Jone 20:2-28

²Dopa petala alo pyao pao Saimone Pitapa dee disaipele mende Jisasame auu kaenge dokopa dolapo lamaiyoo, “Kamongo doko malunya lopao nyalamini lamo doko nyoo anja setalamipi naimame masala naelyamanona,” lea.

³Dokopa Pitapa disaipele mende dokopa sakatao malunya peambi.

⁴Dolapo tole alo piambino doko, disaipele dolome Pita nyoo maita pyatala baa wambakao pao malunya pyakamea.

⁵Baame pongatala malunya kandeamopa lapalapa dupa kakopae mee sia. Dopaka doko, baa angi kolandala naya.

⁶Saimone Pitame maitakao watao ipupala baa malunya kolandatala kandeamopa lapalapa dupa kakopae mee sia.

⁷Dee lapalapa yakane mendeme Jisasanya aiyombanya yaki piamino doko siamo kandeaka. Lapalapa doko yangi dupa-pipa pyasoo nasinya lakapae waka sia.

⁸Dokopa disaipele mende malunya wambao peamo dokome apata malunya kolandao kandatala kini lamo lao masoo minia.

⁹Jisasa baa kumapala dee sakatapengena lao pii pepa pyapae singi doko dolapome masetala nayambi.

¹⁰Dopa petala disaipele dolapo nyilyambonya andaka pilyiambi.

¹¹Dopaka doko, enda Maita dokome malu dosa kamanda katao ee lao katea-pyaa. Ee lao katao malunya pongatala elyo pia-pyaa.

¹²Elyo pyao kandeamopa enjele lapoma yonge pee kyoo lapae pingi mendalapo peteambino kandea-pyaa. Mende doko Jisasanya aiyomba seteamino dokaita peteamopa mende doko moko seteamino dokaita petea-pyaa.

¹³Enjele dolapome enda doko lamaiyoo, “Enda, aipuma emba ee leepe?” leambi-pyaa. Enda dokome dolapo lamaiyoo, “Nambanya Kamongo doko nyalamini lamo doko nyoo anja setalamipi namba masala naelyona,” lea-pyaa.

¹⁴Baame pii dutupa latala kandapilyetala Jisasa kateamo kandea-pyaa. Baame doko Jisasa lamo lao nakandea-pyaa.

¹⁵Jisasame enda doko lamaiyoo, “Enda, aipuma emba ee leepe? Emba api kutilipi?” lea-pyaa. Baame doko ee isingi akali doko lamo lao masetala baa lamaiyoo, “Akali Andake, embame baa nyoo pateno kandao doko, nambame nyoo patoo dosa setapu lao langi,” lea-pyaa.

¹⁶Jisasame enda doko kandao, “Matia!” lea-pyaa. Dokopa enda dokome kandapilyetala Iputu pii lao, “Laponai!” lea-pyaa. (Pii Laponai doko kapilyoo, Mana Lenge Akali lapenge.)

¹⁷Jisasame enda doko lamaiyoo, “Embame namba minatae nasa. Doko, namba Takange katapyasa ketae patala naelyo. Dopaka doko, embame pupala nambanya kaiminingi dupa lamaiyakao, namba nyakamapi nambapinya Takange doko katapyasa ketae pelyona, dee namba nyakamapi nambapinya Gote doko katapyasa ketae pelyona, lelyamo lamaiyakape,” lea-pyaa.

¹⁸Matia Makatala tange dokome pupala disaipele dupa lamaiyoo, “Nambame Kamongo doko kanjona,” lea. Jisasame baa pii lamaiyamo dupa dokaita lamaiya.

¹⁹Sandee dokonya alemandi disaipele dupame Juta dupa paka kayapala nyakama peteamino anda doko kaitini pai lanyetala peteami. Dopa piaminopa Jisasa dokaitanya kainanya ipao katapala lao pituu, “Nyakama mona yaepalapa,” lea.

²⁰Baame dopa latala dee baanya kingipi patalipi dupa kanjepa lao laitaka pia. Dopa piamopa disaipele dupame Kamongo doko kandatala eteke piami.

²¹Dokopa Jisasame dokaita deaka lamaiyoo, “Nyakama mona yaepalapa. Takangeme namba puu leamo dokaita doko nambame nyakama pupa lelyona,” lea.

²²Dopa latala baame dokaita-kisa poo lanya pisetala lao pituu, “Nyakama Oli Sipitisa doko nyalapa.

²³Nyakamame endakali dupanya koo dupa kunanya nepakamaitamino kandao doko, dupanya koo dupa kunata. Nyakamame endakali dupanya koo dupa pyakilyina kayatamino kandao doko, pyakilyetana,” lea.

²⁴Jisasa epeamo dokopa akali kingi ita-kisa dee lapoma dutupanya mende Tomasa lenge Pakao Mandenge lengema Tomasa doko dupa-pipa awapa napeteami.

²⁵Tenge dokonya disaipele yangi dupame baa lamaiyoo, “Naima Kamongo doko kanjemanona,” leami. Dopaka doko, baame dokaita lamaiyoo, “Nambame baanya kinginya ŋili pyatae kombe dolapo nakandao, dee baanya ŋili pyatae kombe dupanya nambanya kingi kondenge pyandala nayao, dee baanya patali kombe dokonya kingi konde pyandala nayato kandao doko, nambame masoo minala nayalapona,” lea.

²⁶Sandee gii ongo etapeamopa Sandee gii mende ongonya baanya disaipele dupame kaitini dupa deaka pai lanyetala andokote peteami. Gii dokopa Tomasa awapa peteami. Dopa piaminopa Jisasa ipao dupanya kainanya katapala, “Nyakama mona yaepalapa,” lea.

²⁷Dopa latala baame Tomasa lamaiyoo, “Embanya kingi kondenge doko ae peyatala nambanya kingi dolapo kanda. Dee embanya kingi doko ae peyatala nambanya patali dokonya pyanda. Dopa petala embame kiningi daana lao masala naenya kiningina lao masoo minape,” lea.

²⁸Tomasame yanu pyao, “Nambanya Kamongo dokona, nambanya Gote dokona,” lea.