Jone 7:5-25

⁵Baanya kaiminingi dupamepi apata baa masoo minala nayawaka leami.

⁶Dokopa Jisasame dokaita lamaiyoo, “Nambanya gii angi doko ipatala naelyamo. Dopaka doko, nyakamanya gii doko koteaka lao silyamo.

⁷Yuunya endakali dupame nyakama kapa pao imbu nakaelyaminoaka doko, namba imbu kaelyamino. Doko, nambame dupanya mana minapimino dupa koona lamaipusa dopa pilyamino.

⁸Nyakama yuu gii epe doko kanja pupa. Nambanya yuu gii angi doko ipatala naelyamona, namba indupa gii epe doko kanja napatowana,” lea.

⁹Dopa lamaitala baa Galili yuu dokonya mee katea.

¹⁰Jisasa baa Galili yuu dokonya mee kateamoaka doko, baanya kaiminingi dupa yuu gii epe doko kanja pateaminopa maitakao baa apata peaka. Baa panao napenya yalo pyoo pea.

¹¹Juta dupame baa anja kalyape lao pisoo gii epe doko kandao kateamino dokonya kutiami.

¹²Dopa piaminopa endakali kambu kateamino dupame baanya lao pii mumu longo leami. Yangi dupame baa akali epena leaminopa yangimi baame endakali minakasingina leami.

¹³Dupame baanya lao leamino doko Jutamanya isingi akali dupa paka kayapala panao laa naenya yalo pyoo leami.

¹⁴Yuu gii epe doko kandao kateamino dokonya kainasa Jisasa baa losuu anda andake dokonya pupala mana lamaiyoo katea.

¹⁵Juta dupame mona andapala lao pituu, “Baa sukulu nalenge dokome aipa petala epao masingi laa kanjemape?” leami.

¹⁶Dokopa Jisasame yanu pyao dokaita lamaiyoo, “Nambame mana nyakama langilyo doko, nambanya daa. Namba puu leamo Gote dokonya.

¹⁷Goteme masingili pyoo endakali mendeme pipu laka lao masetamo kandao doko, baame kapa pao nambame pii lelyo doko Gotenyape pande namba tangenyape lao kandata.

¹⁸Endakali tangeme masoo pii lamaiyoo kalyamo dokome baa tange lalyina latala dopa pyoo katenge. Dopaka doko, baa epena leamo doko lalyalanya pyoo katenge akali doko kiningi lenge akali. Baa-kisa koo tengepi mende nasingi.

¹⁹Mana setapae dupa Moseseme nyakama nandiape? Diamoaka doko, nyakamanya mendaipi mendeme mana setapae dupa watao minala naelyamino doko, aipuma nyakamame namba pyao kumasalanya pilyamipi?” lea.

²⁰Dokopa endakali kambu dupame yanu pyao, “Emba-kisa enjele koo mende palelyamo. Apimi emba pyao kumasalanya pilyape?” leami.

²¹Jisasame yanu pyao, “Nambame kalai mendai pipu dokonya nyakama pitaka mona andelyamino.

²²Moseseme nyakama elya pingi kambu kepenge mana doko dia. (Mana doko Mosese baame setala nayana, yumbange dupame seteami.) Nyakamame Sambasa gii dokonya wanenya elya pingi kambu kepakamailyamino.

²³Goteme mana setapae Mosese maiyamo dupa nyakamame auu pyoo watao minamanana lao masetala Sambasa gii dokonya wanenya elya pingi kambu kepakamaingima tamo kandao doko, nambame endakali mendenya yonge doko pitaka auu pyakamaipu dokonya nyakamame namba kandao imbu kaelyamino doko aipuma pilyamipi?

²⁴Nyakamame ketae lengeme kandao yapala naenya kiningi tolao yapalapape,” lea.

²⁵Dokopa Jetusaleme tange mendapuame lao pituu, “Akali dake pyao kumasalanya kutamino doko daa laa kanjemape?