Text copied!
CopyCompare
Buk Baibel long tokples Kandas - Jon - Jon 9

Jon 9:9-37

Help us?
Click on verse(s) to share them!
9Ara taro det watungi lena, “I ut ra.” Ara taro kai det watungi lena, “Awu, i tamtama elar kut nama musano ra.” Ra i ut i watungi lena, “Iau ut ri.”
10Det tingi lena, “Di utamtama petlan pas arin matam?”
11I balu det lena, “A musano ra di watungi lena o Iesu i gisgis pas a ibisino nama piso ra i talus tar arin matang nami. Ra i tulu ru iau ma i watungi lena, ‘Un nan utong una kabopolo Siloam sur un gos pas arin matam.’ A wan ma a gos pas arin matang, ra a tamtama mut.”
12Det tingi lena, “Ma i, awai i?” A musano ra i balu det lena, “Ka tasmani.”
13Det ben pas a musano ra numugu i pulu torom a kum Parisi,
14uni o Iesu i gisgis pas a ibisino nama piso ma i utamtama pas a pulu una Bung na Sabat.
15I mo ra a kum Parisi det ting melet a musano lena, “Di utamtama petlan pas ui?” I balu det lena, “I talus tar arin matang nama pikaio, a gos pasi, ra a tamtama mut.”
16A ramano kum Parisi det watungi lena, “A musano ra i pam a utna ri, i awu sur tagun o God, uni i papam una Bung na Sabat.” A ramano kai det watungi lena, “Ra a musano ri a sakino musano, in pam petlan a kum utna na ukisin ri?” Ra a nuknukin det ke takai uni.
17Ara dino melet a kum Parisi det ting a musano ra lena, “Asau un watungi una musano ra i utamtama pas ui?” I balu det lena, “I ara poropet.”
18A ramano kum te Juda ka det nurnur lena a musano ri numugu i pulu ma di sa utamtama pasi. Ra det itula pasi ut o tamano ma o nano, ma det ting der lena,
19“A nutumur ut ri? I ra mur watungi lena mur usus pasi, i sa pulu? I tamtama pepetlai?”
20O tamano ma o nano der balu det lena, “Mir tasmani lena a nutumir ut ri, ma mir tasmani lena mir usus pasi, i sa pulu.
21Ikut ka mir tasmani ra i tamtama pepetlai, ma ka mir tasmani kai osi ra i utamtama pasi. I sa tarai na musano, mot in tingi, i ut in wasiso talapor uni.”
22O tamano ma o nano der wasiso lenri, uni der ngaran a kum te Juda, ra det watungi lena, ra taio in nurnur un o Iesu lena i a Karisito, din turbat ru i gusun a rumu na lotu.
23Iri i a kibino ra o tamano ma o nano der watungi lena, “I sa tarai na musano, mot in tingi.”
24Det ben melet pas a musano ra di usus pasi, i sa pulu, ma det watungi tano lena, “Un liliman umatan o God ra anum a wasiso i lingmulus ut! Met tasmani lena a musano ra i utamtama pas ui, a tene sakino.”
25I balu det lena, “Ka tasmani ra i a tene sakino, o awu. Ara utna kut ra a tasmani: Numugu a pulu, ma uniri a sa tamtama.”
26Det tingi lena, “Asau ra i pami un ui? Ma i utamtama petlan pas ui?”
27I balu det lena, “A sa watung tari tamot, ma ka mot longoro i. Sur asau ra mot nem na longoro meleti? Kanapi mot kai mot nemi sur mot a kum nat na ususer anunu?”
28Det watung laulau i, ma det watungi uni lena, “Ui anun a nat na ususer, ikut met a kum nat na ususer anun o Moses.
29Met, met tasmani lena o God i wasiso torom o Moses, ikut a musano ra, ka met tasmani ra i wan tagai.”
30A musano i balu det lena, “Ai, anumot a wasiso i ukisin iau! Ka mot tasmani ra i wan tagai, ikut i sa utamtama pas iau.
31Dat sa tasmani lena o God ken longoro a niaring anun a kum tene sakino, in longoro det kut ra det pam a petutna ra i wakak umatan o God ma det ser mur anun a nemnem.
32Turpasi una turturkibin ina rakrakon bual tuk uniri, ka di tasman tar taio ra in utamtama pas arin matan tu pulu, ra di usus pasi, i sa pulu.
33Ra a musano ri awu sur tagun o God ken pam lar pas tu utna.”
34Det balu i lena, “Di usus pas ui una sakino petutna, ma ui, u nemi sur un ususer met!” Ra det lakro ru i mut gusun a rumu na lotu.
35O Iesu i longoro i lena, di sa lakro ru tar a musano ra gusun a rumu na lotu, ra i sisio suri, ma i sio pasi ra i tingi lena, “U nurnur ut una Nutun a Musano?”
36I balu i lena, “Labino, un inanos iau, osi ra a Nutun a Musano, sur an nurnur uni.”
37O Iesu i watungi tano lena, “U sa tama i, iau ut ri a wasiso tam.”

Read Jon 9Jon 9
Compare Jon 9:9-37Jon 9:9-37