19Dokopa Jisasame yanu pyao dokaita lamaiyoo, “Nambame nyakama etete kiningi langilyona, Ikiningi dokome iki moname masoo mendita mende kapa pao pyaa naenge. Daa, baame kandelyamopa Takangeme mende pilyamo dokoaka pingi. Takangeme pingi dupa Ikiningi dokome apata pingiaka.
20Doko, Takangeme Ikiningi doko auu kayapala baa tangeme pilyamo dupa pitaka Ikiningi doko laitaka pingi. Nyakamame kandatala mona andalapale lao baame kalai dutupa ita minao kalai etete andake mendapua baa laitaka pita.
21Takangeme endakali kumapae dupa sakatasetala lete katasingi dopaka pyoo Ikiningi dokome apata masilyali pyoo endakali dupa lete katasingi.
22Dee Takange dokome endakali mende yapala naenge. Endakali yapenge kalai doko pitaka Ikiningi doko-kisa baame setea.
23Baame dopa piamo doko, Takange doko lalyingili pyoo endakali dupa pitakame Ikiningi doko lalyalapale lao pia. Ikiningi doko lalyala naenge endakali dokome baa epena leamo Takange doko lalyala naenge.
24“Nambame nyakama etete kiningi langilyona, nambanya pii doko sepala namba puu leamo doko lao masoo minilyamo endakali doko lete etete katenge. Baa Goteme pii setala nayata. Daa, baa kumingi doko yakinatala lete katenge doko nyepelyamo.
25Nambame nyakama etete kiningi langilyona, yuu gii ipanya pingi doko, indupa ipatelyamona, endakali kumapae dupame Gote Ikiningi dokonya pii doko sepala lete katatami.
26Lete katenge doko Takange tange-kisa singiliaka pyoo Ikiningi doko-kisa apata sina lao lete katenge tenge doko Takangeme Ikiningi maiya.
Jone 5
Jone 5:19-26