Jon 8:43-54

⁴³Buku sah handru aha bakohok bolo iri sahou tek bala mwasin bwe? Tasah aha bandrei kati iri sahou tek bamwenen bwe.

⁴⁴Tama aha balik, aha nadun, aha amekes lakou an hamon ta iri lakou iy aso-ok. Udu ndra bada katin eme, iy ta idi lau. Iy bwalen sahou handru, tasah iy tanan ta asehek sahou handru bwe. Iy ta wendreya, ma iy aso-ok ta asehek sahou ta wendreya. Iy badeh, tine wendreya udu tan.

⁴⁵Jo badeh, asehek iri sahou handru. Arile, aha ja, batehei budon taha bame ta sahou tek bwe.

⁴⁶Are lau taha winiyan nyuwani jo amekes iri kandriyen ndra-in? Buku jo asehek sahou handru, i buku sah, aha batehei budon taha bame tek bwe ja?

⁴⁷Are lau iy badu hawe Kindrei handru, iy anuhun saba lakou Kindrei asehek. Katin ta ou bwalem ta anuhun, tasah ou badu hawe Kindrei bwe.”

⁴⁸Iri Juwis asehek sahou boto-on i ta Jises i buku doh, “Ahi asehek handru, ou ndramak ndra-in badu Samariya, malawin ndra-in udu bwele-em.”

⁴⁹Jises asehek i tiri, “Ari malawin ndra-in bado bwele-ek kada-ah bo-oh. Jo masiye tama, arile aha ja bamasiye jo bwe.

⁵⁰Jo bwalek ta atudun nyarak. Ndramak ari kede-eh, iy aso-ok ta atudun nyarak, ma iy kameh ta anuhun sahou tiri lau.

⁵¹Jo asehek taha handru. Are lau iy anuhun sahou, ma iy in hamon ta sahou tek, iy kameh winiyan bamak bwe.”

⁵²Ndrine iri Juwis irih ta sahou ta Jises, eme iri asehek sahou i buku doh, “Idah ahi ndratanan ndramwenen ai. Ou kede-eh malawin ndra-in udu bwele-em! Abraham ma hawe iri propet badeh, ndramak ndra bwena ndra-au. Arile ou anya ja, ‘Iy are lau iy anuhun ma iy in hamon ta leheya tek, iy winiyan bamak bwe.’

⁵³Budon tam kede-eh anya ou bwena labai ma ou ado bwele-en labai ta Abraham ja nadeh? Abraham ma iri propet badeh, ndramak ndra-au ndra bwena. Ya ou anya, ou are lau handru?”

⁵⁴Jises eme asehek i toro i buku doh, “Buku jo katudun nyarak amwenen, idah kameh basahan bala mwasin bwe. Iy ndramak nane masiye jo badeh, tama amwenen. Aha nane aloh iy Kindrei taha en?