Jone 4:15-28

¹⁵Dopa leamopa enda dokome baa lamaiyoo, “Akali Andake, namba dee endaki nanu nakayao endaki dee kamuala naipao pitopa embame endaki doko namba dii,” lea-pyaa.

¹⁶Dopa leamopa baame enda doko lamaiyoo, “Embame embanya akalingi doko epena latala ipale puu,” lea-pyaa.

¹⁷Dokopa enda dokome Jisasa lamaiyoo, “Nambanya akali mende nakatengena,” lea-pyaa. Dopa leamopa Jisasame baa lamaiyoo, “‘Nambanya akali mende nakatengena,’ leeno doko kini auu pyoo leeno.

¹⁸Wamba emba akali yuungi nyala peena, indupa akali pilyambino doko embanya akalingi daana, embame namba kiningi langilino,” lea-pyaa.

¹⁹Dokopa enda dokome lao pituu, “Akali Andake, nambame emba potopesa mende lamo lao kandelyo.

²⁰Naima Samatia dupanya yumbange dupame yuu manda dakenya katao Gote lalyoo kateami-pyaa. Dopaka doko, nyakama Juta dupame Jetusaleme dokonya katao lalyepengena lengemana,” lea-pyaa.

²¹Dopa leamopa Jisasame baa lamaiyoo, “Enda, embame nambanya pii lelyo dake kiningina masepe: yuu gii mende ipatamo dokopa yuu manda dakenyapi Jetusaleme dokonyapi dolaponya katao Takange Gote lalyala nayatami.

²²Nyakama Samatia dupame masala naelyamino doko lao lalyingima. Naima Juta dupame masilyamano doko lao lalyingi. Doko, pyoo nyingi doko naima Juta dupa-kisa epelyamo.

²³Dopaka doko, yuu gii ipatamo doko indupa epelyamona, kiningi lalyingi endakali dupame Takange lao moname angi lalyetami. Takangeme endakali dopale dupame baa lao lalyipimi laka lao masingi.

²⁴Gote baa Sipitisana, baa lao lalyetamino dupame moname angi lalyepengena,” lea-pyaa.

²⁵Dokopa enda dokome baa lamaiyoo, “Kataisa lengema Mesaya doko ipatana lao masilyo. Baa ipatamo dokopa baame dupa pitaka naima langitana,” lea-pyaa.

²⁶Jisasame enda doko lamaiyoo, “Doko nambana, namba dokopa embapa pii lelyambanona,” lea-pyaa.

²⁷Dopa lao peteambino dokopaka Jisasanya disaipele dupa ipu piami. Dopa petala baa enda dokopa pii lao pitalambini lamo lao longo pyoo masiami. Dopa lao masiaminoaka doko, dupanya mendaipi mendeme enda doko kandao, “Emba aki setao pitalepe?” lawapi Jisasa kandao, “Aipuma enda dokopa pii lao pitalambipi?” lawapi mende laa nayami.

²⁸Dokopa enda dokome endaki penge doko sina latala yuu taono dokonya pilyoo pupala endakali dokonya kateamino dupa lamaiyoo, “Akali mendeme wamba nambame pio dupa pitaka langyomona, Kataisa tamo nakandenya kanja ipupa,” lea-pyaa.