Jon 8:49-56

⁴⁹Ra o Iesu i balu det lena, “Katu laulau na nion kuri un iau. A urur torom o Tita, ma mot, ka mot urur torom iau.

⁵⁰Ka pam a kum utna ri sur a taro det in ulabo pas iau uni. Ikut ara sot kut, a tene warkurai, i ulabo pas iau.

⁵¹A inanos mot nama lingmulus, osi ra i mur anung a wasiso, ken mat.”

⁵²A ramano kum te Juda det watungi tano lena, “Uniri met tasman mulus ui lena a laulau na nion kura un ui! O Abaram i sa mat, ma a kum poropet kai det sa mat, ikut ui, u watungi lena osi ra i mur anum a wasiso ken mat.

⁵³Pepetlai, u nuki lena ui u labo taun a tamamet o Abaram? O Abaram i sa mat, ma a ramano kum poropet kai det sa mat. U nuki lena ui osi na ngas na musano ui?”

⁵⁴O Iesu i balu det lena, “Ra an ulabo melet pas iau ut, anung a wasiso na ulabo ri ke gas un tu utna. Ikut o Tita ut i ulabo pas iau, i ra mot watungi lena i anumot a God.

⁵⁵Mot, ka mot tasman o God, ikut iau, a tasmani. Ra an watungi lena ka tasmani, iau kai a tene torotoro elar nam mot. A tasman o God, ma a ser mur anun a wasiso.

⁵⁶A tamamot o Abaram i gas sur in tama anung a inawan pat. I tama i, ra i gas doko uni.”