano nalo. Mia toro nene naio mijikia rivitilubar ka kiniou maka noto neverloglog tomu nalo selia ga siaku, mia mijikia rivitilubar ka verloglogiano nalo nei, be riano laka ka amaluvo ea Atua.

¹⁸Ver kito reial toro tai tom̃a rila iliano ea siano bereio, kito romijikia ka naio jom̃a midular naio ga rivavin. Mia ver toro na m̃a mil, midular kiano toro na toru siano napano miila naio binimei, romijikia ka naio be riano ga, naio maka tom̃a rilasibi.

¹⁹“Toro tai na mila jibe nei be Mosis. Atua jian kiano tuboiano banio, naruei naio binimei jian ban kamiu, ana kamiu kumitum̃a kumila kokorovio ruei. Mia jum̃abe na kamiu kumisidom kuvuebin kiniou nam̃aro, bior kuberinavo namila korov tuboiano? Naio memedu jibe na?”

²⁰Naruei tomu nalo aberdop̃e aberinavo “Jerei, vonganei kojom̃a komil vovu jibe ka sim̃aro tai joaso! Kei jidom rueso? Koverial vonio!”

²¹Ana Yesu berdop̃e, berinavo “Nanua beamu nebinimei ea vio nei, nemila burum̃ara burutomoluo tai ea miremiu, nemieliel ka toro na be javuluku. Mia bogo na kumialio, maka kumisaaro kanio, kuberinavo kiniou nomim̃au bova ga ka napano nemila ea Legiano Lu.

²²Mo bo ka kamiu kuvilavon ka tiniemiu rimaio bunu ka bajago na pakuveu, javukia tormoruo Mosis naliko tormoruo dolu nalo na beamu ka naio, jibe ka Epraamo nalo, ajian ban kito. Naio bunu be im̃auano tai kiana, mia ver legiano na ala rijoru ea Legiano Lu, kamiu maka kuvisidomialio, na kumitum̃a kumila ga.

²³Kamiu kumitum̃a kuber maka kuvisidom kuvila korov Mosis kiano tuboiano, mia dam̃ariga kumijamo ka ala im̃auano na pakuveu ka Legiano Lu nei, naio bo ga na. Mo ver kamiu kumijamo ka nina, ana bior vaio ana kamiu tiniemiu mimi m̃ele jibe na ban kiniou bior kiri im̃auano sesa novo na kanaku na takurano ga nei, napano namila batitig kiri tavaliki nei niabeno bo bereio ea Legiano Lu?

²⁴Kiniou nemial jibe ka kamiu kumitum̃a kubitii vite nalo na jibe nei ea kulukuti ga, mia bo laka ka kuve masou kija, kuvilavonio ka kuvisidomii rivu vite nalo riva rivokar niamoiou.”

²⁵Ana ka bogo na tomu telabo na Yerusalemo amial ka napano Yesu jom̃a berloglog joomo ea Yimo Lu, mia nalo amiilo, aberinavo “Ierinio ga na! Toro nene kia ga nei navo, napano tomu na tortoru ajum̃a aber ajidom ka auebinio rim̃aro.

²⁶Be naina jom̃a berial kiano iliano jibe na ga, naruei nalo maka bunu alavon ka ala titai ka leleio. Kito maka rejikia, p̃eli maka asidom ail vanio bior napano abitilubar batitigio ruei ka be riano ka toro nei, naio be kiado Naverikariano memedu.

²⁷Mia makanio, maka rejikia ka reverenio aver naio nina ga, bior napano kiado moneano tai ruei, ka Naverikariano, bogo na ver naio riyotuba, mia maka ve toro tai rijikia river naio joa vio be na binimei na. Mia toro nei Yesu, kito nonovio romijikia kiano vonuo ruei.” Nalo aber jibe nei, aber p̃eli Yesu abario jo Nasarete, mia makanio, naio abario jo Betleem.

²⁸Mo bior nalo ajum̃a aber jibe na, Yesu jaam̃i ka berlogloglo joomo ea Yimo Lu, naio berial iliano nei banlo, berinavo “Kamiu kuberiam̃a kumijikia kiniou, a kuberiam̃a kumijikia vio napano nebinimei eaio, mia nemial jibe ka maka kuvijikia batitigio rivu. Nebinimei ea vio nei, maka ea kiaku jidomiano, mia toro dolu tai miila kiniou nebinimei, napano naio be burupati na ilirianiano. Mia jibe ka maka kuvijikia kiniou, mia maka kuvijikia naio bunu.

²⁹Mia naio, kiniou naruei napano nemijikia naio batitigio bo, bior ka napano naio naruei miila kiniou nebinimei ea yetemeriba nei.”

³⁰Mia Yesu kiano iliano nalo na jibe nei mila ajikili lie vo ka monoka avokakar naio, ana maka ve toro tai leleio ka napano mijikia tokolio, bior ka napano kiano bogo maka rimei vo.

³¹Ajidom aue naio, mia tomu nalo miroano laka amonea naio ruei, bior burutomoluo nalo napano jom̃a milaio. Aber jibe nei aberinavo “Ana mia Naverikariano na vabe napano mijikia rimei rila burutomoluo venia bereio tovulu naio? Makanio, tete nei naio be kiado Naverikariano memedu kiana.”

³²Mia Varisis tealo ajum̃a amiagago ka tomu nalo nam̃a amijakar Yesu ka kialo iliano nalo, mia amila sop̃eli, aba amil bija kulo lu na tortoru nalo, naruei abiorkar ka monoka ala titai ka Yesu vonganei ga. Ana amiila kialo kukuano nalo, ka ava asirago buluvio ka avokar Yesu, ka avuru naio rimei bere vanlo.

³³Ana Yesu berial, berinavo “Mia kiniou nemijikia noto vija kamiu bogo ve telisu ga bereio, karina navan bereio ea naio napano miila kiniou nebinimei.

³⁴Bogo napano navan bisi, mia kuvila von ka kuvisirag kiniou rivanvano-o, mia maka kuvijikia kuvileal kiniou. Vio napano mia nava notoaio, mia maka kuvijikia kumei eaio.”

³⁵Mo bogo napano tomu na tortoru na kulo Ju nalo kialo amijog iliano nei, abitovitonu eaio, ajum̃a aber kalo, aberinavo “Kema na jo ber vio be na, ka mia naio rivan ea karina mia kito rejikia re releal naio bereio eaio? P̃eli naio jidom rivan ea vio dolu nalo na yetemeriba napano kuruado Ju aburo aban ea ka bogo na burum̃ara vurubureiano, tenene na naio jidom riva riverlogloglo kija koviobo?