1Akali Nikotimasa lenge Jutamanya isingi akali Patasi mende katea.
2Akali dokome kuka gii mendepa Jisasa peteasa ipupala lao pituu, “Mana Lenge Akali, naimame emba Goteme mana lenge akali doko ipu leana lao masilyamano. Gote endakali mendepa nakatatamo kandao doko, endakali dokome kapa pao embame kongali pilino dopale mende napitana,” lea-pyaa.
3Dopa leamopa Jisasame baanya pii yanu pyakamaiyoo lao pituu, “Nambame emba etete kiningi langilyona, endakali mende dee ŋaŋa joo manja nayatamo kandao doko, Gotenya isingi doko kapa pao nakandatana,” lea-pyaa.
4Dokopa Nikotimasame baa pisoo, “Endakali lyanga jepae mende aipa petala dee ŋaŋa joo mandipengepe? Dee endangimi ŋaŋa joo lapo pyoo mandena lao ingi andaka kapa pao pilyetape?” lea-pyaa.
5Dopa leamopa Jisasame yanu pyao, “Nambame emba etete kiningi langilyona, endakali mende endakipa Oli Sipitisa dokopame dee ŋaŋa joo manja nayatamo kandao doko, Gotenya isingi dokonya kapa pao napata.
6Endakalimi endakaliaka mandenge. Oli Sipitisame sipitisaka mandenge.
7Nyakama dee ŋaŋa joo mandipenge langilyo pii dutupa sepala emba mona andala nayape.
8Poo dokome poo lao patoo lao masilyali pyoo lao pelyamopa embame poo lelyamo doko singi. Dopaka doko, angi anja pituu lelyape, anja lao pelyape lao nakandenge. Dokotekee joo, Oli Sipitisame mandelyamo endakali dupa pitaka mendai dopaka pingina,” lea-pyaa.
9Dopa leamopa Nikotimasame yanu pyao, “Leleno dupa aipa petala kapa pao pitape?” lea-pyaa.
10Jisasame yanu pyao baa lamaiyoo, “Emba Isataelemanya mana lenge akali doko embame pii dutupa masala naelepe?
11Nambame emba etete kiningi langilyona, naimame masingipi kandengepi dupaka nyakama langipumanopa, pii langipumano doko nyakamame nyala naelyamino.
Jone 3
Jone 3:1-11