Jon 9:11-21

¹¹Qesigetka kewö meleŋ eŋgiyök, “Azi qetŋi Jisös qerakzei, yaŋön söutköi gwakötaknöŋ geiga meleŋda jene timbiliba jim kutuba kewö jiyök, ‘Gi mönö Siloam o aŋgönöŋ anda jegi saŋgoŋman.’ Mewö jiiga o miaŋgöreŋ anda jeni saŋgoŋbi tohoiga ubi asariyök.”

¹²Mewö meleŋ eŋgiiga kewö qesiget, “Azi mi denike malja?” Qesim waŋgigetka “Qahö mötzal,” jiyök. Mewö.

¹³Azi jegömöl malöhi, yaŋön “Qahö mötzal,” jiiga ambazipnöŋ i waŋgita Farisi (Köna keugö kapaŋkölköl) yeŋgöreŋ anget.

¹⁴Jisösnöŋ söutŋan gwakötakpuk meleŋda jeŋe timbiliba metohoyöhi, mi mönö Sabat kendon nalöŋe meyök.

¹⁵Miaŋgöra Farisi yeŋön mewöyök kewö qesim waŋgiget, “Jegi mönö denöwö aknöŋga tohoza?” Qesim waŋgigetka kewö meleŋ eŋgiyök, “Azi miaŋön mönö söutŋan gwakötakpuk meleŋda jene timbiliiga anda jemesoholni saŋgoŋda jeni ubi asariza.”

¹⁶Mewö meleŋ eŋgiiga Farisi yeŋgöreŋök tosatŋan jiget, “Azi miaŋön Sabat kendon köteközawi, miaŋgöra mönö Anutugöreŋ azia qahö akza.” Tosatŋan jiget, “Mewö qahö! Azi goŋgoŋi kunŋan mönö denöwö aka aŋgöletot mewöŋi memamgö köhöibawak?” Mewö mewö jiba nanŋini jula deŋget.

¹⁷Mewö deŋgetka jegömöl azi miaŋgöreŋ kunbuk liliŋgöba jiget, “Jegi metohoyöhi, yaŋgöra mönö denöwö jiman?” Mewö jigetka “Kezapqetok azia akza,” jiyök.

¹⁸Mewö jiiga jeŋi ölŋa gömöliyöha tohoiga uyöhi, Juda jitŋememe yeŋön mi qahö möt nariget. Qahö möt nariba uruyahöt kinda iwinamŋi öröm etkigetka kayohot.

¹⁹Kayohotka kewö qesim etkiget, “Azi ki etkö nahönŋira me qahö? ‘Jegömöl asuhuyök,’ jizahotmö, denöwö aka mönö dölki jeŋi uba ekza?”

²⁰Qesim etkigetka kewö meleŋnohot, “Azi ki netkö nahönira akza aka jegömöla asuhuyök, mi ölöp mötzit.

²¹Mewö mötzitmö, denöwö aka dölki jeŋi uba ekzawi, mi qahö mötzit. Daŋön jeŋi metohoi uzawi, niri mewöyök qahö mötzit. Gömokŋi qahö, lök qariba töwatŋi jörak alalŋa aka mötkutukutuŋambuk akza. Miaŋgöra mönö nanŋaŋgö qesigetka könaŋi ölöp jima.”