Jone 4:35-48

³⁵“Nyakamame lao pituu, ‘Kana kitomende patatamo dokopa nee dupa wambu pitana,’ nalengemape? Dopa lengema doko nambame nyakama langilyona, nyakamame ee dupa wambu petelyamona kandayoko lao kanjepape.

³⁶Nee wambu petae mandyuu mau pingi akali dokome nee dupa tanga tangapi koyala nayatana lao mandyuu mau pyatala baa yole nyilyamo. Dopa petala nee mandyuu mau pingi akali dokopa wai pokenge akali dokopa lapota mona yaepelyambino.

³⁷Doko, ‘Mendeme nee wai pokenge doko mendeme mandengena,’ lapae singi pii doko kiningi.

³⁸Nambame nyakamame ee pokala nayamino dupanya nee manja pupa leo. Endakali waka dupame lekeleke tao pokeamino ee dupanya nyakamame pupala nee mandipelyaminona,” lea.

³⁹Enda dokome Samaita endakali yuu taono dokonya tange dupa lamaiyoo, “Nambame pio dupa pitaka baame langyomona,” leamo dokonya endakali longome Jisasa lao masoo miniami.

⁴⁰Dopa petala Samatia endakali dupame Jisasa kateasa ipupala baa nyakama-pipa awapa katamana lao tee leaminosa koto lapoma yuu dokonya katea.

⁴¹Dokopa endakali longomeaka baanya pii doko sepala masoo miniami.

⁴²Dopa petala dupame enda doko lamaiyoo, “Wamba naimame embanya pii doko sepala baa lao masoo minapumanoaka doko, indupa naima tangeme baanya pii doko sepala kiningi baa yuunya endakali dupanya Pyoo Nyingi Akali doko lamo lao kandelyamanona,” leami.

⁴³Jisasa koto lapoma yuu dokonya katapala, Galili yuu dokonya pea.

⁴⁴Jisasa baa tangeme lao pituu, “Potopesa mende baanya yuu tenge dokonya lalyala naengemana,” lea.

⁴⁵Baa pao Galili yuu dokonya pyakameamo dokopa Galili endakali dupame baa taeme ipame lamo lao lanyiami. Doko, Napinya Kayamo Gii epe dokonya dupa Jetusaleme peaminopa, baame kongali piamo dupa pitaka wamba kandeamino dokonya dopa piami.

⁴⁶Dopa piaminopa Jisasame Galili yuu dokonya endaki waene jina leamo yuu Kena dokonya dee pea. Yuu dokonya kapomanenya isingi akali mende kateamo dokonya ikiningi doko Kapaneame yuu dokonya yaina sia.

⁴⁷Akali dokome Jisasa Jutia yuu doko yakinatala Galili ipupya lapae sepala, baa kateasa ipupala baanya ikiningi kumalanya pyoo siamo doko mee injisakatale, Kapaneame lanamba lao tee lea.

⁴⁸Dopa leamopa Jisasame baa lamaiyoo, “Nyakamame kongalipi kalai paka pipaepi mende nakandelyamino kandao doko, masoo minala naengemana,” lea.