Jon 9:10-24

¹⁰Urik limu silira, �Mberem mi uwak misokome mihi jivik fri naw?�

¹¹Urik ormu mbara, �Ma or Jisas, karem li ushanda oto, suntla uku nga jere nga or toltloho jere oson or laha misokom mambu anhik or taha nor mbashiwak ukmashi Siloamik a ihi na ujawak misokome anhi opmu jivik nawa.�

¹²Karem or mbarik limu silira, �Ma orto mbeek or lindu?� Urik ormu mbara, �Ma am, or linda mishin a heyenda ambu nir.�

¹³Urik orin li laha Farisi ondohik limu laha ira.

¹⁴Jisas ma oton Sabat wolok or mbarik jivik nari ri.

¹⁵Urik Farisi ondo limu silira, �Mberem mi uwak misokome mihi jivik fri naw?� Urik ormu mbara, �Ma oto jere las misokom mambu anhik or taha nor mbashiwak a ujaha jip amu heyenduwa.�

¹⁶Karem or sawerik Farisi lal olmu mbara, �Sabat wolok lerawun lawa ma oto mbeek Avui Wasilakahik tawa ambu ri.� Hako lal olmu mbara, �Wahau, or kavakavan unda ma ambu ri. Os kavakavan or undakop mbeek mbele las ma undahi ambun uwa ambu ri.� Karem li mbaha wavu lihi mbeek nakrem nari ambu sir, apshamba apshambak hishiri lir.

¹⁷Urik indik orin limu silira, �Mir mberem mi hishindu, ma or uwak misokome mihi jivik nawa ma oto mberemhi ma ri?� Karem li silirik ormu mbara, �Or profet oria.�

¹⁸Urik limu mbara, �Mir mbafirimbanda ma mira. Misokome mihi mbeek tumuri ambu vri.� Karem li mbaha ma otohi avoko nijavan li mbarik fri rarik limu silira,

¹⁹�Toto jikisi shihi or? Nijava orhi nyirin, os orin nyi wari wolo misokome orhi er tumuri op? Os erem si nanda nahi, mberem ushiwak ter or heyendu?�

²⁰Karem li silirik avoko nijava orhi ovro frimu mbara, �Jikisi shihi ria. Nijava orhi orin si wari wolokop misokome orhi angop tumuri vri.

²¹Hako ter or heyewa oso shimu hishandu. Lawe mbawak misokome orhi jivik fri naw, oso shimu hishandu. Orin ji silika. Or angop wasilakak nawa ria. Mashin mbanda or te!�

²²Judama ondon fri ajehe mashi oson erem frimu sawera. Judama angop karem li anaowehe mbari lir, os ma lar or sawe nor mba, �Jisas Avui Wasilaka kamashirik hulaima nokopman jivinakurik tari ma ria,� karem mbawa ma oton avak ni kria ermbeshinak nir nga nakrem lotu ukwa ambu ri.

²³Karem li mbari osik ma otohi avoko nijava frimu mbara, �Jikisi shihi oto angop wasilakak nahanda ria. Orin ji silika.�

²⁴Urik indik ma oton li usharik or tarik limu mbara, �Misokome Avui Wasilakahik mashi ome nom mbaka. Ma or mi mbawa ma oton angop ni heyenda ri. Or kavakavan unda ma ria.�