Jone 5:5-28

⁵Akali mende yainaka silyamopa ee kana kingi ita tepo-kisa dee tukulapo patae mende ongonya sia.

⁶Jisasame akali doko yuu wamba waka yaina sia lamo lao kandatala baa pisoo, “Emba mee jipu laka lao masilipi?” lea.

⁷Dopa leamopa akali yaina dokome yanu pyao, “Akali Andake, endaki doko buli pilyamo dokopa namba nyoo pyandata mende nakatenge. Namba tangeme paanya pilyo dokopa mendeme namba nyoo maita pyatala baa wambao pyakengena,” lea.

⁸Jisasame baa lamaiyoo, “Emba sakata! Sakatatala embanya lapa toko doko nyoo soo puu,” lea.

⁹Dokopa lee mendai akali dokonya yaina doko mee julu peteamopa, baanya lapa toko doko nyoo soo pea. Dopa piamo doko, Sambasa gii mendenya pia.

¹⁰Tenge dokonya Juta dupame akali yaina mende mee jiamo doko lamaiyoo, “Indupa Sambasa dakenya embame embanya lapa toko doko soo napayapengena,” leami-pyaa.

¹¹Dopa leaminopa baame yanu pyao, “Namba mee injisipumu akali dokome namba langyoo, ‘Embanya lapa toko doko nyoo soo puu,’ laamona,” lea-pyaa.

¹²Dokaitame baa pisoo, “Apimi nyoo soo puu laape?” leami-pyaa.

¹³Akali dokome baa mee jakamaiyamo doko apimi kanjope lao masala naya-pyaa. Doko, endakali longo kambu pyao yuu dokonya kateaminosa, Jisasa baa elyakao kolala pea.

¹⁴Maitakao Jisasame losuu anda andake kame dokonya akali doko kandatala lamaiyoo, “Kandeleno, indupa emba mee jetelenona, emba-kisa kenda pipae andake mende ipatana dee koo mende napipi,” lea.

¹⁵Dokopa akali dokome pupala baa mee injisiamo doko Jisasana lao Juta dupa lamaiya-pyaa.

¹⁶Dopa piamo doko Jisasame Sambasa mendenya dopa piamosa Juta dupame Jisasa watao pyao kateami.

¹⁷Dopa piaminoaka doko, Jisasame dupa lamaiyoo, “Nambanya Takangeme indupa apata kalai pyoaka kalyamo dokopa nambame apata kalai pingiakana,” lea.

¹⁸Dopa leamopa dupame Jisasa pyao kumasemana lao etete masiami. Doko, baame Sambasa gii doko iki yalala naenya, baame Gote baanya Takange etetena lapumu dokome baa Gote yale jilyamona latala dopa lao masiami.

¹⁹Dokopa Jisasame yanu pyao dokaita lamaiyoo, “Nambame nyakama etete kiningi langilyona, Ikiningi dokome iki moname masoo mendita mende kapa pao pyaa naenge. Daa, baame kandelyamopa Takangeme mende pilyamo dokoaka pingi. Takangeme pingi dupa Ikiningi dokome apata pingiaka.

²⁰Doko, Takangeme Ikiningi doko auu kayapala baa tangeme pilyamo dupa pitaka Ikiningi doko laitaka pingi. Nyakamame kandatala mona andalapale lao baame kalai dutupa ita minao kalai etete andake mendapua baa laitaka pita.

²¹Takangeme endakali kumapae dupa sakatasetala lete katasingi dopaka pyoo Ikiningi dokome apata masilyali pyoo endakali dupa lete katasingi.

²²Dee Takange dokome endakali mende yapala naenge. Endakali yapenge kalai doko pitaka Ikiningi doko-kisa baame setea.

²³Baame dopa piamo doko, Takange doko lalyingili pyoo endakali dupa pitakame Ikiningi doko lalyalapale lao pia. Ikiningi doko lalyala naenge endakali dokome baa epena leamo Takange doko lalyala naenge.

²⁴“Nambame nyakama etete kiningi langilyona, nambanya pii doko sepala namba puu leamo doko lao masoo minilyamo endakali doko lete etete katenge. Baa Goteme pii setala nayata. Daa, baa kumingi doko yakinatala lete katenge doko nyepelyamo.

²⁵Nambame nyakama etete kiningi langilyona, yuu gii ipanya pingi doko, indupa ipatelyamona, endakali kumapae dupame Gote Ikiningi dokonya pii doko sepala lete katatami.

²⁶Lete katenge doko Takange tange-kisa singiliaka pyoo Ikiningi doko-kisa apata sina lao lete katenge tenge doko Takangeme Ikiningi maiya.

²⁷Baa Endakalinya Ikiningi dokonyana, endakali dupa yapenge pupu lapae doko apata baa maiyaka.

²⁸Nyakamame dokonya mona andala nayalapape. Doko, yuu gii doko ipatamo dokopa endakali kumapae malu petae katatamino dupa pitakame baanya pii sepala sakatatami. Mana epe miniami dupa lete etete kalyanya sakatatami. Mana koo miniami dupa kosimi lena lao sakatatami.