Jone 6:41-64

⁴¹Baame lao pituu, “Kaiti-kisa katao isa epeamo betesa doko nambana,” leamosa Juta dupame baa kandao mumu leami.

⁴²Dupame lao pituu, “Akali dake Josepe ikiningi Jisasa daa kandamuape? Baanya endangi takangepa dolapo naima nakandengepe? Indupa baame aipa petala baa kaiti-kisa katao isa epeona lelya kanjemape?” leami.

⁴³Dokopa Jisasame yanu pyao, “Nyakamame mumu nalalapa.

⁴⁴Endakali mende tangeme kapa pao namba-kisa naepenge. Namba puu leamo Takange dokome endakali mende pyalya lao nyilyamo kandao doko, baa namba-kisa epenge. Dee nambame baa yuu etatamo gii dokopa sakatasoto.

⁴⁵Pii mende potopesa dupame pepa piami dokonya pyapae silyamo doko, ‘Goteme endakali doko pitaka mana lamaitana,’ lapae silyamo. Takangenya pii sepala baanya mana nyingi endakali dupa pitaka namba-kisa epengema.

⁴⁶Endakali mendaipi mendeme Takange kanja naya. Gotepa tole katao epeamo akali dokome iki Takange kandea.

⁴⁷“Nambame nyakama etete kiningi langilyona, masoo minatamo endakali doko lete etete katata.

⁴⁸Lete katasingi betesa doko namba.

⁴⁹Nyakamanya yumbange dupame nee kenge manaa lenge doko endakali napalenge yuu dokonya neamino doko napala kumiami-pyaa.

⁵⁰Dopaka doko, betesa dake kaitinya katao isa epeana, doko natamo endakali doko kumala nayata.

⁵¹Kaitinya katao isa epeamo lete etete katasingi betesa doko namba. Endakali mendeme betesa doko natamo kandao doko, baa lete etete katata. Betesa nambame maito doko nambanya yonge doko maito. Yuunya endakali dupa lete katena lao maitona,” Jisasame lea.

⁵²Dopa leamopa Juta dupame nyakamalapo pii yanda pyoloo pyoo, “Akali dakeme baanya yonge doko naima nalapale lao aipa petala kapa pao ditape?” leami.

⁵³Jisasame dokaita lamaiyoo, “Nambame nyakama etete kiningi langilyona, nyakamame Endakalinya Ikiningi dokonya yonge doko nanao baanya taiyoko doko nanao pitamino kandao doko, lete katenge doko nyakama-kisa naseta.

⁵⁴Nambanya yonge doko nao taiyoko doko nao pitamo endakali doko lete etete katata. Yuu gii etatamo dokopa nambame baa sakatasoto.

⁵⁵Doko, nambanya yonge doko nee angi. Dee nambanya taiyoko doko endaki angi.

⁵⁶Nambanya yonge doko nao taiyoko doko nao pitamo endakali doko namba-kisa katatamopa namba baa-kisa katato.

⁵⁷Takange lete katenge dokome namba puu leamo Takange doko mambele namba apata lete kalyo. Mendai dopaka pyoo namba natamo endakali doko namba mambele lete katata.

⁵⁸Kaiti-kisa katao isa epeamo betesa doko dake. Betesa dake wamba yumbange dupame napala kumiamino dopale daa. Betesa dake natamo endakali doko lete etete katatana,” lea.

⁵⁹Baame Kapaneame yuu dokonya Jutamanya losuu anda dokonya mana lamaiyoo katao pituu, pii dutupa lea.

⁶⁰Baanya disaipele dupanya longo dupame pii dutupa sepala lao pituu, “Pii dutupa kenda pyumuna apimi kapa pao sakamaitape?” leami.

⁶¹Jisasame baanya disaipele dupame pii dutupanya mumu lelyamino lao masetala dokaita lamaiyoo, “Pii dutupame nyakamanya masingi kenda pisilyape?

⁶²Endakalinya Ikiningi doko wamba kateamo yuu dokonya pyakalyetamopa kandatamino kandao doko, aipa pitami laape?

⁶³Sipitisa dokome iki endakali lete katasingi. Yongeme mende napingi. Pii nambame nyakama langilyo dupa mambele Sipitisa doko ipupala baame nyakama lete katasipumopa nyakama lete kalyamino.

⁶⁴Dopaka doko, nyakamanya mendapuame masoo minala naelyaminona,” lea. Doko, wamba tee piamo dokopa Jisasame masoo minala nayamino endakali dupapi baa enge nyetamo akali dokopi dupa masia.