Jon 9:5-12

⁵“Yumob sabi? Wen mi iya langa dijan wel, mi na det lait blanga ola pipul langa dijan wel.” Lagijat na Jisas bin tok langa im wekinmen olabat.

⁶Afta na Jisas bin tjakam spit langa graun, en imbin meigim mad garram det spit, en imbin rabum det mad langa det dubala ai blanga det blain men,

⁷en imbin dalim det blain men, “Yu go en washim miselp langa det wodahol gulum Sailowam.” Wal det neim blanga det wodahol im tok Jandim. En Jisas bin jandim det blain men deya na, en det blain men bin go langa det wodahol, en imbin washim miselp, en streidawei imbin luk, en imbin kambek langa im kemp gudwan na.

⁸Wal detlot pipul hubin abum kemp gulijap langa im kemp bin luk imbin gudwan, en detlot najalot pipul hubin oldei luk im askimbat blanga mani bin luk imbin gudwan du, en deibin ol askim miselp, “Dijan det seimwan blain men hubin oldei jidanbat eniweya askimbat blanga mani, indit?”

⁹Wal sambala pipul bin tok, “Im na tharran.” Bat najalot pipul bin tok, “Nomo im tharran. Bat im luk jis laik im.” Wal det men hubin oldei jidan blainwan bin dalim olabat na, “Mi na dijan.”

¹⁰Wal detlot pipul bin askim im na, “Wal wotfo yu luk gudwei? Wanim bin meigim yu gudwan?”

¹¹Wal det men hubin oldei jidan blainwan bin tok, “Det men neim Jisas bin meigim mad, en imbin rabum det mad langa main ai dubala, en imbin dalim mi blanga go langa det wodahol gulum Sailowam en washim miselp, en aibin go deya, en wen aibin washim miselp, streidawei det ai main bin luk gudwei.”

¹²Wal detlot pipul bin askim det men hubin oldei jidan blainwan, “Wal weya det men?” Wal det men hubin oldei jidan blainwan bin tok, “Ai nomo sabi.”