Jon 8:5-44

⁵Una Warkurai anun o Moses, ra tu ino in pami lenra, din duku doko i nama kum watat. Ma ui, asau ra un watungi uni?”

⁶Det watungi lenri, uni det nem na lari kut o Iesu ra in watung tar tu wasiso, sur det in takuni nami. Ikut o Iesu i tudung piso, ra i tumtumus namin kaskas na lamano una piso.

⁷Det ting likliki, ra i tur ma i watungi tandet lena, “Osi tagun mot ra ke pam tar tu sakino petutna, in duku mugu a ino ri nam tu wat.”

⁸O Iesu i tudung piso melet, ra i tumtumus una piso.

⁹Det longoro tar a wasiso ri anun o Iesu, ra det rop det pirso. A kum takano det pirso mugu. Ra numur det rop det pirso taktakai. O Iesu mukut i kis tiro iai, der nama ino ra di utur tari nisano.

¹⁰O Iesu i tur, ra i watungi tan a ino lena, “Le, det ra det takun tar ui, awai det mo? Pepetlai, kataio i takun ui?”

¹¹A ino i balu i lena, “Awu. Kataio.” Ra o Iesu i watungi tano lena, “Iau kai kan takun ui. Un nan kut, ma gong melet mo u pam a sakino.”

¹²O Iesu i wasiso melet torom a taro, ra i watungi lena, “Iau a talapor tagun a rakrakon bual. Osi ra i mur iau, in pam ukai a talapor na nilaun, ma ken nan melet una dumirum.”

¹³A kum Parisi det watungi tano lena, “Anum a wasiso talapor ke maut, uni ui ut, u wasiso talapor melet un ui.”

¹⁴Ra o Iesu i balu det lena, “Ra iau ut an wasiso talapor un iau, anung a wasiso i lingmulus, uni a tasman a tamon ra a wan gusuni, ma a tamon ra an nan suri. Ikut mot, ka mot tasman a tamon ra a wan gusuni, ma a tamon ra an nan suri.

¹⁵Mot, mot warkurai kut nama warkurai anun a taro, ma iau ka warkurai taio.

¹⁶Ikut ra an warkurai taio, anung a warkurai i lingmulus, uni, awu sur iau kut a pami, mir ut nam o Tita, i ra i tulu ru iau urin.

¹⁷Di sa tumus tari una numot a Warkurai lenri, ‘Ra lako ru anunder a wasiso i elar kut un tu utna, anunder a wasiso i lingmulus.’

¹⁸Iau ri a wasiso talapor un iau, ma o Tita ra i tulu ru iau urin, i kai i wasiso talapor un iau.”

¹⁹Det tingi lena, “Awai i o tamam?” O Iesu i balu det lena, “Ka mot tasman iau ma ka mot tasmani kai o Tamang. Ra gunuk mot in tasman iau, mot in tasmani kai o Tita.”

²⁰O Iesu i watung a wasiso ri tiro ubalan in noworo ina rumu na etabor, una nubual ra di ser ubek a mani na etabor iai. Kataio i pam ukai i, uni anun a du bung ke sot utmakai.

²¹O Iesu i watung meleti tan a taro lena, “An nan gusun mot, mot in sisio sur iau, ma mot in mat nam anumot a kum sakino petutna. A tamon ra an nan suri, ka mot in nan lar pas iai.”

²²A ramano kum te Juda det lena, “Pepetlai, in um doko i? Pepetlai, iri a kibino ra i watungi lena, ‘A tamon ra an nan suri, ka mot in nan lar pas iai?’”

²³O Iesu i balu det lena, “Mot taginin ut mot upiso, ma iau, a wan ut tagisapat netes. Mot tagun a rakrakon bual, iau awu sur tagun a rakrakon bual.

²⁴Iri a kibino ra a watungi tamot lena, mot in mat nam anumot a kum sakino petutna. Ra ka mot nurnur un iau lena iau ut ri iau, mot in mat nam anumot a kum sakino petutna.”

²⁵Ma det tingi lena, “Osi ui?” O Iesu i balu det, “A sa inanos tar mot turpasi una turturkibin ina nung a pinapam, tuk uniri.

²⁶A susut na utna an watungi un mot ra an warkurai mot uni, uni i ra i tulu ru iau i lingmulus, ma iau, a inanosi kut a taro una rakrakon bual una kum utna ra a longoro i tano.”

²⁷Ka det tasmani lena, o Iesu i wasiso torom det un o Tamano.

²⁸Ma o Iesu i watungi lena, “Ra mot in utur toto a Nutun a Musano usapat netes, mot in tasmani lena iau ut ri iau, ma mot in tasmani kai lena awu sur iau sot kut a papam, o Tita i ususer iau un asau ra a watungi.

²⁹I ra i tulu ru iau, i kis tomo nam iau, ma ke ser wan gusun iau, uni a ser pam a kum utna ra i gas nami.”

³⁰A susut ra det longoro a kum wasiso ri, det nurnur un o Iesu.

³¹O Iesu i watungi torom a kum te Juda ra det nurnur uni lena, “Ra mot in mur anung a etowo, mot anung a taro na ususer mulus.

³²Ma mot in tasman a lingmulus, ma a lingmulus in ulangolango mot.”

³³Det balu o Iesu lena, “Met a kum nutnutun o Abaram, tuk uniri ka met tene ititula anun taio. Sur asau ra u watungi lena a lingmulus in ulangolango met?”

³⁴O Iesu i balu det lena, “A inanos mot nama lingmulus, a taro rop ra det pam a sakino, det a kum tene ititula anun a sakino petutna.

³⁵A musano ra i tene ititula kut anun tu kabo tamano, ken kis tukum torom det, ikut a nat ra o tamano ma o nano der usus pasi, i ra tagun der mulus.

³⁶Ra a Nutun o God in ulangolango mot, mot in langolango mulus.

³⁷A tasmani ut lena, mot a kum nutnutun o Abaram, ikut uniri mot lari sur mot in um doko iau, uni anung a wasiso ke kis un mot.

³⁸A wasiso un asau ra a tama i tan o Tita, ma mot kai, mot pam asau ra mot longoro i tan a tamamot.”

³⁹Det balu i lena, “Met, met tamano nam o Abaram.” O Iesu i balu det lena, “Ra mot tamano mulus nam o Abaram, mot in pam a kum utna ra o Abaram i pami.

⁴⁰Iau a musano ra a inanos mot nama lingmulusino ra a longoro i tan o God, ikut mot nem na um doko iau. O Abaram ke pam tu utna lenri.

⁴¹Mot, mot pami ut a kum pinapam ra a tamamot i pami.” Det watungi tan o Iesu lena, “Awu sur di usus oros tar met kut, a tamamet ut ra o God.”

⁴²O Iesu i watungi tandet lena, “Ra gunuk mot tamano mulus nam o God, mot in nem iau, uni a wan tagisapat tan o God, ra uniri a kis nin. Ka wanpat urin una nung a nemnem, i ut i tulu ru iau.

⁴³Sur asau ra ka mot tasman lele anung a wasiso? Uni ka mot longoro lar pasi.

⁴⁴A tamamot ra o Satan, ma mot nemi ut lena mot in mur anun a nemnem. Tagun numugu utmakai, i a tene um doko a taro, ma ke tasman a lingmulus, uni katu lingmulus i kis uni. Ra i watung a torotoro, i wasiso nam anun a wasiso mulus, uni i ut a tene torotoro ma a taman a torotoro.