Jon 9:19-41

¹⁹Kayohotka kewö qesim etkiget, “Azi ki etkö nahönŋira me qahö? ‘Jegömöl asuhuyök,’ jizahotmö, denöwö aka mönö dölki jeŋi uba ekza?”

²⁰Qesim etkigetka kewö meleŋnohot, “Azi ki netkö nahönira akza aka jegömöla asuhuyök, mi ölöp mötzit.

²¹Mewö mötzitmö, denöwö aka dölki jeŋi uba ekzawi, mi qahö mötzit. Daŋön jeŋi metohoi uzawi, niri mewöyök qahö mötzit. Gömokŋi qahö, lök qariba töwatŋi jörak alalŋa aka mötkutukutuŋambuk akza. Miaŋgöra mönö nanŋaŋgö qesigetka könaŋi ölöp jima.”

²²Juda jitŋememe yeŋgöra keŋgötŋiri möta mewö jiyohot. Yeŋön sutŋine keu kewö jöhöba urumohot aka kinget, “Kunŋan Jisös Amötqeqe Toŋi Kraist akzawi, mewö jim miwikŋaima ewö, i mönö köuluk miri kambunöhök közöl waŋgibin.”

²³Keu miaŋgöra aka kewö jiyohot, “Gömokŋi qahö, lök qariza. Miaŋgöra mönö nanŋi qesim waŋgime.”

²⁴Miaŋgöra azi jegömöl malöhi, mi kunbuk öröget kaiga kewö jiget mörök, “Azi mi siŋgisöndok azia akza, mi mötzin. Miaŋgöra mönö Anutugö qetbuŋaŋi möpöseinöŋga aködamunŋambuk ahi dop kölma.”

²⁵Mi möta kewö meleŋnök, “Siŋgisöndok azia akza me qahö, nöŋön mi qahö mötzal. Mohot kewöyök mötzal: Nöŋön jegömöl malalmö, dölkewöŋe kunbuk ölöp uba ekzal.”

²⁶Mewö meleŋniga kewö qesim waŋgiget, “Wani yuaia ak gihiza? Jegi mönö denöwö metohoza?”

²⁷Qesim waŋgigetka kewö meleŋ eŋgiyök, “Nöŋön lök meleŋ eŋgizalmö, eŋön keu jizali, mi qahö mötze. Wuanöŋgöra mi kosikŋi kunbuk jibi mötpingö kapaŋ kölje? Eŋön mönö mewöyök yaŋgö gwarekurupŋi akingö mötze me?”

²⁸Mewö meleŋ eŋgiiga mepaqepaik aka uruqeqe keu töhöreŋ kewö jim waŋgiget, “Gi mönö yaŋgö gwarekŋa akzanmö, neŋön Mosesgö gwarekurupŋa maljin.

²⁹Anutunöŋ Mosesya Buŋa keu waŋgii mötzinmö, azi miaŋön mönö igen me waigenök asuhuyöhi, mi qahö mötzin.”

³⁰Mewö jigetka keu kewö jii mötket, “Yaŋön denikeyök asuhuyöhi, iŋini miaŋgöra tok kök qeba tönpin akzeaŋgöra mi welipközal. Ölŋa welipközalmö, töndup nöŋgö jeni metohoiga ölöp uba ekzal.

³¹Ambazip goŋgoŋi yeŋön Anutu köulukögetka qahö möt eŋgimakza, mi mötzin. Mi mötzinmö, kunŋan Anutu göda qem waŋgiba diŋgiba keu jitŋi tem köla wuataŋgömakzawi, yaŋgö köulukŋi mönö kezap ala mörakza.

³²Kun jegömöl asuhuiga kunöŋ kaba jeŋi metohoyöhi, kösohot mewöŋi mi mutuhök qahö möta malin. Suep gölmenöŋ asuhuyohot, nalö miaŋgöreŋök könahiba kota mala merak miaŋgöreŋ kösohot mewöŋi kun qahö mörin.

³³Anutugöreŋök qahö kabawak ewö, yaŋön mönö yuai mewöŋi memamgö osibawak.”

³⁴Mewö jii möta kewö jim waŋgiget, “Iwinamgan siŋgisöndokpuk gölöm alohotka siŋgisöndok pakpak miambuk ahuba qarinöŋaŋön merak ninia kusum neŋgimangö mötzan. Mi qahö dop kölja.” Mewö jim waŋgiba közölgetka gumnöŋ erök. Mewö.

³⁵Közölgetka gumnöŋ eröhi, keu miaŋön Jisösgö kezapŋe gei möta azi mi miwikŋaiba kewö jii mörök, “Gi Anutugö Nahönŋi möt narim waŋgizan me qahö?”

³⁶Mi möta kewö qesiba meleŋnök, “O Ketaŋamni, azi mi daŋön? Mi jinöŋ mötagun i ölöp möt narim waŋgimam.”

³⁷Meleŋniga kewö jim kutum waŋgiyök, “Gi kewö uba neknöŋ. Göbuk keu jizali, azi mia mönö nöŋön akzal.”

³⁸Mi möta jiyök, “O Kembu, ni möt narim gihizal.” Mewö jiba sipköba köuluköm waŋgiyök.

³⁹Jisösnöŋ jiyök, “Nöŋön ambazip kewöta keuŋini jim tekömamgöra aka eta gölmenöŋ asuhuyal. Nöŋgöra aka tosatŋan jegömöl akzei, yeŋgö jeŋini tohoiga ölöp uba ek kutume. Tosatŋi jeŋini ölöpŋi maljei, yeŋön nöŋgöra aka bau jegömöl aka malme.”

⁴⁰Mewö jiiga Farisi tosatŋan kösutŋe miaŋgöreŋ kinda keu mi möta kewö qesiget, “Wae! Nini tok jegömöl azia akzin me? Neŋgöra jizan me?”

⁴¹Mewö qesigetka kewö jii mötket, “Iŋini ‘Jegömöl akzin,’ jibeak ewö, mönö siŋgisöndok qahö ahöm eŋgibawakmö, nalö kewöŋe ‘Ölöp ek kutuzin,’ mewö jimakzeaŋgöra aka siŋgisöndokŋinan mönö ahöm köhöim eŋgima.” Mewö.