Jon 9:24-37

²⁴Det ben melet pas a musano ra di usus pasi, i sa pulu, ma det watungi tano lena, “Un liliman umatan o God ra anum a wasiso i lingmulus ut! Met tasmani lena a musano ra i utamtama pas ui, a tene sakino.”

²⁵I balu det lena, “Ka tasmani ra i a tene sakino, o awu. Ara utna kut ra a tasmani: Numugu a pulu, ma uniri a sa tamtama.”

²⁶Det tingi lena, “Asau ra i pami un ui? Ma i utamtama petlan pas ui?”

²⁷I balu det lena, “A sa watung tari tamot, ma ka mot longoro i. Sur asau ra mot nem na longoro meleti? Kanapi mot kai mot nemi sur mot a kum nat na ususer anunu?”

²⁸Det watung laulau i, ma det watungi uni lena, “Ui anun a nat na ususer, ikut met a kum nat na ususer anun o Moses.

²⁹Met, met tasmani lena o God i wasiso torom o Moses, ikut a musano ra, ka met tasmani ra i wan tagai.”

³⁰A musano i balu det lena, “Ai, anumot a wasiso i ukisin iau! Ka mot tasmani ra i wan tagai, ikut i sa utamtama pas iau.

³¹Dat sa tasmani lena o God ken longoro a niaring anun a kum tene sakino, in longoro det kut ra det pam a petutna ra i wakak umatan o God ma det ser mur anun a nemnem.

³²Turpasi una turturkibin ina rakrakon bual tuk uniri, ka di tasman tar taio ra in utamtama pas arin matan tu pulu, ra di usus pasi, i sa pulu.

³³Ra a musano ri awu sur tagun o God ken pam lar pas tu utna.”

³⁴Det balu i lena, “Di usus pas ui una sakino petutna, ma ui, u nemi sur un ususer met!” Ra det lakro ru i mut gusun a rumu na lotu.

³⁵O Iesu i longoro i lena, di sa lakro ru tar a musano ra gusun a rumu na lotu, ra i sisio suri, ma i sio pasi ra i tingi lena, “U nurnur ut una Nutun a Musano?”

³⁶I balu i lena, “Labino, un inanos iau, osi ra a Nutun a Musano, sur an nurnur uni.”

³⁷O Iesu i watungi tano lena, “U sa tama i, iau ut ri a wasiso tam.”