Jone 3:7-29

⁷Naina naruei be yotubaiano valuo nam̃a kiniou nojo neber kaso. Tibe na, jau keiilo re bunu ka kiniou neber kaso ka jau monoka komoluo bereio.

⁸“Kosidomii von jegi. Jeg naio jom̃a miuvuvu, naio jo janea vio jibe ka ga na naio jidom, p̃eli na kito roju romijogio, mia kito maka rejikia ka naio jo binimei jum̃abe, p̃eli na naio jo ba be. Mia m̃arabo na Niununo naio rim̃au ea toro kanano meuliano jibe na naruei, naio jibe ka jegi.”

⁹Mia Nikotimas naio jidomii bijon iliano nei toru laka, ana bika berinavo “?Tomnei, mia vite na naio mia tum̃abe na?”

¹⁰Ana Yesu berdop̃e banio, berinavo “Jau kobe naverloglogiano na toru tai na kulo Israel kialo ruei, mia kiniou nemial jibe ka vite nalo nam̃a kiniou nojom̃a neber bisivisiio banso na, jau maka lele kejikia vo, a!

¹¹Kaiagago rivu! Javukia nam̃a naverialiano nalo amilaiio beamu ruei, kiniou nojom̃a neberial ga venia na m̃a kiniou nemijikiaio, p̃eli na venia na m̃a kiniou namialio, mia tibe na dam̃ariga, kamiu tomu nalo na vio Israel kamiu maka kuvisidom kuvisov kenememi iliano nalo.

¹²Kiniou nojo neberii saba nalo na yetemeriba nei ban kamiu, mia maka kuvisidom kumonmoneaio, mia ver neverii saba nalo na vio mave, mia kamiu kuvijikia kumonmoneaio tum̃abe? Kiniou namial ka mia ve deio ga.

¹³Mia kiniou Kulorinio Kenerinio, kiniou ve takurano ga nemijikia neverloglog kamiu ka na vio mave, bior ka napano maka ve toro dolu tai riva rial vio nene, mia kiniou ga Kulorinio Kenerinio najaluvo den naio nebinimei yetano ruei, a iorou, mia navan bere eaio.

¹⁴“Beamu beamu tormoruo Mosis nalo ajua vio yauo, maro nalo ajum̃a ajer binvinlo, mia naio bitirilar iesi tai, midu butoto maro jo mave, ana kei kalo napano maro jerlo, mia ver sirarago ga vitikar maro na jo mave, mia Atua rilarurlo. Ana ea m̃arabo nene kia ga, mia monoka adu kiniou Kulorinio Kenerinio bunu noto mave ea iesi tai.

¹⁵Naruei toro kei na rimonea kiniou, mia naio rivokar meuliano vou nei napano naio maka ve jukuti nene.”

¹⁶Yesu ber jibe na bior Atua tinien jii tomu nalo na yetemeriba nei toru laka, naruei naio mijamo ka kenerinio na kirinovo laka, napano naio ga takurano be kanano, binimei m̃aro kar kito, naruei toro kei napano rimonea naio, mia maka rijikia riva kovio, mia rivokar meuliano na bo nei napano maka rijikia ribisi bogo tai.

¹⁷?Ana bior vaio Atua miila kenerinio nei binimei yetano ea yetemeriba nei? Maka riilaio rimei ka tibure tomu nalo na yetemeriba nei, mia miilaio binimei ka rijamo ka kanano meuliano ka rilarur kito.

¹⁸“Toro kei napano rimonea kenerinio nei ve riano, mia Atua tibure re naio, mia toro na maka rimoneaio, vironiano joa naio ruei, bior naio maka rimonea Atua kenerinio.

¹⁹?Ana vironiano nei napano mia Atua naio monoka rilaio, burupati nene be venia? Naina bior napano naio miila kanano yulu binimei ea yetemeriba nei, mia tomu nalo ajum̃a amila kikiio ga banbano-o na, maka asaaro kanio, mia ajidom ga bajago na bova tena melijokouo.

²⁰Mia nalo nonovio nam̃a aju amila bova jibe na, jibe ka napano maka asidom yulu nei leleio, a maka asidom amei vaataro kanio, bior amerou ka aberinavo vede mia naio rila kanalo vovaiano nalo ayoyotuba ea vio medave, naruei tomu nalo ajikia avitilubario.

²¹Mia nalo nam̃a amim̃au ea bajago na bo a memedu, nalo maka amerou ka toro na yulu nei, a nalo abinimei vaataro kanio. Nalo ajaaro kanio, bior yulu nene naio rila meravo vatitig ka vite nalo nam̃a amilaio, nalo amim̃auka amonmonea ga jidomiano na Atua kanano.”

²²Ana iorou ka vite nalo nei, Yesu buru kanano naiagagoano nalo ajuvan vio Yerusalemo abatavio ea tanobuku na vio Yutea. Nalo aju jibe na, naruei ajum̃a abaruei ea tomu nalo.

²³Ana ka bogo nene nei ga Jone Baruei bunu naio joa vio dolu tai, siano Aenon, vaataro ka vio na Salim. Naio binimei ea vio na bior uei tai joaio, mia tomu nalo na aju abinimei ka naio, naio jom̃a baruei ealo ea marauei nene.

²⁴Nina ea bogo na nalo maka avokar naio, a maka avuku naio riva joomo ea yimo na lakoiano vo.

²⁵Naruei ka bogo na Jone kanano naiagagoano nalo amila iliano tai bija toro Ju dolu tai, ea tivelinio ka m̃arabo na sekon vite nalo jibe ka kanalo nalotuano berenio, ana ea tivelinio na bunu varueiano nalo napano Jone bija Yesu kialo.

²⁶Aberii banbano-o karina abinimei amial Jone, abika denio, aberinavo “Naverloglogiano, kumemi numisidom nuvika denso ea tivelinio na toro na Yesu napano beamu, bogo na kito rojua marauei na Yortano tivelinio bano, naio binimei mialso, naruei jau koberial saba telaboiio naio. Vonganei, naio bunu binimei jo baruei ea tomu nalo, mila abiniu aju ajuvarvan kito aban ea naio ga, vio bujo mia vio bujo.”

²⁷Ana bogo nam̃a aber jibe na ka Jone, naio maka rijoku, maka rijog rivova, mia naio jaaro ga, berinavo “Kito tomu nalo nonovio monoka roim̃auka ga venia napano Atua naio midu jua jum̃ado.

²⁸Javukia napano kamiu kumijikia batitigio ruei, nam̃a kiniou nojom̃a neberial julaka ga, ka kanaku im̃auano, kiniou maka neve Naverikariano, mia nebinimei beamu ka naio ga, ka neverial ka naio jo binimei ruei.

²⁹Ana vonganei jibe ka nam̃a kamiu kuberialio ban kiniou, naio binimei jo mila kanano im̃auano ruei, ana vite nei najaaro kanio, namialio bo laka. “Naio jibe ka bogo na soriano, napano naio jibe nei. Ver toro na naio soro, kanano bilbilu tai, naio riija naio ve toru ka aiomon saba nonovio na jokoluolu, mia karina, ea legiano nene, bogo na avuru tira rimei, tira nei naio maka riva totano vija naio mia naio ba jotano bija koano ga. Mia naio maka rijog vova, kanano saariano naio bare ka toro na soriano kanano. A vonganei kiniou bunu najaaro jibe na, napano kanaku naiagagoano nalo aju ajakisor Yesu.