Jon 9:2-24

²Oro lau tan ame ndremenya iy, “Ndramak ta leheya, are lau handru amekes kandriyen ndra-in? Iy ndramak kodo-oh deh, bwe taman uru tinen amekes, ma bwidi madan bwe?”

³Jises anya, “Iy ma taman uru tinen oro bamekes ari kandriyen ndra-in bwe. Idoh asahan ta iri lau kanyolom gok ta Kindrei kameh asahan ta manyah tan.

⁴Len dah, len tataha ta amekes gok ta iy nane suni jo eme. Buku ben asahan, ari ndramak winiya bamekes gok bwe.

⁵Buku jo udu ndra kon munyak dah, jo sun handru ta lomada kon munyak.”

⁶Iy asehek sahou ano, iy sakaruk ili bada ndren, ano iy rawi sakaruk tan nane ma ndren udu bolo minen eme iy tahiy i mada iy ndramak nane.

⁷Iy asehek i tan, “Ou ala sikine madam kili bolo gwa li Silowam.” (Moson ta sahou i buku doh: “Iy tiye iy kili.”) Eme iy ndramak nane edek ili sikine madan, eme ma madan ma la-uh asak. Ano iy edek iu ili kon.

⁸Oro lau badu hawen ma oro lau rayah ndranyolom iy bwena anyolou iri lau ta lakou, lelen, “Sala iy ndramak mene ale manyah? ma iy mene anyolou lakou tiri lau?”

⁹Oro rayah anya, “Iy le ai.” Oro rayah ja anya, “Bwe, ndramak ari ja. Arile nyolom tan i buku le iy amwenen.” Ano, iy le amwenen eme asehek i toro, “Jo le asah idah.”

¹⁰Oro lau rayah ame lelen iy, “Ya, i buku sah handru madam asak?”

¹¹Iy eme asehek i toro, “Iy ndramak ari, iri aloh nyaran Jises, tahi ndren i madak ma la-uh. Ano iy tiye jo ili sikine madak ili gwa li Silowam. Jo ili sikine madak, eme ma jo anyolom kon ja.”

¹²Oro ame lelen iy ja, “Ya, iy ndramak badeh, ndraheh?” Iy anya, “Jo tanan bwe.”

¹³Oro andrei iy ndramak bwena mene madan bwe ili hawe iri Parasi.

¹⁴Na len nane Jises tahi ndren i madan, idoh udu bolo len ndrabun tiri Juwis ta amunyau.

¹⁵Ta idoh, iri Parasi ame lelen i ndramak nane ja, “I buku sah handru madam asak?” Iy eme tiye i tiri, “Iy tahi ndren i madak, ano iy tiye jo ili sikine madak, eme ma madak asak.”

¹⁶Iri Parasi rayah anya, “Iy ndramak nane amekes lakou i buku doh, iy badu hawe Kindrei bwe, tasah iy ba-en hamon ta kandriyen malen ta len ndrabun ta amunyau bwe.” Rayah anya, “I buku sah handru iy ndramak ta amekes kandriyen ndra-in, amekes kalem i buku doh?” Eme ma apwai iri a la-uh.

¹⁷Ano iri Parasi lelen i ndramak nane san rasan ja, “Ou asehek anya iy bwidi madam asak, ya, ou amwenen asehek, i buku sah handru?” Eme ndramak nane anya, “Iy propet ari ai.”

¹⁸Eme ma iri Juwis batehei budon tiri bala ta sahou tan bwe. Iri tiye sahou i ta taman uru tinen kame.

¹⁹Uru ame asahan hawe iri. Iri ame lelen uru, “Kede-eh nadu ah? Iy mene ah asehek anya, ah atehei iy madan bwe? Ya, i buku sah handru madan ndrasak ja?”

²⁰Taman uru tinen anya, “Aru tanan, kede-eh nadu aru handru, aru atehei iy asahan, madan bwe.

²¹Arile aru tanan bwe; i buku sah handru madan ndrasak ja kada-ah, ma are lau handru sihi madan, aru tanan bwe. Aha kandremenya iy. Iy tanan, ma iy winiyan asehek taha.”

²²Taman uru tinen asehek, tasah uru anoh iri Juwis. Iri Juwis ndratehei sahou ndra-en aliy bwena, i buku are lau iy asehek anya Jises badeh, Mesaya, iri kameh tikahei iy udu bolo asiu ta atukum tiri Juwis iu ili manan.

²³Eme taman uru tinen asehek anya, “Iy ndrabadok, ma iy winiyan ta asehek sahou, aha kandremenya iy.”

²⁴Iri luhi iy ndramak nane eme hamon san rasan ja, ma iri asehek i tan, “Abo, ou tandrakan, ma masiye Kindrei na dah, ma ou asehek sahou handru! Ahi tanan, iy ndramak nane bwidi madam asak, iy badeh, irek ta lomondra ndra-in.”