Jon 9:3-32

³Haqan Yesus amenin emim gibilan, Mat ka daq meqinta a hi am ham. Ta in anen amam daq meqinta a hi emiymo ham. Haiqgam ham. Mat ka aholib God ago kabiy emid ulal iysa on mataw ahol waq kem daqay haqad in ame hiqiyta ham.

⁴Muran saw tihastitayim usaq ham. Sa i mat ya iqeman bolta na ago kabiy saw anuwanibmo emuq ham. Tarom teq tiqiydaq ham. Iyid teq mataw kabiy araq a ta hi em daqay ham.

⁵Ya og kab osad ago saw anuwan iyim osaiqta ham.

⁶Haqadmo in ogib kusluwim og inaq buliyim in waqim mat ame haiqta na ameqnagnib tiqam.

⁷Emadmo in bulon, Ni leheq yuw akurorqanta anan Silowam haqayta nab ni nime suhol ham. (Gamuk Silowam na alulin in kazaq, ‘Eman lah’ haqayta.) In nazaq bulonan mat ame haiqta na lehim ame tisuhol. Suholim ame tihastitayan in saw ahol waq kemadmo muleqim ta bol.

⁸Bolan ago uliqab walmataw teq mataw kwaziqmo in mani anan sun negsa ahol waqiyta na tibilaqiy, Ezaq? haqiy. Mat danib mani anan sunad osyaqta na amatin kawaqmo daqag haqiy.

⁹Haqsa asor ‘Eqe’ haq yaqay. Ka mat naqmo daqag haq yaqay. Sa asor ‘Haiqgam’ haq yaqay. Ka in mat naqmo nogta teq ka in mat ta araq haq yaqay. Haqsa mat na bilaqyaq, Ka yaqmo haqyaq.

¹⁰Haqsa teq mataw na tisusumun ugiy, Ta ni ezaq tonim nime na dimniy? haqiy.

¹¹Haqan in gibilan, Mat anan Yesus haqayta na ogib kusluwim og inaq buliyim in waqim ya imeqnagnib am ham. Emim in ya ibilan, Ni leheq yuw Silowam-ub nime suhol haqad in bilam ham. In nazaq ibilenan ya le ime suholan tidimniy ham. An muran ya saw ahol tuwaqaiq ham.

¹²Haqan mataw na buloniy, Ta mat na edowa? haqiy. Haqan in bilam, Yowo ham. Ya a hi hurit ham.

¹³Haqanmo mataw na in mat ame hiqiyim osta na waqim ad Farisi gigo hib tilehiy.

¹⁴(Na Yesus ogib kusluwim og inaq buliyim in waqim mat na ameb eman ame hastitayta na in Juda gigo lotu akamnib kabiy na amta.)

¹⁵Nazaq iyan Farisi in mat na tisusumun ugiy, Ni nime ezaq diq tonim dimniy? haqiy. Haqan in gibilan, Mat na ogib kusluwim og inaq buliyim in waqim ya imeb am ham. Eman ya le ime suholim ya saw ahol tuwaqaiq ham.

¹⁶Haqanmo Farisi asor bilaqiy, God mat na eman a hi bolta haqiy. In i gigo lotu akaman ago gunun a hi muzinaqta haqiy. Haqsa ta asor bilaqiy, Ezaq teq mat aholib daq meqinta usaqta na in anad emsamo daq azawayin inaq kazaq gwahtiqdaq? haqiy. Farisi nazaq haqad in gimo gihol huserim dauh giger tiqiyiy.

¹⁷Nazaq iyan Farisi in mat ame hiqiyim osta na a ta susumun ugiy, Ni mat nime eman hastitayta na anan ninad ezaq emaq? haqiy. Haqan in bilam, Mat na in God ago nantut araq ham.

¹⁸Ari Juda mataw na in mat na ame haiqmo osim teq ame dimniyta na anan helmo a hi haq yaqay. Nazaq iyan in mat ame dimniyta na anen amam gimen nan eman in tuboliy.

¹⁹Bolan in susumun negim gibileniy, Ka ne giger gitatin e? haqiy. Ka ne ame haiqmo emiyta ye? haqiy. Ezaq tonim in saw ahol tuwaqaq? haqiy.

²⁰Haqan in anen amam gamuk amenin emim bilaqiy, Ka i giger gigo amunta haqiy. Teq in ame haiqmo i emta haqiy.

²¹Ta teq muran in ezaq tonim ame saw ahol tuwaqaqta na ago i a hi hurit haqiy. Ad nog diq in ame eman hastitayta na i a hi huritmo haqiy. Ne inmo susumun ugiy haqiy. In mat ayah tiqiyta haqiy. Inmo aholmen gamuk tibilaqdaq haqiy.

²²Mat na anen amam in Juda mataw aseseqta na ginan rabad iyan in nazaq bilaqiy. Na ezaqgo Juda mataw na tekomo an adugan wazim bilaqiy, Mat araq Yesus anan Krais haqid teq na i bit humab wolaytab muzid in i ginaq lotu a ta hi emdaq haqad in bilaqiy.

²³Nan asen naqmo ago mat na anen amam bilaqiy, In mat ayah tiqiyta haqiy. Ne inmo susumun ugiy haqiy.

²⁴Nazaq iyan Farisi in mat ame hiqiyim osta na gime gigerta bulonan bolan in buloniy, Ni God amomo abin wazid eraqsa teq ni gamuk heltaqmo i gibilen haqiy. I mat na ago tuhurit haqiy. In daq meqinta emaqta haqiy.

²⁵Haqan mat ame dimniyta na in gigo gamuk amenin emim gibilan, Mat na daq meqinta emaqta o haiqta na ya a hi hurit ham. Ya nagah amulikmo ago huritta na in kazaq ham. Kwaziqmo ya ime haiqmo osta teq muran ya saw ahol tuwaqaiq ham.

²⁶Haqan mataw na buloniy, Mat na ezaq diq nitonan teq ni nime hastitay? haqiy.

²⁷Haqan in gibilan, Ya tigibilenta teq ne huritnan gituw hiqiyaq ham. Ne ginad ezaq diq emad ne a ta huritnan bilaqay? ham. Ne inaqmo ingo disaipel iynan haqad ne susumun yagay ye? ham.

²⁸Haqan Farisi in mat na bilawunim buloniy, Ninmo in ago disaipel-ta haqiy. Ari igmo Moses ago disaipel-ta haqiy.

²⁹God in Moses-mo gamuk bulonta naqmo ago i tuhuritta haqiy. Ta teq mat nawa na in edob bolta na i a hi hurit haqiy.

³⁰Haqan mat na in Farisi gigo gamuk amenin emim gibilan, Ne gigo gamuk nawa ne bilaqayta na in lul araq diq ham. Mat na edob bolta na ago ne a hi huritayta teq in ya ime eman tihastitay ham.

³¹God in mataw daq meqinta emayta giqez a hi huritaqta ham. Na ago i bunmo tuhuritta ham. Ari mat God abin wazinad anad muzinsa teq God in aqez tuhuritdaq ham.

³²Kwaziq diqmo og mutur gwahtimta nab iyim bolim bo muran kam kab aw araq amun ame haiqta eman teq abeb mat araq in ame eman hastitayta na awagamun araq diq i a hi huritta ham.