Jon 8:6-54

⁶Augwaligo tama po obaso Jisas homu magibo yabowe naga suainogo tiwai. Augwaligo homugo Jisasgo wabo pode augwaligo po tų ela maiabo tų me gegainogo, te Jisasgo po weyu, aga geda muyu da, teda augwaligo agade nogo tų ela mumai hagede. Tialima, Jisas tǫba basialuyu, aga nogo danigo tǫba po asęduai.

⁷Augwaligo Jisasbolo ma hanaluyu, ma hanaluyu yai. Tialima, Jisas doligulama, agai te po augwali dali wai, “Bidi me dage tomode sęgę meni yai bidi aga hasia mu te bidigo te we masigi sąyao,” wai, Jisasgo te po augwali dali wai.

⁸Tama Jisas aga tǫba basialuyu, tǫde ma asęduai.

⁹Augwaligo tama po odolama, tama augwali tomode te sęgę meni yai bidi meni baso, tama augwali tigidali buluba deli deli naga buluba pai. Tobolu bidi polasa pai, tama meba augwali nosali pai, te po tų ebo tagalama, tama augwali Jisas taga pai. Tama Jisas agaduba deli digi bidai, tama te we Jisas aga gesabide dolaluai.

¹⁰Tama Jisas doligulama, te we dali po wai, “Augwali mena bidibawe? Bidi me deligo nage po tų ela maiabo bidi bidibowe?” Jisasgo te we dali te po wai.

¹¹Te wego te po wai, “Genuai Bidi, me deli me bidibeo.” Tama Jisasgo te po wai, “Eno me nage po tų elama, nagebolo sęgę magobeo. Nage pao. Tama nosali nago dwai sę ma egio,” Jisasgo te we dali te po wai.

¹²Te Jisasgo te Farisi hani bidi augwalibolo nosali te po ma wai, “Ena te tǫde we bidide ula dao. Bidi ena wali asobo bidi aga te bugagia bidabo ula aga selama, e tǫde bidaibao, aga hulide munu me bidigobeo,” wali.

¹³Tama te po obaso, te Farisi hani bidi augwaligo Jisas agabolo te po wai, “Megi nago e pusubo po naga tobade wabo. Gasa bidi mego nagede te po wabeo. Nago po da, te mu po menio,” augwaligo te po wai.

¹⁴Tama Jisasgo augwalibolo po wei ponoyu, te po wai, “Woo, te mu tamao. Ena digi ena tobade te po wali goli, te po mu dao. Magi basowe? Dagego ena taga soyu asali bulu te dagego konebeo, ena mena buluba pabowe te me dagego konebeo. Tialima, ena hogodama, taga soyu asali bulu, te ena konealubo. Tama ena te buluba ma pabo te me eno konealubo. Tama tibaso, ena digi ena tobade te ena da tǫde we bidigo ula dao po wali goli, te mu po dao.

¹⁵Dagego bidi me osola subo si, tama dagego tǫde bidibo we bidigo kolesagade osola subo dao. Ena da bidi me osola subo menio.

¹⁶Tialima, eno bidi me osola sugi sogo da, teda eno dolo mu naga te bidi osola sugi da. Magi basowe? Enaduba naga te sę ebo menio. Ena tagala palali bidi ena Ayago ena dali te sę ebo dao.

¹⁷Dagego bomo yai po me deli e tama telaluboo, bidi sigo gasa bidide wali po deli po tiwai naga weyu da, te po mu po dao.

¹⁸Ao, te tiwai, eno po da te ena digi ena tobade wabo dao, tama Ayago ena tagala palobaso, te ena asai dao, te Ayago agai me ena me da sigo ena tobade po wabo dao. Te ena tobade po wabo bidi si dao, dagego bomo yai po wali tiwai dao,” Jisasgo te po wai.

¹⁹Tama tialima, augwaligo Jisasbolo te po wai, “Nago aya mena bidibowe?” Jisasgo te po wei ponoyu, te po wai, “Dagego ena page kuna konebeo. Tama dagego eno Aya me dagego konebeo. Dagego ena konegi sogo da, teda dagego eno Aya me konegi da,” Jisasgo te po wai.

²⁰Jisas agai te po te masigi ge mubo be habude bidiyu, te po wai. Agai te we bidi te Moni Lotu Be tempel tomode ola mayu, te po wai, te masigi ge mubo be habude. Tama tialima, bidi me deligo aga kalabus me ebeo. Magi basowe? Te Jisas agai bodolu mani si te me elalubuo.

²¹Jisas agai augwalibolo po ma wai, “Ena paibao. Dagego ena gegebo sę yaibao. Tialima dagego yali dwai sęgo sęgę me elalubadi, dage isaibao. Dage ena pabo buluba pabo usu egobeo,” Jisasgo te po wai.

²²Tama Juda bage tobolu bidi dabe augwaligo te po augwa hasi wai, “Agai te po wali, da aga pabo buluba pabo usu egobeo, wali. Te po page e tama tiwai elalubowe, Jisas aga digi aga ma elainogo waliwe?” Juda bage augwaligo te po wai.

²³Jisasgo augwalibolo te po wai, “Dagego page bulu aiyadu dao, eno page bulu ugwadu dao. Dage e tǫde bidibo bage dao, ena e tǫde bidi menio.

²⁴Tama tibaso, eno dagebolo po wai dao, dagego yali dwai sęgo sęgę te me elalubadi, dage isaibao. Tama dage mu tama te sęgęde isaibao, dage enade ena te tǫba dulali bidi dao po dagego te pode ‘Mu po dao’ homu esiąyu da,” Jisasgo te po wai.

²⁵“Nage dewe?” augwaligo aga hanalu wai. Jisasgo augwalibolo te po wai, “Hasia sogode eno dagebolo wali gilamao.

²⁶Eno dagede wabo po hauwa elalubao, dagego ebo kolesaga hauwa me eno osola sueibao. Tialima, ena tagala palali bidi te agai homu kolesaga te mu tama dao. Tama tigidali po eno Godide odobo po te po naga eno tǫde we bidibolo wabo dao,” Jisasgo te po wai.

²⁷Augwaligo Jisasgo aga Ayade po wabo te augwaligo me konebeo.

²⁸Tama tibaso, agai augwalibolo te po wai, “Nosali dagego Godigo Bidi Mu ni pedaide daganama, te ugwaba sela muaibao. Te tebo sogo da, te dagego koneaibao, ena te ena digi dao. Te sogo me dagego koneaibao, eno haniani sę eyu, eno homu wali pisiąyu te sę yalio. Eno po Ayago ena ola mani po naga wabo dao.

²⁹Agai ena tagala palobaso, ena asai, agai ena dali bidibao. Agai ena tagalama, enaduba bidibo menio. Magi basowe? Eno ebo sę te God agai godolo yabo sę naga ebo dao,” Jisasgo te po wai.

³⁰Jisas agai te po obadi, we bidi hauwa agabolo homu dąų olama, muai.

³¹Tama tibaso, Jisas agai te agabolo homu tamadi muai we bidi tebolo te po wai, “Dagego eno ola mabo po wali peyu da, teda dage ena wali pabo we bidi mu dao.

³²Tama dagego te Godigo enade wabo mu po dagego mu koneaibao. Te mu po dagego mu koneama, tama te po mugo dage tau selama, tama dage nogo dąų wali kolesaga tagalama, tama dage olo mu bugagia bidaibao,” Jisasgo te po wai.

³³Tama augwaligo Jisasbolo te po wai, “Woo, da Abrahamgo hani dao. Te tebo side bidi deligo da hani olo sę ebo bidi te nigilama munu me bidai menio. Magi baso nago te po obawe, ‘Dage te nogo dąų wali kolesaga tagalama, tama dage olo mu bugagia bidaibao’ po magi baso obawe?” augwaligo Jisas dali te po wai.

³⁴Jisasgo augwali dali te po wai, “Eno mu po dagebolo obao, tigidali we bidi augwaligo dwai sę edu da, augwali te dwai sę sęgę dologode me bididu ebao, te augwali te nogo dąų wali olo sę ebo bidi dabe gagawai bidibao.

³⁵Te olo sę bidi aga te be page bidigo hanide mu bidigobeo, osogo tama bidaibao. Tialima, te be page bidigo ogwa aga te bidi hanide tigidali sogo mu bidada paibao.

³⁶Ena da God agai Ogwa dao. Tama eno dage bonogo nogo kęąluali pisigina sąyu da, teda dage bonogo nogo ma kęąlugobeo, olo mu bugagia bidaibao.

³⁷Eno koneanio, dage te polobadu bidai bidi Abrahamgo hani dao. Tialima, dagego eno po sabo homu isiąbaso, dagego bomo elama, ena elabo homu naga ebo dao.

³⁸Eno Aya agai enabolo ola mani sę po naga te tigidali sogo eno wabo dao. Tama tiali goli, dagego da, duga ayago dagebolo ola mani sę selama, te sę ebo dao,” Jisasgo te po wai.

³⁹Augwaligo Jisasbolo po wei ponoyu, te po wai, “Dago ayago hani page bidi da te Abraham dao,” te po wai. Jisasgo augwalibolo te po wai, “Dage Abrahamgo wai dabe tigi sogo da, teda dage Abrahamgo yali kolesaga gagawai eyu, Godigo po odigi da.

⁴⁰Eno dage dali wabo po te eno Godigo mu po eno odolama, te po naga dagebolo wabo dao. Tialima, dagego ena elainogo ebao. Abraham agai tama tiwai menio.

⁴¹Dagego duga ayago yali kolesaga megi ebao,” Jisasgo te po wai. Augwaligo Jisasbolo te po wai, “Dago idago da penani elama, da ame nai menio. Dago aya deli te God dao,” te Juda bagego te po wai, Jisas dali.

⁴²Te bidi Jisasgo augwalibolo te po wai, “Te God aga dagego aya mu tigi sogo da, teda dagego ena dali godolo mu egi da. Magi basowe? Ena God dali bidilama asai dao. Ena homugo digi ena asobeo. Godigo ena tagala palobaso, asai dao.

⁴³Magi baso dagego eno po homugo bugagia konebewe? Te page tama dao. Dagego bomo elama, dagego eno po sabo homu ebo menio.

⁴⁴Dage da duga ayago wai dabe dao. Dagego aya te Satan dao. Tama dage me bomo elama, duga ayago ebo homu kolesaga wali painogo ebo dao. Polobadu mu, tigidali nai gagalama nigali, te sogo te bidi Satan agai te bidi elebo sę tama ela asiyu, megi tama me te sę ela pabo dao. Tama agai mu po me wali pai menio. Magi basowe? Mu po agade bidibo menio. Tibo po wabo da te agai po mu dao. Satan aga tibo po wabo bidi mu dao. Tama aga tibo po wabo page bidi mu dao.

⁴⁵Tialima, ena da mu po obaso, dagego eno po mu po dao homu esiąyu, tama dagego te pode homu mubo menio.

⁴⁶Dage tomode bidi me deligo te enabolo nago dwai sę yali po weyu, tama te dwai sę page agai hania ola mabo usu egobeo. Te po kedu enade meni yai po dao. Tialima, eno mu po obadi, te dagego magi baso homude dąų olama, mubewe?

⁴⁷Godigo wai dabego da augwaligo Godigo po tigidali odobo dao. Tiali digi, dage Godigo wai dabe menio. Tama tibaso, dagego bomo elama dagego Godigo po sabo homu ebo menio,” Jisasgo te po wai.

⁴⁸Te Juda bagego Jisasgo po wei ponoyu, te nogi posobo po wai, “Dago nagede tama po wai dao, ‘Aga da dwai Samaria hani bidi dao. Tama dwai haubo mobo bidi agade bidibao,’ dago te po nagede wai dao. Dago mu po tamao,” Juda bagego Jisas dali te po wai.

⁴⁹Jisasgo po wei ponoyu, te po wai, “Enade dwai haubo mobo bidi me bidibeo. Eno ena Ayago nogi ugwaba sabo dao. Tiali digi, dagego eno nogi posobo dao.

⁵⁰Tialima, eno ena nogi ugwaba sabo sę me ebeo. Tialima bidi me deligo eno nogi ugwaba sabo sę ebo dao. Tama te bidi aga te ena dali dage dali tomode te po tų ebo po dodolabo bidi mu dao.

⁵¹Mu po eno dagebolo obao, eno po wali pabo bidi dabe augwali munu me isigobeo,” Jisasgo te po wai.

⁵²Te Juda bage augwaligo Jisasbolo te po wai, “Megi da dago mu konebao, nagede dwai haubo mobo bidi bidibao. Abraham isai dao. Godigo nosali yabo sę po ola mani profet bidi dabe me augwali isai dao. Te genuai nogi elalubo bage augwali isai digi, nago te po wai, ‘Eno po wali pabo bidi dabe augwali munu me isigobeo.’

⁵³Magi yainuwe? Nago dago wąį Abraham aiyaba elaluai hagede, nago te po waliwe? Te isai dao. Godigo nosali yabo sę po ola mani profet bidi dabe augwali me isai dao. Naga digi magi baso naga nogi ugwaba sobawe?” Juda bagego Jisas dali te po hanalu wai.

⁵⁴Jisasgo po wei ponoyu, te po wai, “Ena digi ena nogi ugwaba sigi sogo da, teda eno nogi olo tǫde nai tiwai egi dao. Ena Ayago digi eno nogi ugwaba sabo dao. Te bidide dagego te po wabo dao, ‘Te dago God dao.’