Jon 8:8-59

⁸Ka parau fis sabin ke ka sisiit na nanal ini katngan lima.

⁹Na aunbiing ri ka ongen ta u i use u aragii, ri ka tipes suuh temtem tikii. Foron tubunkak ri suuh famu, papang na aunbiing Iesu keskes mang turan fifin ae i tih tatom aiwa.

¹⁰Iesu ka sotih fis ma ka diik u aragii, “Tin ier, fiawah mang e fanu aga? Biil tikas i nagogon wo?”

¹¹Fifin ae ka kiliis u aragii, “Ier, biil tikas.” Iesu ka fas u le, “Iau sabin, biil ia nagogon wo. La mang, ke gong sabin o tel sinang laulau.”

¹²Ke Iesu ka orek sabin usuf fanu, ma ka tarah, “Iau tom e malal ken fanu tikii na piklinbat. Seh sau ae i mi lo iau, biil tom in la na kubunor. Biil. Isau le in mel e malal na liu.”

¹³Ke foron Farasi ri ka tara sing i aragii, “Igii o ka famalal fafis wo tom, isau le orek an famalal kiam, biil i tatawin.”

¹⁴Iesu ka kiliis ri aragii, “Taftawa le ia famalal fafis iau tom, orek an famalal kiak i tatawin, wara le ia usum le ia la tingah, ma ian la uwah. Isau le biil gam usum le ia la tingah ma ian la uwah.

¹⁵Gam mi la sau na wolwol ken kaltu tinaga na piklinbat aunbiing gam nagogon, isau le ia biil ia nagogon tikas.

¹⁶Isau, male ian tel nagogon la, ke foron nagogon kiak in tekentu, wara le biil ia keskes ia tel nagogon. Ia tih tura Tata ae i wuun ta iau ugapiek.

¹⁷Na nagogon kimi tom, ri siit ta u le orek ken iu tom e kaltu i tatawin.

¹⁸Iau tom ia famalal fafis iau. Nenge tom fafamalal kiak sabin e Tata, ae i wuun ta iau.”

¹⁹Ke ri ka diik u le, “Fiawah e tamam?” Iesu ka kiliis ri aragii, “Biil gam usum lo Tata ke biil gam usum lo iau. Male gam ka usum tah lo iau, ke gamen usum sabin lo Tata.”

²⁰Ka use foron tier igii aunbiing i fausum fanu na palgan ubiif kale Felun Sising, fatat isi falifuh ae ri luun foron fafen la wah. Isau le biil tikas i luse u, wara le aunbiing kia biil biitom i tapiek.

²¹Iesu ka fas ri sabin le, “Ian la koseng gam, ke gamek im isi iau, ma gamen met ini foron sinang laulau kimi. Falifuh ae ian la ulo, biil i fasih gamen la ulo.”

²²Pesu foron famfamu ken fan Iudaia ri ka diik le, “Arafah, in siimete u tom? I e wara sangan ka tara, ‘Falifuh ae ian la ulo, biil i fasih gamen la ulo?’”

²³Isau le Iesu ka tara biitom aragii, “Gam tina pikli, ma iau tina mawe. Gam tinaga na piklinbat ma iau biil tinaga na piklinbat.

²⁴Ia ka fas ta gam le gamen met ini foron sinang laulau kimi. Male biil gam unune le iau sau e ier ae, ke gamen met tom ini foron sinang laulau kimi.”

²⁵Ri ka diik u le, “Wo seh?” Iesu ka kiliis ri aragii, “Arae tom ia use u la sing gam tin pakanini na tanwara papang igii.

²⁶Ifuun e tier ian use u isi una nagogon gam. Isau le seh i wuun ta iau, i tekentu kanaka. Ma sanih ia ka ongen ta u sing i, ia ka fas ta fanu tikii ini.”

²⁷Biil ri usum le i fasfas ri la ini Tama.

²⁸Pesu, Iesu ka tara aragii, “Aunbiing gam ka fafen ta Kalalik ken Kaltu, namih gamek usum le iau sau e ier ae, ke le biil ia tel ti tier ini wolwol kiak tom. Biil. Isau le ia use sanih sau ae Tata i fas ta iau ini.

²⁹Ma ier ae i wuun ta iau, igii tom na aisang. Biil i fin koseng iau la, wara le ia tel foron foim la tom ae i ier la isi.”

³⁰Aunbiing ka use ta u aragii, ke fanu fuun ri ka unune lo.

³¹Ke Iesu ka fas fan Iudaia ae ri ka unune ta lo le, “Male gamen posefat na orek kiak, ke gamen tapiek arae berberat na fafausum tekentu kiak.

³²Ke gamen usum na tekentu, ke tekentu ae in fasengsegeng gam.

³³Ri ka kiliis u aragii, “Kemem foron tubutamat e Abaram, ma biil biitom keme tapiek arae foron fafauun ken tikas. Arafah o ka tara le kemen sengsegeng?”

³⁴Iesu ka fas ri aragii, “Tekentu kanaka, ia fas gam, fanu tikii ae ri tel sinang laulau la, rin tapiek arae fafauun ken sinang laulau.

³⁵Nenge fafauun biil i kiis fitliu la na matanfel. Biil. Isau le nenge kalalik tina matanfel ae, i kiis fitliu aiwa.

³⁶Ke male Kalalik i fasengsegeng gam, ke gamen sengsegeng sikit.

³⁷Ia usum le gam foron tubutamat e Abaram. Isau le gam totof isi siimete iau, wara le biil ti salan orek kiak na balmi.

³⁸Ia use foron tier ae ia par ta u sing Tata, ma gam tel sanih la ae gam par u sing tama gam.”

³⁹Ri ka kiliis u aragii, “Kemem foteng Abaram arae tama kemem, wara le i e tubutamat kemem.” Iesu ka fas ri le, “Male gam berberat ke Abaram, ke gamen tel ta foron tier ae Abaram i tel ta u.

⁴⁰Isau le, biil. Igii gam ka totof isi siimete iau, ia kaltu ae i fas ta gam ini tekentu ae ia ka ongen ta u sing God. Abaram biil i tel ti tier tah aragii.

⁴¹Igii gam teltel foron tier ae tama gam tom i tel u la.” Ke ri ka tara sing i aragii, “Biil kemem pang na sal. God keskes sau, i e Tama kemem.”

⁴²Iesu ka fas ri aragii, “Male God in Tama gam tah, ke gamen ier kanaka isi iau, wara le ia la tah tinbae sing God ma iau mang igii. Biil ia la tah ini wolwol kiak tom uga. Biil. Isau le God tom i wuun ta iau ugapiek.

⁴³Isi sanih biil gam malal na foron orek kiak? Wara le biil i fasih gamen ongen foron sanih ia use u.

⁴⁴Gam berberat ke tama gam, e Satan, ke gam ka ier isi mi na wolwol ke tama gam. Tina tanwara i nenge tom siimete fanu, ma biil i sotih la na tekentu, wara le biil ti tier i tekentu la sing i. Aunbiing i lem, i orek tina bala tom, wara le i tom lemlemet ma i taman lem.

⁴⁵Isau le biil gam unune lo iau, wara le ia fas gam ini tekentu.

⁴⁶I fasih tikas lo gam in orek tus le ia tel ta ti sinang laulau? Male ia fas gam ini orek tekentu, ke isi sanih biil gam unune lo iau?

⁴⁷Seh ke God tom, i ongen sanih God i use u la. Ma wara ae biil gam ongen orek kiak, i aragii, biil gam fanu ke God.”

⁴⁸Ke fan Iudaia ri ka kiliis u aragii, “Kemem use fatus u le wo tina Samaria ma i mel e tanwa laulau lo wo.”

⁴⁹Iesu ka fas ri le, “Biil i mel e tanwa laulau lo iau. Ia bulat lo Tata, isau le biil gam bulat lo iau.

⁵⁰Biil ia ier isi sik asang tom. Biil. Isau le God tom i ier isi sik asang, ma i e tom nagogon.

⁵¹Tekentu kanaka, ia fas gam, male seh i posefat na orek kiak, biil in to met.”

⁵²I wara na orek ke Iesu, pesu fan Iudaia ri ka fas u le, “Igii kemem ka usum mang le i mel e tanwa laulau lo wo. Abaram ka met tah ke foron poropet sabin. Isau le wo tara le, male seh sau i posefat na orek kiam, biil in to met.

⁵³O wol o laumet lo tama kemem Abaram? Ka met tah ke foron poropet sabin ri ka met tah. O wol le o seh?”

⁵⁴Iesu ka kiliis ri aragii, “Male ia sik asang tom, ke orek kiak i tier foes. Tata, ae gam tara le i e God kimi, i e ier ae i sik asang.

⁵⁵Gam, biil gam usum lo, isau le ia usum lo. Male ian tara le biil ia usum lo, ke iak tapiek tom lemlemet arae gam, isau le ia usum lo, pesu ia ka posefat na orek kia.

⁵⁶Tama gam sing Abaram i laes tah isi par biing kiak, ma igii ka par ta u ke ka laes.”

⁵⁷Ke fan Iudaia ri ka fas u le, “Biil biitom i lim e sangful e bet kiam, ma o ka par ta Abaram?”

⁵⁸Iesu ka kiliis ri le, “Tekentu kanaka, ia fas gam, aunbiing Abaram biil biitom i pang, ia ka kiis tah.”

⁵⁹Na foron orek ae Iesu ka use ta u, pesu ri ka kep fat isi rin luu mete u. Isau le Iesu ka mumun na fatpoton fanu ma ka suuh tina Felun Sising ae.