Jon 9:5-18

⁵Kada nau ku to 'ua 'i laona molagali, nau ne na madakwalae fuana wane ana molagali.”

⁶Ma burina sa Jesus nia saea ru ne, nia ka ngisu laona ano, ma ka mukia mamako ana ngisuna, ma ka usua ana na maana na wane nai.

⁷Ma sa Jesus ka fata 'uri fuana, “'Oe leka 'oko taufia na maamu laona mae namo 'i Saelom.” (Sataeru ne, na fadalana ne, “Alungainia.”) Ma na wane nai leka ka taufia na maana, ma kada nia oli na 'i fera nia ka ada na.

⁸Ma na wane ana fere nia, ma na wane ne kera ada to'ona be nia gani ru ga 'ana 'i nao, kera ka ledida kwailiu, “Nia na wane be nia gouru ma ka gani ru ga 'ana ne?”

⁹Ma tani wane kera ka 'uri, “Nia na ne.” Ma tani wane lau kera ka fata 'uri, “Nao lau nia ne, boroi ma adalae to'ona dia na wane be.” Ma na wane nai 'ana talana ka fata 'uri, “Nau na wane be na ne.”

¹⁰Ma kera ka ledia, “'Uta ne na maamu ka 'ifi na 'urinai?”

¹¹Ma nia ka olisida ka 'uri, “Na wane ne satana sa Jesus ne nia mukia mamako, ma ka usua ana maaku. Ma nia ka saea fua nau ku leka ku taufia na maaku laona mae namo 'i Saelom. Sui nau ku leka, ma kada nau ku taufia na maaku go ne maaku ka ada na.”

¹²Ma kera ka ledia lau 'uri ana, “Ma nia na 'i fai?” Ma nia ka olisida ka 'uri, “Nau ku ulafusia.”

¹³Ma 'i buri, kera ka talaia na wane be siana Farasi ki.

¹⁴Aia, ma fa dangi nai sa Jesus saungainia na mamako ma ka gura na maana wane nai, nia na Sabat.

¹⁵Ma na Farasi ki kera ka ledia lau na wane nai, “'Uta ne nia sasia 'oko ada na.” Ma nia ka saea ka 'uri fuada, “Sa Jesus nia alua mamako fafia na maaku. Sui nau ku taufia na maaku, ma na maaku ka ada na.”

¹⁶Ma tani wane ada ne Farasi ki kera ka fata 'uri, “Na wane ne nia sasia ru ne, nao nia si leka lau mai fasia God, sulia nia 'oia na taki ana Sabat, ana guralana na wane ne ana Sabat.” Ma tani wane lau kera ka 'uri, “Nao, ma 'uta mone ne na wane abulo ta'a 'uri ka fulia na fanadae baita 'urinai ki?” Ma kera nao si 'ado go sulia na ru nai.

¹⁷Sui Farasi ki kera ka ledi 'uri lau ana na wane nai, “'Oe saea sa Jesus ne gura na maamu, na te ne 'oe saea ana?” Ma nia ka 'uri, “Nia ta profet.”

¹⁸Ma na wane fanaonao ana Jiu ki, kera ka noni'ela ana famamanalana ne maana nia rodo na mai 'i nao. Ma kera ka saea mai na maa nia fainia gaa nia.