Jon 9:1-39

¹Aunbiing Iesu ka toltole sal la, ke ka par nenge kaltu, i pang ma ka kut tah.

²Ke berberat na fafausum kia ri ka diik u le, “Tom fafausum, seh i tel ta sinang laulau pesu kaltu igii ka pang ini kut, i tom le, tama ru e tina?”

³Iesu ka kiliis ri aragii, “Kaltu igii, biil i kut i wara na sinang laulau kia, le na sinang laulau ke tama ru e tina. Biil. I kut isi fanu tikii rik par foim ke God ik tapiek malal na liu kia.

⁴I rokap le kerek tel foim ke seh ae i wuun ta iau, aunbiing i siat biitom. Wor apiek i lalala ae biil tikas i fasih in rik foim.

⁵Aunbiing ia kiis biitom na piklinbat, iau tom e malal ken fanu tikii na piklinbat.”

⁶Ka use ta u arae, ma ka ubis una nanal, ke ka tel pisak ini ubis kia ma ka luun u na iun matan kut ae.

⁷Ke Iesu ka fas u aragii, “La, ok susuh na kalpong ri foteng u ini Siloam” (kamtina e Siloam e wuun). Ke kaltu ae ka la ke ka susuh, ma aunbiing ka fis ma iun mata ka sapeng tah.

⁸Pesu, foron tikiin maleh kia ke fanu ae ri par ta u i kiis la isi ka sising fanu isi tier, ri ka diik le, “I sau e kaltu ae i kiis la isi ka sising tier igii?”

⁹Fal ri ka tara le, i sau. Isau le fal ri ka tara le, “Biil. I par sau arae i.” Isau le i tom ka tartara la le, “Iau sau e kaltu ae.”

¹⁰Ri ka diik u le, “Arafah, ke igii iun matam ka sapeng?”

¹¹Ka kiliis ri aragii, “Kaltu ae ri foteng u ini Iesu, i tel ta pisak ma ka luun u na iun matang. Ke ka fas iau isi ian susuh na kalpong na Siloam. Ke ia ka la ma ia ka susuh ke ia ka par.”

¹²Ri ka diik u aragii, “I fiawah?” Ka kiliis ri aragii, “Biil ia usum.”

¹³Ke ri ka lame kaltu ae i kut tah usuf foron Farasi.

¹⁴Ma biing ae Iesu i tel ta pisak ma ka luun u na iun matan kaltu ae i kut tah, i e Biingen Mangeh.

¹⁵Pesu foron Farasi ri ka diik u sabin le, “I tara arafah ke o ka par?” Ke kaltu ae ka tara sing ri le, “I luun pisak na iun matang, ke ia ka susuh, ke ia ka par.”

¹⁶Fal e Farasi ri ka tara le, “Biil e kaltu ke God igii, wara le i lek nagogon na Biingen Mangeh.” Isau le fal ri ka diik le, “Ifasih le tikas e tom tel sinang laulau in fatapiek foron matngan rakrakai na fakileng aragii?” Ke ka mel e tampaek na fatpoto ri.

¹⁷Ke, ri ka diik kaltu tala ae le, “O wol le i matngan kaltu arafah? Wara le i sapeng tah na matam.” Ma kaltu ae ka tara le, “I nenge poropet.”

¹⁸Foron famfamu ken fan Iudaia biil tom ri unune le kaltu ae i kut tah, ma arafah i tara arae ke ka par, pesu ri ka fauun isi tama ru e tina.

¹⁹Ke ri ka diik ruh aragii, “Kalalik kimuh igii, ae kamu tara le i pang ini kut? Ke arafah i tara arae ke igii, i fasih mang ik par?”

²⁰Tama ru e tina ru ka tara aragii, “Kama usum le i e kalalik kimah, ke kama usum le i pang tom ini kut.

²¹Isau le, arafah i tara arae ke igii, i fasih ik par, ke seh i sapeng tah na iun mata, biil kama usum. Gam diik u, i kaltu matuk, i tom in orek kia.”

²²Tama ru e tina ru ka use u arae, wara le ru soke foron famfamu ken fan Iudaia, wara le ri ka somangat tah le, tikas in fapos Iesu le i e Mesaia, ke rin ti kale ri isi gong ri lotu na felun lotu.

²³Pesu, tama ru e tina ru ka tara le, “Gam diik u, i kaltu matuk.”

²⁴Ke, fawu e aunbiing foron Farasi ri ka kam pes u tala e kaltu ae i kut tah, ke ri ka tara sing i aragii, “Falimlim ini asa God le on orek tekentu. Kemem usum le kaltu ae i faliu ta wo i nenge tom tel sinang laulau.”

²⁵Ke kaltu ae ka kiliis ri aragii, “Biil ia usum, le i tom tel sinang laulau, le biil. Isau le, ia usum le ia kut tah, ma igii ia ka par.”

²⁶Ke ri ka diik u aragii, “Sanih i tel u ini wo? Ke arafah i sapeng na matam arae?”

²⁷Ka kiliis ri aragii, “Ia ka fas ta gam, ma biil tom gam wong. Gam ka ier isi ongen u sabin isi sanih? Arafah, gam sabin gam ka ier isi tapiek berberat na fafausum kia?”

²⁸Ke ri ka ngaliaf u lo, ma ri ka tarah, “Wo nenge kalalik na fafausum kia e ier igii. Kemem berberat na fafausum ke Moses.

²⁹Kemem usum le, God i orek tah usuf Moses. Isau le kaltu igii, biil kemem usum le i la tingah.”

³⁰Kaltu ae ka kiliis ri aragii, “Igii e tier an fasodar. Biil gam usum le fia i la tingah, isau le i sapeng tah na matang.

³¹Kere usum le God biil i wong la sing foron tom tel sinang laulau. I wong la sau sing fanu ae ri bulat la lo, ke ri tel sanih ae i ier isi rin tel u.

³²Tina tanwaran fakfakiis papang igii, biil biitom tikas i ongen ta u le, tikas ka sapeng tah na matan ti kaltu ae i pang ta tom ini kut.

³³Male kaltu igii biil in la tah tinbae sing God, ke biil i fasih in tel ti tier.”

³⁴Foron Farasi ri ka kiliis u aragii, “O pang ke o ka laumet piek tah na palgan sinang laulau. Arafah, o ka ier isi fausum kemem bin?” Ke, ri ka tel ufu mang tina felun lotu.

³⁵Iesu ka ongen ta u le foron Farasi, ri ka ti kale ta kaltu ae tina felun lotu. Pesu ka im isi, ma aunbiing ka tafe u, ka diik u le, “O unune sabin lon Kalalik ken Kaltu?”

³⁶Kaltu ae ka diik Iesu le, “Ier, i e seh? Fas iau, isi iak unune lo.”

³⁷Iesu ka fas u aragii, “O ka par ta u, ma i igii i ororek la turam.”

³⁸Ke, kaltu ae ka tarah, “Kumguui, ia unune.” Ka ilepul, ma ka lotu unaisa.

³⁹Iesu ka tarah, “Ia la tah uga na piklinbat isi nagogon fanu, isi foron kut rik par, ma fanseh ae ri par rik tapiek kut.”