Jone 6:13-49

¹³Dokopa dupame napeaminopa betesa bali diimi wasepae yuungi dutupanya konjepae kakana siamo dupa nyoo mau pyatala baseketa mandi kingi ita-kisa dee lapomanya mandyuu tumbasiami.

¹⁴Dopa pyoo Jisasame kongali piamo doko endakali dupame kandatala, “Kiningi, dake isa yuunya ipatana lengema Potopesadoko lamona,” leami.

¹⁵Endakali dupame ipao Jisasa baa minatala kiŋi joo katena laanya piamino kandatala baa iki yuu manda dokonya dee pea.

¹⁶Yuu kuala epeamopa Jisasanya disaipele dupa lanao endaki pete dokonya paanya peami.

¹⁷Pao sipi mendenya pitipao pituu endaki dokonya omotena Kapaneame peami. Yuu kuiyoo iminjiamopa dokaita peteamisa Jisasa ipatala naya.

¹⁸Dokopa poo andake mende latala endaki doko buli pia.

¹⁹Dokaita sipinya pituu kilomita yuungi tokangepi mende joo peaminopa Jisasa endaki pete dokonya moko katao sipi dokonya tengesa epeamo kandatala pakame kumiami.

²⁰Dopa piaminopa baame dokaita lamaiyoo, “Nambana paka nakayalapape,” lea.

²¹Dokopa dupame baa sipinya lanyipuma laka lao masiami. Dopa piaminopa sipinya pituu mona lao masiamino yuu dokonya lee mendai pao pyakameami.

²²Taita dopa pyoo endaki pete dokonya omotena kateamino endakali kambu dupame kuaka sipi waka mende nasipumopa mendai iki sipya. Dokonya Jisasa baa baanya disaipele dupa-pipa awapa pyakalyetala napupyana baanya disaipele dupa iki pupimina lao masiami-pyaa.

²³Sipi waka Taipitiasa tange mendapua ipao Kamongome betesa nyepala yaka pilino lateamopa neamino panda dosa tengesa ipao sia-pyaa.

²⁴Dokopa endakali kambu dupame Jisasapi dee baanya disaipele dupapi kalyamipi lao kandeaminopa nakateaminya sipi dupanya pyakalyetala pituu Jisasa kutao Kapaneame epeami.

²⁵Endaki pete dokonya yangitena Jisasa kateamo kandatala dupame baa lamaiyoo, “Mana Lenge Akali, emba gii aipa pyoo ae ipupipi?” leami.

²⁶Jisasame yanu pyao lamaiyoo, “Nambame nyakama etete kiningi langilyona, nambame kongali kalai yale pipupa kandapimino dokonya nyakamame namba kutao naepelyamino. Daa nyakama betesa nao tiaka kayapimino dokonya namba kutao epelyamino.

²⁷Nyakamame nee koyao tamuingi doko nyalanya kutao nakalyepape. Lete etete katasepenge nee doko kutao nyoo kalyepape. Nee doko Endakalinya Ikiningi dokome nyakama dita. Doko, Takange Gote dokome dopa pina lao kapana leana,” lea.

²⁸Dupame yanu pyao baa lamaiyoo, “Naimame Gotenya kalai dupa aipa pyoo pitamape?” leami.

²⁹Jisasame yanu pyao dokaita lamaiyoo, “Gotenya kalai doko dapa: baame pena leamopa epeamo akali doko lao nyakamame masoo minalapape,” lea.

³⁰Dupame baa lamaiyoo, “Naimame kandatala emba lao masoo minamana, embame aki kongali mende pitipi? Embame aipa pitipi?

³¹Naimanya yumbange dupame endakali napalenge yuu dokonya nee kenge manaa lenge doko neami. Pii pepa pyapae singi dokonya, ‘Baame kaitinya-tae betesa doko dupa nena lao maiya-pyaana,’ lapae silyamona,” leami.

³²Jisasame dokaita lamaiyoo, “Nambame nyakama etete kiningi langilyona, Moseseme nyakama kaitinya-tae betesa nandia. Nambanya Takange dokome kaitinya-tae betesa angi doko nyakama dingi.

³³Gotenya betesa doko kaiti-kisa katao isa yuunya endakali dupa lete katasala epelyamo dakena,” lea.

³⁴Dokopa dokaitame baa lamaiyoo, “Kamongo, koteaka lao betesa doko naima dipi,” leami.

³⁵Jisasame dokaita lamaiyoo, “Lete katasingi betesa doko namba. Endakali mende namba-kisa ipatamo doko kukipi mende lopo nakayata. Endakali mendeme namba lao masoo minatamo doko kukipi mende endaki dee nanu nakayata.

³⁶Dopaka doko, nambame nyakama langitapupa nyakamame namba kandatapimiboaka doko, namba masoo minala naelyamino.

³⁷Takangeme endakali namba ditamo dupa pitaka namba-kisa ipatami. Namba-kisa ipatamo endakali doko nambame kukipi watao pyala nayato.

³⁸Doko, namba kaiti-kisa katao isa epeo doko, namba tangenya masotoli pyaanya naepeo. Daa, namba puu leamo dokonya masingili pyaanya epeo.

³⁹Namba puu leamo dokome pipili lao masingi doko dapa: baame namba endakali diamo doko pitakanya mende nambame yakinala naenya, yuu etatamo gii dokopa pitaka malunya sakatasipi laka lao masingi.

⁴⁰Nambanya Takangenya masingi doko dapa: Ikiningi doko kandatala baa lao masoo minatamo endakali doko pitaka lete etete katapimi laka lao masingi. Dee yuu gii etatamo dokopa nambame endakali doko malunya sakatasipi laka lao masingiakana,” lea.

⁴¹Baame lao pituu, “Kaiti-kisa katao isa epeamo betesa doko nambana,” leamosa Juta dupame baa kandao mumu leami.

⁴²Dupame lao pituu, “Akali dake Josepe ikiningi Jisasa daa kandamuape? Baanya endangi takangepa dolapo naima nakandengepe? Indupa baame aipa petala baa kaiti-kisa katao isa epeona lelya kanjemape?” leami.

⁴³Dokopa Jisasame yanu pyao, “Nyakamame mumu nalalapa.

⁴⁴Endakali mende tangeme kapa pao namba-kisa naepenge. Namba puu leamo Takange dokome endakali mende pyalya lao nyilyamo kandao doko, baa namba-kisa epenge. Dee nambame baa yuu etatamo gii dokopa sakatasoto.

⁴⁵Pii mende potopesa dupame pepa piami dokonya pyapae silyamo doko, ‘Goteme endakali doko pitaka mana lamaitana,’ lapae silyamo. Takangenya pii sepala baanya mana nyingi endakali dupa pitaka namba-kisa epengema.

⁴⁶Endakali mendaipi mendeme Takange kanja naya. Gotepa tole katao epeamo akali dokome iki Takange kandea.

⁴⁷“Nambame nyakama etete kiningi langilyona, masoo minatamo endakali doko lete etete katata.

⁴⁸Lete katasingi betesa doko namba.

⁴⁹Nyakamanya yumbange dupame nee kenge manaa lenge doko endakali napalenge yuu dokonya neamino doko napala kumiami-pyaa.