Jon 9:28-40

²⁸Kaeŋ meleema oŋono mepaqepae ama uuqeqe qaa tokoroŋkota kokaeŋ jeŋ mugi, “Gii mono iwaa gowokoyaga koloojanto, nononoŋ Mooseswaa gowokourutaga laligojoŋ.

²⁹Anutunoŋ Mooses Buŋa qaa muroti mojonto, eja iikanoŋ mono iikanoŋa me kanoŋa kolooroti, ii mende mojoŋ.”

³⁰Kaeŋ jegi qaa kokaeŋ iŋijoro, “Iinoŋ dakaya kolooroti, oŋo iikawaajoŋ kaaŋiadeeŋ tompiririŋ ama kiko qejutiwaajoŋ moma waliŋgojeŋ. Oŋanoŋ waliŋgojento, kileŋ noo jaana metooro saanoŋ uuŋ iijeŋ.

³¹Ejemba doogoya yoŋonoŋ Anutu qama kooligi mende moma oŋomakeja, ii mojoŋ. Ii mojonto, moŋnoŋ Anutu goda qeŋ muŋ uusiiŋa otaaŋkeji, iwaanoŋ qamakooli mono geja ama momakeja.

³²Moŋ jaagoo kolooro moŋnoŋ kaŋ jaaya metooroti, sundu kaaŋa ii walagadeeŋ mende moma laligoniŋ. Siwe balonoŋ koloori, kambaŋ iikanoŋa kanaiŋ kouma kete laligojoŋi, iikanoŋ sundu kaaŋa moŋ mende moniŋ.

³³Anutuwaanoŋga mende kanagati eeŋ, iinoŋ mono iwoi kaaŋa memambaajoŋ amamaanaga.”

³⁴Kaeŋ jero moma kokaeŋ jeŋ mugi, “Nemuŋmaŋganoŋ siŋgisoŋgowo laligori gii siŋgisoŋgo kuuya kawo kolooŋ somariina ano giinoŋ kete nono kuma nonomambaajoŋ mojaŋ. Ii mende sokonja.” Kaeŋ jeŋ muŋ konjoŋgi seleeŋgeŋ kamaaro. Kiaŋ.

³⁵Konjoŋgi seleeŋgeŋ kamaaroti, qaa iikanoŋ Jiisaswaa gejianoŋ kemero moma eja ii mokolooŋ kokaeŋ ijoro, “Gii Anutuwaa Meria moma laariŋ mujaŋ me qaago?”

³⁶Kaeŋ ijoro kokaeŋ meleema qisiro, “Oo Somatana, eja ii moronoŋ? Ii jena momago ii saanoŋ moma laariŋ mumaŋa.”

³⁷Meleeno kokaeŋ jeŋ kotoŋ muro, “Gii kokaeŋ uuŋ niiba. Giwo qaa jejeŋi, eja ii mono niinoŋ koloojeŋ.”

³⁸Ii moma jero, “Oo Poŋ, nii moma laariŋ gonjeŋ.” Kaeŋ jeŋ usugoŋ qama kooliŋ muro.

³⁹Jiisasnoŋ jero, “Niinoŋ ejemba gosiŋ qaagia jeŋ tegomambaajoŋ ama kamaaŋ namonoŋ koloowe. Noojoŋ ama tosianoŋ jaagoo koloojuti, yoŋoo jaagia tooro saanoŋ uuŋ iima kotowuya. Tosaaŋa jaagia awaa laligojuti, yoŋonoŋ noojoŋ ama bao jaagoo kolooŋ laligowuya.”

⁴⁰Kaeŋ jero Farisii tosianoŋ kosianoŋ iikanoŋ nama qaa ii moma kokaeŋ qisigi, “Wae! Nono kaaŋiadeeŋ jaagoo ejaga koloojoŋ me? Nonoojoŋa jejaŋ me?”