Jone 19:2-24

²Yanda singi dupame kende nengenenge katapae mendapua langapu petala Jisasanya aiyombanya pee pyakamaiyami-pyaa. Dopa petala yonge pee wene pyapaele mende pyakamaiyami-pyaa.

³Dopa petala dupame baanya enombasa katapala, “Emba Jutamanya Kiŋi emba auu pyoo katape!” latala kingi kapeme toka lao nyiami-pyaa.

⁴Pailateme deaka kamanda pyakalyetala dokaita lamaiyoo, “Nambame baa nyakama katamisa kamanda laminao epelyo doko, baa-kisa tenge mende sipumu nakanjene lamo lao kanjepale lao laminao epelyona,” lea.

⁵Kende nengenenge katapae mendapua langapu petala aiyombanya pee pyakamaiyamino doko pyoo dee yonge pee wene pyapaele mende pyakamaiyamino doko pyoo Jisasa kamanda epea. Dokopa Pailateme dokaita lamaiyoo, “Akali dake kanjepa!” lea.

⁶Dokopa pitisa mupapi yanda singipi dupame Jisasa kandatala puu lao, “Baa pyao yuka! Baa pyao yuka!” leami. Dopa leaminopa Pailateme dokaita lamaiyoo, “Nyakama tangeme nyepala pyao yukalapa. Doko, nambame baa-kisa tenge mende sipumu nakandelyona,” lea.

⁷Juta dupame baa kandao yanu pyao, “Naimanya mana setapae mende singina dokome akali dake kumasepenge jilyamo. Doko, baame baa Gotenya ikiningi jingina,” leami.

⁸Pii dopa leamino doko, Pailateme sepala etete paka kaya.

⁹Dopa petala baa baanya andaka dee kolandea. Kolandatala Jisasa pisoo, “Emba anja tangepe?” lea-pyaa. Dokopa Jisasame yanu pyao mende lamaiya naya-pyaa.

¹⁰Dokopa Pailateme baa lamaiyoo, “Embame namba langya naelepe? Emba mokapenge pupu lapae doko namba-kisa soo dee emba pyao yukuopenge pupu lapae doko namba-kisa soaka pilyamo doko embame masala naelepe?” lea-pyaa.

¹¹Jisasame yanu pyao, “Ketae katenge dokome emba pupu lapae nandipyali kandao doko, embanya pupu lapae mendeme kapa pao namba ita minala nayapili. Dopana, namba emba dyomo akali dokonya koo doko etete waipa sowana,” lea-pyaa.

¹²Pailateme pii doko sepala baa mokalanya kaitini kutia. Dopa piamoaka doko, Juta dupame puu lao, “Embame akali dake mokateno kandao doko, emba Kapomane Isingi Mupa dokonya mona setenge daa! Tangeme kiŋi kalyona lenge endakali doko pitaka Kapomane Isingi Mupa dokonya yandapipina,” leami.

¹³Pailateme pii dutupa sepala Jisasa laminao kamanda pyakalyia. Pyakalyetala kosa lao petenge Kana Toko lengema dokonya petea. (Doko Iputu pii lao Gapata lengema.)

¹⁴Napinya Kayamo Nee doko nalanya depa lapenge gii dokopa kotaka andawai pungupungu jia. Dokopa baame Juta dupa lamaiyoo, “Nyakamanya Kiŋi dake kanjepa,” lea.

¹⁵Dopa leamopa dupame puu lao lao pituu, “Nyoo nepa! Nyoo nepa! Baa pyao yuka!” leami. Pailateme dokaita lamaiyoo, “Nambame nyakamanya kiŋi doko pyao yukuakawape?” lea. Dopa leamopa pitisa mupa dupame yanu pyao, “Naimanya kiŋi mende nakatengena, Kapomane Isingi Mupa doko ikina,” leami.

¹⁶Dokopa Jisasa pyao yukuina lao Pailateme dokaitanya kingilyaka maitiamopa dupame Jisasa nyoo peami.

¹⁷Baa tangeme baanya ita poko doko soo yuu kenge Matenakulimanda lenge dokonya pea. (Iputu pii lao kenge doko Golokota lengema.)

¹⁸Yuu dokonya baa pyao yukuiyami. Dee akali mendalapo baa-pipa awapa yukuiyamiaka. Jisasa kainanya yukuotala mendalapo dolapo lemba dolaponya yukuiyami.

¹⁹Pailateme pii mende pepa pyanya ita poko dokonya ketae katea. Pepa pyao kateamo doko dapa latae katea: JISASA DOKO NASATETE TANGE. BAA JUTA DUPANYA KINI DOKO.

²⁰Jisasa pyao yukuiyamino yuu doko taono Jetusaleme tengesa dokonyana, Juta longome pepa pyatae kateamo doko itaki pyao kandeami. Baame pepa doko Iputu pii lawapi, Loma pii lawapi, Gitiki pii lawapi pyanya katea.

²¹Dopa latae kateamopa, Juta dupanya pitisa mupa dupame Pailate kandao, “Embame, ‘Baa Juta dupanya kiŋina,’ lao pepa pyala naenya, ‘Akali dakeme, “Namba Juta dupanya Kiŋina,” leana,’ lao pepa pyaa,” leami-pyaa.

²²Dokopa Pailateme yanu pyao, “Pepa nambame pyalo doko pyapalona,” lea-pyaa.

²³Yanda singi amii dupame Jisasa pyao yukuotala dokopa baanya yonge pee akipi dupa nyepala mokosoo malu kitomende palyiami. Dopa petala yanda singi amii dupa malu mendai mendai lao nyiami. Dee baanya yonge pee isa pingi doko apata nyiamiaka. Baanya yonge pee isa pingi doko mendasa kii napingi mee wasoyoko latae.

²⁴Dokopa yanda singi amii dupame nyakamalapo lao pituu, “Naimame kanguala naenya, api-kisa palelyape lao kandamana kana yakane pyasingidupa pyasema,” leami. Yanda singi dupame dopa piamino doko pii pepa pyapae singi dokonya, “Nambanya yonge pee akipi dupa dokaitame mokosoo nyiami. Nambanya yonge pee doko api-kisa palelyape lao kanjanya kana yakane pyasingi dupa pyasiamina,” lapae singi doko angi jia.