Jone 19:32-42

³²Dokopa yanda singi amii dupame ipupala Jisasa-pipa awapa pyao yukuiyamino akali dolaponya wambao dokonya moko dolapo pyao lakapala mende dokonya pyao lakeami.

³³Dopa petala Jisasa yukuotae kateasa ipupala kandeaminopa baa wamba kumatala siasa baanya moko dolapo pyao lakala nayami.

³⁴Dopaka doko, yanda singi mendeme baanya patali dokonya yandateme kapua katao nyia. Dokopa awapa taiyoko ipangepa epea.

³⁵Dopa piamopa kandeamo akali dokome piamo dokonya lao pii lea. Baanya pii leamo doko kiningi. Dee baa tangeme baame pii leamo doko kiningina lao masilyamona nyakamame apata pii doko masoo minapenge.

³⁶Dopa piamo dupame pii pepa pyapae singi dokonya, “Dupame baanya kuli mendaipi mende lakala nayatamina,” lapae singi doko angi jina lao pia.

³⁷Pii pepa pyapae singi dokonya dee pii mende, “Baa kapua katao nyiamino doko endakali dupame kandatamina,” lapae singi.

³⁸Dutupa peteamo dokopa akali Josepe lenge Atimatia tange dokome Jisasa nyoo malu pitoo lao Pailate-kisa tee lea-pyaa. Josepe doko Jisasanya disaipele mendeaka doko, baame Juta dupa paka kayapala baanya masoo miningi doko yalo pia-pyaa. Pailateme kapana nyina lateamopa Josepeme pao Jisasa nyia.

³⁹Dee akali Nikotimasa lenge mende wamba Jisasa peteasa kuka epeamo doko apata epa. Baame ita tunduma epe pingi molo ipangepi alusa ipangepi pyasilya pyasena petae mende soo epea. Dokonya kenda pipae dokokingi ita tepoma-kisa wakao tepoma.

⁴⁰Dolapome Jisasa nyepala Juta dupame endakali malu pyaanya pingimali pyaoo opale tunduma pingi dupa palyeta pyoo lapalapame Jisasa yaki piambi.

⁴¹Jisasa pyao yukuiyamino tengesa dosa ee mende sia. Ee dokonya endakali malu pipenge yuli tumbyepae enenge mende sia. Dokonya endakali mende malu petala nayami.

⁴²Yuu gii dokonya Juta dupanya Sambasa gii doko kandatama lao depa lengema dokonyana kananda tumbyepae tengesa siamo dokonya Jisasa malu piambi.