Jon 9:19-41

¹⁹Ma ivi tarakiiyanesi bo, “Weni tomowina na tami natumi, itupuwa da matapotapotana bo kegha? Ma ikikava da wekarakava na ekitakita?”

²⁰Ma ina maduwa da ina mamai ivonapotesi bo, “Kakovi da tuna na natukai, ma vonavaghata da itupuwa da matapotapotana.

²¹Ma ikikava da ekitakita ma iyi matana ivi yawasi na ke katakovi. Kovi tarakiiyanei da tuna mani ini sisiya, tuna magurina.”

²²Ina maduwa da ina mamai weni nakanani ivonesi, iyamna iyabumana. Iakovi da Jiu babadisi namada sisiya iterei da iyavo kava ini tumaghana da Yesu na God ina Vivinevine Wawayina na kiki numanai ini kiibunisi.

²³Tuna kubiine ivonesi bo, “Kovi tarakiiyanei, tuna magurina.”

²⁴Ma mara kana viruwa tomowina ivonei da ipisi. Ma ivonei bo, “God ku matana vonavaghata kevi sisiyei. Kakovi da Yesu na berabero wawayina.”

²⁵Tomowina ivonapotesi bo, “Ke atakovi da tuna berabero wawayina bo kegha. Ma akovi da mataku ipota ma wekarakava na akitakita.”

²⁶Ma ivi tarakiiyanei bo, “Ikikava iberim da matam ikita?”

²⁷Ma ivonapotesi bo, “Namada avonemi ma ke koti yaneku. Ma avi kubiine kokayokayowei da koni yana meyei? Mikeda tami bade kokayokayowei da kona kivini bo?”

²⁸Nakanani ivi sisiya na Jiu babadisi ivi avaberowei ma ivonei bo, “Tam na Yesu kana kivikivina, ma tokai na kegha. Tokai na Moses kana kivikivina.

²⁹Kakovi da God na Moses kurina ivi sisiya ma nani tomowina Yesu na ke katakovi da mimei ipisi.”

³⁰Ma tomowina ivonapotesi bo, “Avi deyei da tami ke kotakovi da mimei ipisi ma kegha da mataku ivi yawasi.

³¹Peyarita takovi da God na berabero wawayisi ke ita viviyanesi. Ma wawaya maninisi kava ina kayowana eberaberai na ti damsi iyanesi.

³²Ke meyani wawaya ita tupuwa da matapotapotana ma muriyai da ita kita. Weni berana na karako da itupuwa.

³³Mikeda Yesu ke God gwabinai ita pisi na ke kovokovoghina da bera ghamaghamasi ita berai.”

³⁴Ma ivonapotei bo, “Tam na berabero kamonai kutupuwa da kumagura. Ma avi kubiine kekayokayowei da kuti beyebeyekai?” Ma vaghina Perisi damsi nani tomowina kiki numana kamonai ivi kiibuni.

³⁵Yesu ivi yanei da tomowina ikwavini ikiibau na iekwai da ipanani. Ma ivonei bo, “Wawaya Natusi kitumaghanei bo kegha?”

³⁶Tomowina ivi tarakiiyanei bo, “Bada, tuna na iyai? Kevona bubuniku da taku ani tumaghanei.”

³⁷Ma Yesu ivona bo, “Wekarakava wawayina kekitakitai ma yavata koisisiya.”

³⁸Ma tomowina ivona bo, “Bada, aitumaghana.” Ma ivokavakavari.

³⁹Ma Yesu ivona bo, “Apisi ku dobu da wawaya ani tupaviresi. Ma bade apisi da wawaya matapotapotasi na ina kita ma iyavo kava ekitakita na matasi ina pota.”

⁴⁰Weni sisiyina ikaratawei na Perisi damsi viya ivi yanei. Ma ivi tarakiiyanei bo, “Aviyavisina kisisiyei? Kevonavona da tokai yavata matakii ipota bo?”

⁴¹Ma Yesu ivona bo, “Mikeda matami ita pota na ami berabero wavuna kegha. Ma kovonavona da kokitakita, tuna kubiine ami berabero wavuna emakamakai.”