Jone 3:2-36

²Akali dokome kuka gii mendepa Jisasa peteasa ipupala lao pituu, “Mana Lenge Akali, naimame emba Goteme mana lenge akali doko ipu leana lao masilyamano. Gote endakali mendepa nakatatamo kandao doko, endakali dokome kapa pao embame kongali pilino dopale mende napitana,” lea-pyaa.

³Dopa leamopa Jisasame baanya pii yanu pyakamaiyoo lao pituu, “Nambame emba etete kiningi langilyona, endakali mende dee ŋaŋa joo manja nayatamo kandao doko, Gotenya isingi doko kapa pao nakandatana,” lea-pyaa.

⁴Dokopa Nikotimasame baa pisoo, “Endakali lyanga jepae mende aipa petala dee ŋaŋa joo mandipengepe? Dee endangimi ŋaŋa joo lapo pyoo mandena lao ingi andaka kapa pao pilyetape?” lea-pyaa.

⁵Dopa leamopa Jisasame yanu pyao, “Nambame emba etete kiningi langilyona, endakali mende endakipa Oli Sipitisa dokopame dee ŋaŋa joo manja nayatamo kandao doko, Gotenya isingi dokonya kapa pao napata.

⁶Endakalimi endakaliaka mandenge. Oli Sipitisame sipitisaka mandenge.

⁷Nyakama dee ŋaŋa joo mandipenge langilyo pii dutupa sepala emba mona andala nayape.

⁸Poo dokome poo lao patoo lao masilyali pyoo lao pelyamopa embame poo lelyamo doko singi. Dopaka doko, angi anja pituu lelyape, anja lao pelyape lao nakandenge. Dokotekee joo, Oli Sipitisame mandelyamo endakali dupa pitaka mendai dopaka pingina,” lea-pyaa.

⁹Dopa leamopa Nikotimasame yanu pyao, “Leleno dupa aipa petala kapa pao pitape?” lea-pyaa.

¹⁰Jisasame yanu pyao baa lamaiyoo, “Emba Isataelemanya mana lenge akali doko embame pii dutupa masala naelepe?

¹¹Nambame emba etete kiningi langilyona, naimame masingipi kandengepi dupaka nyakama langipumanopa, pii langipumano doko nyakamame nyala naelyamino.

¹²Nambame nyakama yuunya mana dupa langipupa masoo minala naelyamino doko kaitinya mana dupa langito kandao doko, aipa petala masoo minatamipi?

¹³Endakali mendaipi mende kaiti-kisa napea. Napeamoaka doko, Endakalinya Ikiningi kaiti-kisa katao isa epeamo doko iki pea.

¹⁴“Wamba Moseseme endakali napalenge yuu dokonya kanopato doko minalyia-pyomo mendai dopaka pyoo Endakalinya Ikiningi doko minalyepenge.

¹⁵Baa lao masoo minata endakali doko pitaka lete etete katena lao dopa pipenge.

¹⁶Dopana, Goteme yuunya endakali dupa etete auu kayamo dokome kapa lao baanya Ikiningi mendai iki doko maiya. Doko lao masoo minatamino endakali doko pitaka alu napyoo lete katawaka katataminopa lao maiya.

¹⁷Goteme baanya Ikiningi dokome yuunya endakali dupa-kisa tenge setena lao yuunya pena laa naya. Daa, yuunya endakali dupa pyoo nyina lao pena lea.

¹⁸Baa lao masoo minilyamo endakali doko-kisa baame tenge setala naenge. Baa lao masoo minala naelyamo endakali doko-kisa baame tenge setapae katenge. Doko, baame Gotenya Ikiningi mendai iki doko lao masoo minala naelyamosa dopa pingi.

¹⁹Tii pipae doko yuunya ipateamoaka doko, endakalimi mana koo miningima dokome tii pipae doko auu nakaenya, iminjetae doko auu kayamino dokonya dupa-kisa tenge setapae kalyamo.

²⁰Mana koo miningi endakali doko pitakame tii pipae doko yanda pimaiyoo tii pipae dokonya napenge. Doko, aopyoo latala baanya mana miningi dupa tii pipae dokome panasakatame lao napenge.

²¹Dopaka doko, kiningi mana miningi endakali dokome Gote-pipa pakatae katao mana minilyamo dupa endakalimi kandena lao tii pipae dokonya pengena,” lea-pyaa.

²²Maitakao Jisasa baa baanya disaipele dupa-pipa Jutia yuu dokonya pea. Pupala yuu dokonya yuu gii mendatupa dupa-pipa katapala endakali dupanya kaimbu pyakamaiya.

²³Joneme apata Selima tengesa Ainone yuu dokonya endakali dupanya kaimbu pyakamaiyaka. Yuu dokonya endaki longo epeamosa Jone baa dokonya kateamopa endakali dupa baa kateasa epeaminopa dupanya kaimbu pyakamaiya.

²⁴(Jone anjetala nayaminopa dopa pia.)

²⁵Yonge kaimbu pingi dokonya lao Jonenya disaipele dupa-pipa Juta mendepinya kainanya pii mende yaka lea.

²⁶Dokopa dupame Jone kateasa pupala baa lamaiyoo, “Mana Lenge Akali, wamba akali mende embapa awapa endaki Jotane omotena kateambinopa, embame baanya lao pii lao paneeno akali dokome endakali dupanya kaimbu pyakamaipumopa, endakali pitaka baa-kisa pelyaminona,” leami-pyaa.

²⁷Dokopa Joneme yanu pyao, “Gote dokome opale mende endakali mende maiya nayatamo kandao doko, tangeme kapa pao nanyeta.

²⁸‘Namba Kataisa doko daana akali doko ipatana lao namba wambao Goteme puu leana,’ leo doko nyakama tangeme masilyamino.

²⁹Akali mendeme enda mende kelyapelyamo dokopa enda doko baanya etanengena lao petenge. Dopaka doko, akali dokonya kaita miningi dokome tengesa dosa katao enda lanyetamo akali dokonya pii sepala, baa mona yaepenge dokotekee doko namba etete mona yaepelyo.

³⁰Baa etete alyasale joo katatamopa namba etete anasale joo katapengena,” lea-pyaa.

³¹Ketae katao epeamo akali doko dupa pitakanya alyasale. Yuunya akali doko baa yuunya endakali dokomena yuunya dupanyaka lenge. Kaitinya katao epeamo akali doko dupa pitakanya alyasale.

³²Baame kandeapi siapi dupa lamaipumopa pii lamaipumo doko endakali mendeme nyoo minala naelyamo.

³³Baanya pii doko nyoo miningi endakali dokome Gote kiningina lao laitaka pingi.

³⁴Goteme pena leamopa epeamo akali dokome Gotenya pii doko lamaingi. Doko, Goteme baanya Sipitisa doko kuki kuki lao maiya nayao pitaka maingi.

³⁵Takange dokome Ikiningi doko auu kayapala dupa pitaka baanya kingilyaka setea-pyaa.

³⁶Ikiningi doko lao masoo minilyamo endakali doko lete etete kalyamo. Ikiningi dokonya pii watao naminilyamo endakali doko lete nakatata. Endakali dopale doko-kisa Gotenya imbutongo mandenge doko sulu soo singi.