Jon 9:9-26

⁹Ara taro det watungi lena, “I ut ra.” Ara taro kai det watungi lena, “Awu, i tamtama elar kut nama musano ra.” Ra i ut i watungi lena, “Iau ut ri.”

¹⁰Det tingi lena, “Di utamtama petlan pas arin matam?”

¹¹I balu det lena, “A musano ra di watungi lena o Iesu i gisgis pas a ibisino nama piso ra i talus tar arin matang nami. Ra i tulu ru iau ma i watungi lena, ‘Un nan utong una kabopolo Siloam sur un gos pas arin matam.’ A wan ma a gos pas arin matang, ra a tamtama mut.”

¹²Det tingi lena, “Ma i, awai i?” A musano ra i balu det lena, “Ka tasmani.”

¹³Det ben pas a musano ra numugu i pulu torom a kum Parisi,

¹⁴uni o Iesu i gisgis pas a ibisino nama piso ma i utamtama pas a pulu una Bung na Sabat.

¹⁵I mo ra a kum Parisi det ting melet a musano lena, “Di utamtama petlan pas ui?” I balu det lena, “I talus tar arin matang nama pikaio, a gos pasi, ra a tamtama mut.”

¹⁶A ramano kum Parisi det watungi lena, “A musano ra i pam a utna ri, i awu sur tagun o God, uni i papam una Bung na Sabat.” A ramano kai det watungi lena, “Ra a musano ri a sakino musano, in pam petlan a kum utna na ukisin ri?” Ra a nuknukin det ke takai uni.

¹⁷Ara dino melet a kum Parisi det ting a musano ra lena, “Asau un watungi una musano ra i utamtama pas ui?” I balu det lena, “I ara poropet.”

¹⁸A ramano kum te Juda ka det nurnur lena a musano ri numugu i pulu ma di sa utamtama pasi. Ra det itula pasi ut o tamano ma o nano, ma det ting der lena,

¹⁹“A nutumur ut ri? I ra mur watungi lena mur usus pasi, i sa pulu? I tamtama pepetlai?”

²⁰O tamano ma o nano der balu det lena, “Mir tasmani lena a nutumir ut ri, ma mir tasmani lena mir usus pasi, i sa pulu.

²¹Ikut ka mir tasmani ra i tamtama pepetlai, ma ka mir tasmani kai osi ra i utamtama pasi. I sa tarai na musano, mot in tingi, i ut in wasiso talapor uni.”

²²O tamano ma o nano der wasiso lenri, uni der ngaran a kum te Juda, ra det watungi lena, ra taio in nurnur un o Iesu lena i a Karisito, din turbat ru i gusun a rumu na lotu.

²³Iri i a kibino ra o tamano ma o nano der watungi lena, “I sa tarai na musano, mot in tingi.”

²⁴Det ben melet pas a musano ra di usus pasi, i sa pulu, ma det watungi tano lena, “Un liliman umatan o God ra anum a wasiso i lingmulus ut! Met tasmani lena a musano ra i utamtama pas ui, a tene sakino.”

²⁵I balu det lena, “Ka tasmani ra i a tene sakino, o awu. Ara utna kut ra a tasmani: Numugu a pulu, ma uniri a sa tamtama.”

²⁶Det tingi lena, “Asau ra i pami un ui? Ma i utamtama petlan pas ui?”